വൈവിധ്യമാർന്ന വായനാനുഭവം പങ്കുവച്ച് ചില്ല വായന

റിയാദ് : വൈവിധ്യമാർന്ന വിഷയങ്ങൾ ഉൾക്കൊള്ളുന്ന നാല് പുസ്തകങ്ങളുടെ വായനാനുഭവം പങ്കുവച്ച് സെപ്തംബർ ലക്കം ചില്ല വായന. മലബാറിന്റെ പുരാവൃത്തങ്ങളിലേക്ക് വെളിച്ചം വീശുന്ന വി കെ അനിൽകുമാറിന്റെ ദൈവക്കരു എന്ന നോവലിന്റെ വായനാനുഭവം പങ്കുവച്ച് രാജേഷ് ഓണാക്കുന്ന് ചർച്ചയ്ക്ക്‌ തുടക്കം കുറിച്ചു. ബ്രിട്ടീഷ് എഴുത്തുകാരനായ മാറ്റ് ഹെയ്ഗിന്റെ നോവൽ "ദ മിഡ്നൈറ്റ് ലൈബ്രറി' സ്നിഗ്ധ വിപിൻ അവതരിപ്പിച്ചു. ജീവിതത്തിന്റെ അനന്തമായ സാധ്യതകൾ പര്യവേക്ഷണം ചെയ്യുന്ന നോവലിന്റെ പ്രമേയം അവർ വിശദമായി അവതരിപ്പിച്ചു.

​ഗ്രീക്ക് എഴുത്തുകാരനായ ഹെക്ട്ർഗാർസിയയും സ്പാനിഷ് എഴുത്തുകാരനായ ഫ്രാൻസെസ്ക്ക്‌ മിറാലെസും ചേർന്നെഴുതിയ ഇക്കിഗായ് നോറ റോസ് ജോമോൻ അവതരിപ്പിച്ചു. ജപ്പാനിലെ, പ്രത്യേകിച്ച് ഒക്കിനാവയിലെ, ദീർഘായുസുകാരുടെ ജീവിതരീതികളും ജീവിതത്തിന് അർഥവും ലക്ഷ്യവും നൽകുന്ന ‘ഇക്കിഗായ്’ എന്ന ആശയവുമാണ് ഉള്ളടക്കമെന്ന് നോറ വിശദീകരിച്ചു.

​ഫർസാനയുടെ "കിള' എന്ന നോവലിന്റെ വായനാനുഭവം വിദ്യാ ഭാസ്‌കർ പങ്കുവച്ചു. മതത്തിന്റെ പുറംതോടിനുള്ളിൽ സുഖമായി വാഴുന്ന ആണഹന്തയ്‌ക്കെതിരെ, സേബ നടത്തുന്ന പോരാട്ടത്തിന്റെ കഥയാണ് കിള അവതരിപ്പിക്കുന്നത്‌. പൗരോഹിത്യം, മാനവികത, സ്വാതന്ത്ര്യം എന്നിവ തമ്മിലുള്ള സംഘർഷം നോവലിലുടനീളം പ്രകടമാണെന്നും അവർ വിലയിരുത്തി. തുടർന്ന് നടന്ന ചർച്ചയ-്ക്ക് കെ പി എം സാദിഖ് തുടക്കം കുറിച്ചു. സീബ കൂവോട്, സീന തോമസ്, വിപിൻ കുമാർ, ഷംസുദ്ദീൻ മച്ചിഞ്ചേരി, ജോമോൻ സ്റ്റീഫൻ, സതീഷ് കുമാർ വളവിൽ എന്നിവരും ചർച്ചയിൽ പങ്കെടുത്തു. നാസർ കാരകുന്ന് മോഡറേറ്ററായി.