ചാർജിങ് പോയിന്റിൽ ഡാറ്റ മോഷണം: മുന്നറിയിപ്പുമായി യുഎഇ സൈബർ രക്ഷാസമിതി

ഷാർജ: പൊതു ചാർജിങ് പോയിന്റുകൾ ഉപയോഗിക്കുമ്പോൾ ഡാറ്റ മോഷ്‌ടിക്കപ്പെടാൻ സാധ്യതയുണ്ടെന്ന മുന്നറിയിപ്പുമായി യുഎഇ സൈബർ രക്ഷാസമിതി. വിമാനത്താവളങ്ങൾ, മെട്രോ സ്റ്റേഷനുകൾ, ഷോപ്പിങ്‌ സെന്ററുകൾ തുടങ്ങിയ ഗതാഗത കേന്ദ്രങ്ങളിൽ കാണുന്ന ചാർജിങ് പോയിന്റുകളിൽ ഡാറ്റ കൈക്കലാക്കാനുള്ള സോഫ്റ്റ്‌വെയറുകളോ, വ്യക്തിഗത ഡാറ്റ ആക്സസ് ചെയ്യാൻ കഴിവുള്ള സംവിധാനങ്ങളോ ഉണ്ടാകാൻ സാധ്യതയുണ്ട്.

അതിനാൽ കടുത്ത ജാഗ്രത പാലിക്കണമെന്നും സമിതി മുന്നറിയിപ്പിൽ വ്യക്തമാക്കി. സുരക്ഷിതമല്ലാത്ത പൊതു സ്റ്റേഷനുകളിൽ ഉപകരണങ്ങൾ ചാർജ് ചെയ്യുന്നതിലൂടെ 79 ശതമാനം യാത്രക്കാരും അറിയാതെതന്നെ അവരുടെ സ്വകാര്യ ഡാറ്റ അപകടത്തിൽ ആകുകയാണെന്നും സമിതി അറിയിച്ചു.