സീബിൽ ഈദ് ഫെസ്റ്റിവൽ സമാപിച്ചു

മസ്‌കത്ത്‌ : സാംസ്‌കാരിക അന്തരീക്ഷം വർധിപ്പിക്കാനായി സീബിൽ സംഘടിപ്പിച്ച മൂന്നുദിവസത്തെ ‘ഈദ് ഫെസ്റ്റിവൽ' സമാപിച്ചു. സീബ്‌ വാലി ഓഫീസ്, മസ്‌കത്ത്‌ മുനിസിപ്പാലിറ്റി ജനറൽ ഡയറക്‌ടറേറ്റ്‌, സർക്കാർ, സ്വകാര്യ മേഖല സ്ഥാപനങ്ങൾ എന്നിവയുടെ സഹകരണത്തോടെയാണ് ഫെസ്റ്റിവൽ സംഘടിപ്പിച്ചത്. ഒമാനിലെ ഈദുൽ -അദ്ഹ ആഘോഷങ്ങളുടെ ഭാഗമായാണ് പരിപാടി നടന്നത്. രാവിലെയും വൈകിട്ടും രണ്ട് സെഷനിലായാണ് ഫെസ്റ്റിവൽ.

ദേശീയവും വൈകാരികവുമായ കവിതാ പാരായണം, വൈവിധ്യമാർന്ന പരമ്പരാഗത സംഗീത, നാടോടി പ്രകടനങ്ങളും ഉൾപ്പെട്ടു. കുതിരസവാരി പ്രവർത്തനങ്ങൾക്കും കുതിരസവാരി പാഠങ്ങൾക്കും പുറമേ, കുട്ടികൾക്കായി സാംസ്‌കാരികവും കലാപരവുമായ മത്സരങ്ങളും തുറന്ന വേദിയിൽ സംഘടിപ്പിച്ചു. ചെറുകിട, ഇടത്തരം സംരംഭങ്ങളെ പ്രതിനിധീകരിക്കുന്ന സംരംഭകർ, ഭക്ഷ്യ ഉൽപന്നങ്ങളും ഉപഭോക്തൃ വസ്‌തുക്കളും പ്രദർശിപ്പിക്കുകയും വിൽക്കുകയും ചെയ്യുന്ന തെരുവ് കച്ചവടക്കാർ എന്നിവരുടെ പങ്കാളിത്തത്തോടെ വിലായത്തിൽ ഉപഭോക്തൃ പ്രദർശനവും നടന്നു.