ഗൾഫ് ട്രാഫിക് വീക്ക് 3 മുതൽ 7 വരെ

മസ്‌കത്ത്‌ : ഗൾഫ് ട്രാഫിക് വീക്കിന്റെ 38–-ാം പതിപ്പ്‌ ആഘോഷിക്കാനായി ഒമാൻ മറ്റ് ഗൾഫ് സഹകരണ കൗൺസിൽ രാജ്യങ്ങളുമായി ഒത്തുചേരും. "സുരക്ഷിതമായി കടന്നുപോകുക’യെന്ന പ്രമേയത്തിൽ മെയ് മൂന്നുമുതൽ ഏഴുവരെയാണ്‌ ക്യാമ്പയിൻ. റോഡ് സുരക്ഷ അവബോധം വർധിപ്പിക്കാൻ ലക്ഷ്യമിടുന്നു. മസ്‌കത്തിലെ മാൾ ഓഫ് ഒമാനിൽ നടക്കുന്ന ഗതാഗത ബോധവൽക്കരണ പ്രദർശനം എൻജിനിയർ അഹമ്മദ് ബിൻ സയീദ് അൽ അമ്രി ഉദ്ഘാടനം ചെയ്യും. ഗൾഫിലുടനീളം സുരക്ഷിതമായ ഡ്രൈവിങ്‌ ശീലങ്ങളും കാൽനടസുരക്ഷയും പ്രോത്സാഹിപ്പിക്കാനുള്ള ഏകീകൃത പ്രാദേശിക ശ്രമത്തെയാണ് പരിപാടി പ്രതിഫലിപ്പിക്കുന്നത്.

വിവിധ ഗവർണറേറ്റുകളിലുടനീളം വൈവിധ്യമാർന്ന വിദ്യാഭ്യാസ പരിപാടികളും അവബോധ പ്രദർശനങ്ങളും സംഘടിപ്പിച്ച്‌ റോയൽ ഒമാൻ പൊലീസ് ആഘോഷങ്ങൾക്ക് നേതൃത്വം നൽകും. വിവിധ സർക്കാർ സ്ഥാപനങ്ങളുമായും പ്രസക്തമായ സ്വകാര്യ മേഖല കമ്പനികളുമായും സഹകരിച്ചാണ് പ്രവർത്തനങ്ങൾ നടക്കുന്നത്. ഗതാഗത നിയമങ്ങളെക്കുറിച്ചും റോഡ് ഉപയോഗിക്കുമ്പോൾ ജാഗ്രത പാലിക്കേണ്ടതിന്റെ പ്രാധാന്യത്തെക്കുറിച്ചും പൊതുജനങ്ങളെ ബോധവൽക്കരിക്കുകയാണ് പ്രദർശനങ്ങളുടെ പ്രാഥമിക ലക്ഷ്യം. മസ്‌കത്തിലെ മാൾ ഓഫ് ഒമാനിലാണ് മുഖ്യ പരിപാടി. സമൂഹ ഇടപെടലിനും ഗതാഗത സുരക്ഷാ വിദ്യാഭ്യാസത്തിനുമുള്ള പ്രധാന വേദിയായി പ്രദർശനം പ്രവർത്തിക്കുന്നു.