കേളിയുടെ ഇടപെടൽ: ഏഴു വർഷത്തിനു ശേഷം ബാബു നാട്ടിലേക്ക് മടങ്ങി

റിയാദ് : തൊഴിൽ കരാറുകാരനും സഹപ്രവർത്തകനുമായ തമിഴ്നാട് സ്വദേശിയുടെ ചതിയിൽ പെട്ട് നാട്ടിലേക്ക് വരാൻ കഴിയാതെയിരുന്ന കോഴിക്കോട്‌ സ്വദേശി ഏഴു വർഷത്തിനു ശേഷം നാട്ടിലേക്ക് മടങ്ങി. സഹായം അഭ്യർഥിച്ച് ഇന്ത്യൻ എംബസ്സിയെ സമീപിച്ച കോഴിക്കോട്‌ കോളത്തറ സ്വദേശി ബാബുവാണ് നാട്ടിലെത്തിയത്.

തന്റെ പേരിലുള്ള കേസ് എന്താണെന്ന് അറിയാനും അത് പരിഹരിച്ച് നാടണയാനുള്ള സഹായം അഭ്യർഥിച്ചുമായിരുന്നു ആറ് മാസം മുൻപ് ബാബു കേളി ഉമ്മുൽ ഹമാം ജീവകാരുണ്യ കൺവീനർ ജാഫർ മുഖാന്തരം ഇന്ത്യൻ എംബസ്സിയെ സമീപിക്കുന്നത്. എംബസ്സിയിൽ നൽകിയ പരാതിക്കൊപ്പം സമാന്തരമായി കേളി നടത്തിയ അന്വേഷണത്തിൽ ബാബുവിന്റെ പേരിലുള്ള കേസ് കണ്ടെത്തി. തുടർന്ന് കേസ് പിൻവലിക്കാനുള്ള നടപടികൾ സ്വീകരിച്ചെങ്കിലും മറ്റു നിയമ നടപടികൾ പൂർത്തിയാകുന്നതിന് ആറ് മാസത്തോളം സമയമെടുത്തു.

വർഷങ്ങൾക്ക് മുൻപ് എക്സിറ്റ് നേടി രാജ്യം വിടാതിരുന്നതിന്റെ ഭാഗമായി വീണ്ടും എക്സിറ്റിനായി എംബസ്സി നൽകിയ അപേക്ഷ പരിഗണിക്കുന്നത് തർഹീൽ അധികൃതർ മാറ്റി വെക്കുകയായിരുന്നു. ഇദ്ദേഹത്തിൻ്റെ പേരിൽ ബുറൈദയിലുള്ള കേസ് സിസ്റ്റത്തിൽ നിന്നും മാറിയിട്ടില്ല എന്നതായിരുന്നു കാരണം. രണ്ടുമാസം നീണ്ട ശ്രമങ്ങളുടെ ഭാഗമായാണ് നടപടി ക്രമങ്ങൾ പൂർത്തിയായത്. തുടർന്ന് എംബസി മുഖേന നാസർ പൊന്നാനി അൽഖർജ് തർഹീലിൽ നിന്നും എക്സിറ്റ് നേടി. വെള്ളി രാവിലെ എയർ ഇന്ത്യ വിമാനത്തിൽ ബാബു കോഴിക്കോട്ടെത്തി.