ഈദ് അൽ അദ്ഹ: എല്ലാവർക്കും സമാധാനവും സമൃദ്ധിയും ആശംസിച്ച് യുഎഇ പ്രസിഡന്റ്

ദുബായ് : ഈദ് അൽ അദ്ഹയുടെ ഭാഗമായി യുഎഇ പ്രസിഡന്റ് ഷെയ്ഖ് മുഹമ്മദ് ബിൻ നഹ്യാൻ രാജ്യത്തിനും ലോക മുസ്ലിം സമൂഹത്തിനും ആശംസകൾ നേർന്നു. സമാധാനവും സ്ഥിരതയും സമൃദ്ധിയും എല്ലാവർക്കും ഉണ്ടാകട്ടെയെന്ന സന്ദേശമാണ് പ്രസിഡന്റ് സമൂഹമാധ്യമങ്ങളിലൂടെ പങ്കുവെച്ചത്. യുഎഇയെ സ്വന്തം നാടായി കാണുന്ന എല്ലാ ജനങ്ങൾക്കും, എമിറേറ്റുകളുടെ ഭരണാധികാരികൾക്കും, ലോകമെമ്പാടുമുള്ള മുസ്ലിംകൾക്കും പ്രസിഡന്റ് ഈദ് ആശംസകൾ അറിയിച്ചു. അറബ്, ഇസ്‌ലാമിക ലോകത്തെ രാജാക്കൻമാർക്കും പ്രസിഡന്റുമാർക്കും അമീർമാർക്കും അയച്ച സന്ദേശങ്ങളിലും അവരുടെ രാജ്യങ്ങൾക്കും ജനങ്ങൾക്കും തുടർച്ചയായ പുരോഗതിയും സ്ഥിരതയും സമൃദ്ധിയും ആശംസിച്ചു.

അതേസമയം, യുഎഇ ഉപരാഷ്ട്രപതിയും പ്രധാനമന്ത്രിയും ഷെയ്ഖ് മൊഹമ്മദ് ബിൻ റഷീദ് അൽ മക്തൂം ഉപരാഷ്ട്രപതിയും പ്രസിഡൻഷ്യൽ കോടതിയുടെ ചെയർമാനുമായ ഷെയ്ഖ് മൻസൂർ ബിൻ സയ്ദ് അൽ നഹ്യാൻ എന്നിവരും സമാനമായ ഈദ് സന്ദേശങ്ങൾ കൈമാറി. അബുദാബിയിലെ ഷെയ്ഖ് സയ്ദ് ഗ്രാൻഡ് മോസ്കിൽ നടന്ന ഈദ് നമസ്‌കാരത്തിൽ പങ്കെടുത്തതിന് ശേഷം, പ്രസിഡന്റ് സുപ്രീം കൗൺസിൽ അംഗങ്ങളെയും എമിറേറ്റുകളുടെ ഭരണാധികാരികളെയും കിരീടാവകാശികളെയും മറ്റ് ശൈഖുമാരെയും അബുദാബിയിൽ സ്വീകരിച്ചു.