യുഎഇയിൽ ഇന്ധനവില നാല്‌ ദിർഹം കടന്നു

ദുബായ്: പശ്‌ചിമേഷ്യയിലെ സംഘർഷവും എണ്ണവിതരണവുമായി ബന്ധപ്പെട്ട അനിശ്ചിതത്വവും കാരണം യുഎഇയിൽ ഇന്ധനവില കുത്തനെ ഉയർന്നു. മാർച്ചിൽ ലിറ്ററിന് രണ്ടര ദിർഹത്തോളം മാത്രമായിരുന്ന പെട്രോൾ വില ഒക്ടോബറിൽ നാല്‌ ദിർഹം കടന്നു. ​ ഒക്ടോബർ ഒന്നുമുതൽ സൂപ്പർ 98 പെട്രോളിന് ലിറ്ററിന് 4.40 ദിർഹമാണ് വില. മാർച്ചിൽ ഇത് 2.59 ദിർഹമായിരുന്നു. സ്പെഷ്യൽ 95ന്റെ വില 2.48 ദിർഹത്തിൽനിന്ന് 4.28 ദിർഹമായും ഇ പ്ലസ് 91ന്റെ വില 2.40 ദിർഹത്തിൽനിന്ന് 4.21 ദിർഹമായും ഉയർന്നു. ഡീസൽ വിലയും മാർച്ചിലെ 2.72 ദിർഹത്തിൽനിന്ന് 4.80 ദിർഹമായി.

​ഒക്ടോബറിൽ മാത്രം പെട്രോൾ വിലയിൽ 59 മുതൽ 60 ഫിൽസ് വരെയാണ് വർധന. ഡീസൽ വില 50 ഫിൽസ് ഉയർന്നു. സെപ്തംബറിൽ സൂപ്പർ 98ന് 3.80 ദിർഹവും സ്പെഷ്യൽ 95ന് 3.69 ദിർഹവും ഇ പ്ലസ് 91ന് 3.61 ദിർഹവും ഡീസലിന് 4.30 ദിർഹവുമായിരുന്നു വില. ഹോർമുസ് കടലിടുക്കിലൂടെയുള്ള ഗതാഗതത്തിലെ തടസ്സങ്ങളും മേഖലയിലെ സുരക്ഷാ സാഹചര്യവും ഇന്ധനവിതരണത്തെ ബാധിച്ചു. ഒക്ടോബർ ഒന്നിനും ആഗോള എണ്ണവിലയിൽ വലിയ ചലനമുണ്ടായി. ​ഇന്ധനവില വർധന വാഹനയാത്രക്കാരുടെയും കുടുംബങ്ങളുടെയും പ്രതിമാസ ചെലവുകളെയും ചരക്കുഗതാഗത ചെലവുകളെയും ബാധിക്കും. ഇന്ധനവിലയിലെ മാറ്റം ഗതാഗത മേഖലയിലൂടെയും മറ്റു സേവനങ്ങളിലൂടെയും ഉപഭോക്തൃ ചെലവുകളിലും പ്രതിഫലിക്കാനിടയുണ്ട്.