ദേശീയ സ്കൂൾ രോഗപ്രതിരോധ പരിപാടി: എച്ച്പിവി വാക്സിൻ ഉൾപ്പെടുത്താൻ ഒമാൻ ആരോഗ്യ മന്ത്രാലയം

മസ്‌കത്ത്‌ : ഒമാന്റെ ദേശീയ സ്കൂൾ രോഗപ്രതിരോധ പരിപാടിയിൽ ഹ്യൂമൻ പാപ്പിലോമ വൈറസ് വാക്സിൻ ഉൾപ്പെടുത്താൻ ആരോഗ്യ മന്ത്രാലയം ഒരുങ്ങുന്നു. രാജ്യത്തുടനീളമുള്ള പൊതു, സ്വകാര്യ സ്കൂളുകളിലെ ആറാം ക്ലാസ് വിദ്യാർഥികൾക്ക് വാക്സിൻ നൽകും. ആരോഗ്യ മന്ത്രാലയവുമായി സഹകരിച്ച് നടപ്പിലാക്കുന്ന ഈ സംരംഭം ലോകാരോഗ്യ സംഘടനയുടെ ശുപാർശകൾ നടപ്പിലാക്കുന്നതിന്റെ ഭാഗമാണ്. പുരുഷന്മാരിലും സ്ത്രീകളിലും സെർവിക്കൽ, മറ്റ് പ്രത്യുൽപാദന കാൻസറുകളുമായി ബന്ധപ്പെട്ട വൈറസിനെ ചെറുക്കുക എന്നതാണ് ലക്ഷ്യം.

രാജ്യവ്യാപകമായി വാക്സിൻ വ്യാപിപ്പിക്കുന്നതിനുള്ള തയ്യാറെടുപ്പിന്റെ ഭാഗമായി മുസന്ദമിലെ ഡയറക്ടറേറ്റ് ജനറൽ ഓഫ് ഹെൽത്ത് സർവീസസ് ആരോഗ്യ പ്രവർത്തകരെ വാക്സിനുകളെപ്പറ്റി ബോധവൽക്കരിക്കുന്നതിനായി ഒരു വർക്ക്ഷോപ്പ് സംഘടിപ്പിച്ചു. സുഗമമായ നടപ്പാക്കൽ ഉറപ്പാക്കുന്നതിന് മറ്റ് ഗവർണറേറ്റുകളിൽ അധിക പരിശീലന സെഷനുകൾ നടത്തും.

പൊതുജനാരോഗ്യം മെച്ചപ്പെടുത്തുന്നതിനും ഭാവി തലമുറകളെ സംരക്ഷിക്കുന്നതിനുമുള്ള ഒരു തന്ത്രപരമായ ചുവടുവയ്പ്പാണ് സ്കൂൾ തലത്തിൽ വാക്സിൻ അവതരിപ്പിക്കുന്നതെന്ന് ഡിസീസ് കൺട്രോൾ ആൻഡ് പ്രിവൻഷന്റെ ആക്ടിംഗ് ഡയറക്ടർ ജനറൽ ബദർ ബിൻ സൈഫ് അൽ റവാഹി പറഞ്ഞു.