ഇന്ത്യൻ പ്രധാനമന്ത്രി സൗദി അറേബ്യയിൽ

ജിദ്ദ: ഇന്ത്യൻ പ്രധാനമന്ത്രി നരേന്ദ്ര മോദി ഔദ്യോഗിക സന്ദർശനത്തിനായി ചൊവ്വാഴ്‌ച സൗദി അറേബ്യയിലെത്തി. ജിദ്ദ വിമാനത്താവളത്തിലെത്തിയ പ്രധാനമന്ത്രിയെ മക്ക മേഖല ഡെപ്യൂട്ടി ഗവർണർ സൗദ് ബിൻ മിഷാൽ ബിൻ അബ്ദുൾ അസീസ് രാജകുമാരൻ, വാണിജ്യമന്ത്രി ഡോ. മാജിദ് അൽ ഖസാബി, മറ്റ് ഉന്നത ഉദ്യോഗസ്ഥർ എന്നിവർ ചേർന്ന് സ്വീകരിച്ചു. വിദേശമന്ത്രി എസ് ജയ്‌ശങ്കർ, വിദേശസെക്രട്ടറി വിക്രം മിസ്റി എന്നിവരടങ്ങുന്ന 11 അംഗ സംഘം പ്രധാനമന്ത്രിയെ അനുഗമിക്കുന്നു.

കിരീടാവകാശിയും പ്രധാനമന്ത്രിയുമായ മുഹമ്മദ് ബിൻ സൽമാൻ രാജകുമാരന്റെ ക്ഷണപ്രകാരമാണ് പ്രധാന മന്ത്രിയുടെ ദ്വിദിന സന്ദർശനം. ഇരു രാജ്യങ്ങളും തമ്മിലുള്ള സഹകരണം ലക്ഷ്യമിട്ടുള്ള നിരവധി കരാറുകളിൽ ഒപ്പുവയ്ക്കും. പ്രതിരോധം, വ്യാപാരം, ഊർജം എന്നീ മേഖലയിൽ ആറ്‌ പ്രധാന ഉഭയകക്ഷി ധാരണപത്രത്തിലും ഒപ്പുവയ്ക്കും. ഇന്ത്യ–സൗദി തന്ത്രപരമായ പങ്കാളിത്ത സമിതി നേതൃയോഗത്തിൽ സൗദി കിരീടാവകാശിയോടൊപ്പം പ്രധാനമന്ത്രി അധ്യക്ഷനാകും. ഇന്ത്യയിൽനിന്നുള്ള സ്വകാര്യ ഹജ്ജ്‌ തീർഥാടകരുടെ യാത്ര സംബന്ധിച്ച പ്രതിസന്ധിയും ചർച്ചയായേക്കും.

റിട്സ് കാൾട്ടൻ ഹോട്ടലിൽ ക്ഷണിക്കപ്പെട്ട ഇന്ത്യൻ സമൂഹവുമായി പ്രധാനമന്ത്രി സംവദിക്കും. ഇന്ത്യക്കാർ ജോലി ചെയ്യുന്ന ഈന്തപ്പഴ ഫാക്ടറിയും അദ്ദേഹം സന്ദർശിക്കും. ഇത് മൂന്നാം തവണയാണ് മോദി സൗദി സന്ദർശിക്കുന്നത്. 2016ലും 2019ലും തലസ്ഥാനമായ റിയാദ് സന്ദർശിച്ചിരുന്നു.

ദ്വിദിന സന്ദർശനത്തിനായി സൗദിയിലെത്തിയ പ്രധാനമന്ത്രി നരേന്ദ്ര മോദിയെ, മക്ക മേഖല ഡെപ്യൂട്ടി ഗവർണർ സൗദ് ബിൻ മിഷാൽ ബിൻ അബ്ദുൾ അസീസ് രാജകുമാരൻ, വാണിജ്യമന്ത്രി ഡോ. മാജിദ് അൽ ഖസാബി എന്നിവരുടെ നേതൃത്വത്തിൽ ജിദ്ദ അന്താരാഷ്‌ട്ര വിമാനത്താവളത്തിൽ സ്വീകരിക്കുന്നു