ഹജ്ജ് ഒരുക്കങ്ങൾ അന്തിമ ഘട്ടത്തിൽ: തീർഥാടകർക്കായി റോഡുകൾ സജ്ജമാക്കി സൗദി അതോറിറ്റി

ജിദ്ദ: ഈ വർഷത്തെ ഹജ്ജ് തീർഥാടനത്തിന് മുന്നോടിയായി തീർഥാടകരുടെ സുഗമവും സുരക്ഷിതവുമായ യാത്ര ഉറപ്പാക്കുന്നതിനുള്ള എല്ലാ ഒരുക്കങ്ങളും പൂർത്തിയായതായി സൗദി റോഡ്സ് ജനറൽ അതോറിറ്റി (ആർജിഎ) അറിയിച്ചു. രാജ്യത്തുടനീളമുള്ള റോഡ് ശൃംഖലയിൽ ഇതിനായി പ്രത്യേക സംഘങ്ങളെ നിയോഗിച്ചിട്ടുണ്ട്.

വിശുദ്ധ സ്ഥലങ്ങളെ തമ്മിൽ ബന്ധിപ്പിക്കുന്ന റോഡുകളെല്ലാം വിശദമായി പരിശോധിച്ചു. 234.21 കിലോമീറ്റർ ദൈർഘ്യമുള്ള പുതിയ റോഡ് പദ്ധതികൾ പൂർത്തീകരിച്ചു. നിലവിലുള്ള 7,401.5 കിലോമീറ്റർ റോഡുകൾ നവീകരിച്ചു. സുരക്ഷ ഉറപ്പാക്കുന്നതിനായി 125,591 റിഫ്ലക്ടീവ് സ്റ്റഡുകളും 1,622 ദിശാസൂചന, മുന്നറിയിപ്പ് ബോർഡുകളും സ്ഥാപിച്ചു. 24,255 കിലോമീറ്റർ റോഡുകളിൽ പുതിയ മാർക്കിംഗുകൾ നടത്തി. 41.6 കിലോമീറ്റർ സുരക്ഷാ വേലികൾ സ്ഥാപിക്കുകയും അഞ്ച് പ്രധാന കവലകൾ നവീകരിക്കുകയും ചെയ്തു. കൂടാതെ 150 പുതിയ ലൈറ്റ് തൂണുകൾ സ്ഥാപിക്കുകയും 247 പാലങ്ങളിൽ സമഗ്രമായ പരിശോധനയും അറ്റകുറ്റപ്പണികളും നടത്തുകയും ചെയ്തു.

വർധിച്ചുവരുന്ന ട്രാഫിക് നിയന്ത്രിക്കുന്നതിനും സുരക്ഷ വർദ്ധിപ്പിക്കുന്നതിനും 20-ലധികം ആധുനിക സാങ്കേതികവിദ്യകളും രണ്ട് പുതിയ കണ്ടുപിടുത്തങ്ങളും നടപ്പാക്കിയിട്ടുണ്ട്. റോഡുകളിലെ സുഗമമായ ഗതാഗതം ഉറപ്പാക്കുന്നതിനായി 300 റോഡ് മോണിറ്റർമാരെ 24 മണിക്കൂറും പ്രവർത്തിക്കുന്ന രീതിയിൽ നിയോഗിച്ചിട്ടുണ്ട്. ലോകത്തിലെ ഏറ്റവും വലിയ എ ഐ (ആർട്ടിഫിഷ്യൽ ഇൻ്റലിജൻസ്) അധിഷ്ഠിത റോഡ് സർവേ, ഇൻസ്പെക്ഷൻ സംവിധാനം ഉപയോഗിച്ച് തീർഥാടകരുടെ യാത്രാനുഭവം മെച്ചപ്പെടുത്താൻ അതോറിറ്റി പൂർണ്ണ സജ്ജമാണ്. റോഡുകളിലെ കേടുപാടുകൾ കൃത്യമായി രേഖപ്പെടുത്തുന്നതിനുള്ള ഉപകരണങ്ങൾ, വാഹനങ്ങളുടെ ടയറുകൾ തെന്നിമാറുന്ന പ്രതിരോധശേഷി പരിശോധിക്കുന്നതിനുള്ള സംവിധാനം, റോഡുകളുടെ നിരപ്പും കനവും അളക്കുന്നതിനുള്ള സാങ്കേതികവിദ്യ, റോഡിന്റെ ഉപരിതലത്തിലെ മിനുസവും കുഴപ്പങ്ങളും വിലയിരുത്തുന്നതിനുള്ള സംവിധാനം, ഡ്രോൺ ഉപയോഗിച്ചുള്ള നിരീക്ഷണം, പെയിന്റ് ഗുണനിലവാര പരിശോധന എന്നിവയെല്ലാം ഇതിൽ ഉൾപ്പെടുന്നു. ഇത് വളരെ കൃത്യവും കാര്യക്ഷമവുമായ വിലയിരുത്തലുകൾക്ക് സഹായകരമാകും.

ഈ കാര്യക്ഷമമായ പ്രവർത്തനങ്ങളുടെ ഫലമായി അടിസ്ഥാന സൗകര്യങ്ങളുടെ ഗുണനിലവാരത്തിൽ ജി 20 രാജ്യങ്ങളിൽ സൗദി അറേബ്യ നാലാം സ്ഥാനത്തും റോഡ് കണക്റ്റിവിറ്റിയിൽ ലോകത്ത് ഒന്നാം സ്ഥാനത്തും മുന്നറിയിപ്പ് വൈബ്രേഷൻ സാങ്കേതികവിദ്യയിൽ അറബ് മേഖലയിൽ ഒന്നാം സ്ഥാനത്തും എത്തിച്ചേർന്നു.

രാജ്യത്തുടനീളം 73,000 കിലോമീറ്ററിലധികം വ്യാപിച്ചു കിടക്കുന്ന റോഡ് ശൃംഖല വിശുദ്ധ സ്ഥലങ്ങളെ രാജ്യത്തിന്റെ വിവിധ ഭാഗങ്ങളുമായി ബന്ധിപ്പിക്കുന്നതിലും സാമ്പത്തിക, ടൂറിസം, സാമൂഹിക മേഖലകളിൽ മുന്നേറ്റം സൃഷ്ടിക്കുന്നതിലും സുപ്രധാന പങ്ക് വഹിക്കുന്നു. സൗദി അറേബ്യയുടെ റോഡുകളിലൂടെ യാത്ര ചെയ്യുന്ന തീർഥാടകർക്ക് മികച്ച സേവനം നൽകാനുള്ള അതോറിറ്റിയുടെ പ്രതിബദ്ധതയാണ് ഈ പ്രവർത്തനങ്ങളിലൂടെ വ്യക്തമാകുന്നത്.

ഹജ്ജ്, ഉംറ തീർഥാടനങ്ങളുടെ സുഗമമായ നടത്തിപ്പിന് റോഡ് ഗതാഗത മേഖല ഒരു നിർണായക ഘടകമാണ്. സുരക്ഷ, ഗുണമേന്മ, ട്രാഫിക് മാനേജ്‌മെന്റ് എന്നിവയിൽ ഊന്നൽ നൽകി തന്ത്രപരമായ ലക്ഷ്യങ്ങൾ കൈവരിക്കുന്നതിനായി റോഡ് ഗതാഗത മേഖലയെ നിയന്ത്രിക്കുകയും ഏകോപിപ്പിക്കുകയും ചെയ്യുന്നത് ആർജിഎ ആണ്.