മായം ചേർത്ത സുഗന്ധവ്യഞ്ജനങ്ങൾ പിടിച്ചെടുത്തു

മസ്‌കത്ത് : ദഖ്‌ലിയ ഗവർണറേറ്റിലെ ഉപഭോക്തൃ സംരക്ഷണ അതോറിറ്റി നിസ്‌വ വിലായത്തിൽ നടത്തിയ റെയ്ഡിൽ ആരോഗ്യ-സുരക്ഷാ ചട്ടങ്ങൾ ലംഘിച്ച് തയ്യാറാക്കിയ ഒരു ടണ്ണിലധികം സുഗന്ധവ്യഞ്ജനങ്ങൾ പിടിച്ചെടുത്തു. വിദേശ തൊഴിലാളികൾ ആവശ്യമായ ലൈസൻസില്ലാതെ ഭക്ഷ്യ ഉൽപ്പന്നങ്ങൾ പാക്കേജ് ചെയ്യുന്നതായി കണ്ടെത്തിയ കെട്ടിടത്തിലാണ് ഉദ്യോഗസ്ഥർ റെയ്ഡ് നടത്തിയത്.

വിവിധ സുഗന്ധവ്യഞ്ജനങ്ങളുടെ സംസ്കരണത്തിനും പാക്കേജിംഗിനുമായി ഒരു റസിഡൻഷ്യൽ ഹൗസ് അനധികൃതമായി ഉപയോഗിക്കുന്നുണ്ടെന്ന റിപ്പോർട്ടുകളെ തുടർന്നാണ് അന്വേഷണം ആരംഭിച്ചത്. പരിശോധനയിൽ, ഉൽപ്പന്നങ്ങൾ കൃത്യമായ ഭക്ഷ്യ സുരക്ഷ മാനദണ്ഡ​ങ്ങളില്ലാതെയാണ് കൈകാര്യം ചെയ്യുന്നതെന്നും ഉൽപ്പാദന തീയതിയും കാലാവധി തീയതിയും ഉൾപ്പെടെയുള്ള അവശ്യ ലേബലിംഗും ഇല്ലെന്നും അധികൃതർ കണ്ടെത്തി.

റെയ്ഡിനെത്തുടർന്ന്, മലിനമായ ഭക്ഷണ വസ്തുക്കളും പാക്കേജിംഗിനായി ഉപയോഗിക്കുന്ന ഉപകരണങ്ങളും കണ്ടുകെട്ടി. ഉപഭോക്തൃ സംരക്ഷണ നിയമപ്രകാരം ഉൾപ്പെട്ട വ്യക്തികൾക്കെതിരെ നിയമനടപടികൾ ആരംഭിച്ചിട്ടുണ്ട്. രാജ്യത്തിന്റെ ആരോഗ്യ, സുരക്ഷാ മാനദണ്ഡങ്ങൾ പാലിക്കുന്നതിനായി ജാഗ്രത പാലിക്കാനും സംശയാസ്പദമായ വാണിജ്യ പ്രവർത്തനങ്ങൾ അധികാരികളെ അറിയിക്കാനും അധിക‍‍ൃതർ ആവശ്യപ്പെട്ടു.