തരിശുഭൂമിയിൽ നൂറുമേനി; പരിസ്ഥിതിദിനത്തിൽ പച്ചപ്പിന്റെ തുരുത്തൊരുക്കി പ്രവാസി കൂട്ടായ്മ

ദുബായ് : പരിസ്ഥിതി ദിനാചരണത്തിന്റെ ഭാഗമായി തരിശായി കിടന്ന ഭൂമി കൃഷിയോഗ്യമാക്കി യുഎഇയിലെ പ്രവാസി അധ്യാപകരുടെയും ജീവനക്കാരുടെയും കൂട്ടായ്മ. യൂണിവേഴ്സിറ്റി ഓഫ് ഷാർജയിലെയും ഗൾഫ് മെഡിക്കൽ യൂണിവേഴ്സിറ്റിയിലെയും (ജിഎംയു) അധ്യാപകരും ജീവനക്കാരും ചേർന്നാണ് വീടിനോട് ചേർന്നുള്ള ഉപയോഗശൂന്യമായ ഭൂമിയെ ഹരിതാഭമാക്കി മാറ്റിയത്.

​യൂണിവേഴ്സിറ്റി ഓഫ് ഷാർജയിലെ പ്രൊഫസർ ഡോ. അനു രണഡെയുടെ വില്ലയ്ക്കുപിന്നിൽ കല്ലും മണ്ണും മാലിന്യങ്ങളും നിറഞ്ഞുകിടന്ന തരിശുഭൂമിയിൽ ഇവരുടെ കഠിനാധ്വാനത്തിൽ ​മരച്ചീനി, മധുരക്കിഴങ്ങ്, മുരിങ്ങ തുടങ്ങി വിവിധയിനം വിളകൾ നൂറുമേനി വിളഞ്ഞു. പരിസ്ഥിതി സംരക്ഷണത്തോടൊപ്പം ഭക്ഷ്യസ്വയംപര്യാപ്തതയും ലക്ഷ്യമിട്ടായിരുന്നു സംരംഭം. ഡോ. അനു രണഡെ, സുനി, സുജ, ഡോ. വിദ്യ അനീഷ്, ജാസ്മിൻ, ഷമീർ, ജാവേദ് ബെയ്‌സിൽ എന്നിവർ കൃഷിക്ക്‌ നേതൃത്വം നൽകി.