മ്യാൻമർ ഭൂകമ്പം: പ്രത്യേക സംഘത്തെ അയച്ച്‌ യുഎഇ

ഷാർജ: മ്യാൻമറിലെ ഭൂകമ്പത്തിൽ ദുരിതമനുഭവിക്കുന്നവരെ സഹായിക്കാൻ പ്രത്യേക സംഘത്തെ അയച്ച്‌ യുഎഇ. അബുദാബി പൊലീസ്, നാഷണൽ ഗാർഡ് ജോയിന്റ്‌ ഓപ്പറേഷൻസ് കമാൻഡ് എന്നിവയിലെ അംഗങ്ങൾ ഉൾപ്പെടുന്ന രക്ഷാസംഘത്തെയാണ്‌ യുഎഇ അടിയന്തരമായി അയച്ചത്‌. യുഎഇ പ്രസിഡന്റ്‌ ഷെയ്‌ഖ്‌ മുഹമ്മദ് ബിൻ സായിദ് അൽ നഹ്യാന്റെ നിർദേശ പ്രകാരമാണ് തിരച്ചിൽ സംഘം പുറപ്പെട്ടത്. പ്രകൃതിദുരന്തങ്ങൾ നേരിടുന്ന രാജ്യങ്ങളിൽ സാഹോദര്യത്തിന്റെ അടയാളമായി ഇതിനുമുമ്പും നിരവധി ഘട്ടങ്ങളിൽ യുഎഇ അടിയന്തര സഹായം നൽകിയിട്ടുണ്ട്.

അതേസമയം, മ്യാൻമർ ഭൂകമ്പത്തിൽ മരിച്ചവരുടെ എണ്ണം 2700 കടന്നു. രക്ഷാപ്രവർത്തനങ്ങൾ തുടരുകയാണ്. ഭൂചലനം നടന്ന്‌ 92 മണിക്കൂറിനുശേഷം കെട്ടിടത്തിനടിയിൽനിന്ന്‌ 63കാരിയെ സ്‌ത്രീയെ രക്ഷിക്കാനായെന്ന് മ്യാൻമർ സൈനിക മേധാവി അറിയിച്ചു. ഔദ്യോഗിക കണക്കുപ്രകാരം 2719 പേർ മരിച്ചു. 4521 പേർക്ക്‌ പരിക്കേറ്റു. 441 പേരെ കാണാതായി. ഭൂകമ്പം കാര്യമായി ബാധിച്ച മാൻഡലെയിൽനിന്ന്‌ 259 മൃതദേഹം കണ്ടെടുത്തു. ഭൂകമ്പത്തിൽ മരിച്ചവർക്ക്‌ ആദരാഞ്‌ജലിയർപ്പിച്ച്‌ ജനങ്ങൾ ചൊവ്വാഴ്‌ച ഒരു മിനിറ്റ്‌ മൗനം ആചരിച്ചു.