കുവൈത്തിലുടനീളം വ്യാപക പരിശോധന; 258 പ്രവാസികൾ അറസ്റ്റിൽ

കുവൈത്ത് സിറ്റി: കുവൈത്തിൽ വ്യാപക പരിശോധനയുമായി ആഭ്യന്തര മന്ത്രാലയം. രാജ്യത്തെ ആറ് ഗവർണറേറ്റുകളിൽ പരിശോധനകളിൽ റസിഡൻസി, തൊഴിൽ വ്യവസ്ഥകൾ ലംഘിച്ച 258 പ്രവാസികളെ അറസ്റ്റ് ചെയ്തു. ഫസ്റ്റ് ഡപ്യൂട്ടി പ്രധാനമന്ത്രിയും ആഭ്യന്തര മന്ത്രിയുമായ ഷെയ്ഖ് ഫഹദ് അൽ യൂസഫ് അൽ സബാഹിന്റെ നിർദ്ദേശത്തെ തുടർന്നാണ് രാജ്യവ്യാപകമായി പരിശോധനകൾ നടത്തിയത്. റസിഡൻസ് പെർമിറ്റ് പുതുക്കാതെ തുടരുന്നവർ, വീസ കാലാവധി കഴിഞ്ഞിട്ടും രാജ്യത്ത് കഴിയുന്നവർ, തൊഴിലിടങ്ങളിൽ നിന്ന് ഒളിച്ചോടിയവർ തുടങ്ങിയവരാണ് പിടിയിലായത്.

തൊഴിലാളികൾ മാത്രമല്ല തൊഴിലുടമകളും നിയമത്തിന്റെ കീഴിൽ തന്നെയാണെന്ന് ആഭ്യന്തര മന്ത്രാലയം വ്യക്തമാക്കി. അനധികൃത തൊഴിൽ പ്രവർത്തനങ്ങൾ ഉൾപ്പെടെയുള്ള ലംഘനങ്ങൾ അനുവദിക്കില്ലെന്നും രാജ്യത്തെ എല്ലാ താമസക്കാരും തൊഴിലുടമകളും നിയമ വ്യവസ്ഥകൾ കർശനമായി പാലിക്കുന്നുണ്ടോയെന്ന് ഉറപ്പാക്കുമെന്നും അധികൃതർ അറിയിച്ചു..