ദുബായ് വിമാനത്താവളത്തിലൂടെ 16 മാസത്തിനിടെ സഞ്ചരിച്ചത് 86 ദശലക്ഷത്തിലധികം യാത്രക്കാർ

ദുബായ്: കഴിഞ്ഞ 16 മാസത്തിനിടെ ദുബായ് അന്താരാഷ്ട്ര വിമാനത്താവളത്തിൽ  86 ദശലക്ഷത്തിലധികം യാത്രക്കാർ ഒരു പരാതിക്ക്‌ പോലും ഇടം നൽകാതെ കടന്നുപോയതായി ദുബായ് ജനറൽ ഡയറക്ടറേറ്റ് ഓഫ് ഐഡന്‍റിറ്റി ആൻഡ് ഫോറിനേഴ്സ് അഫയേഴ്സ് മേധാവി ലഫ്റ്റനന്‍റ് ജനറൽ മുഹമ്മദ് അഹമ്മദ് അൽ മറി അറിയിച്ചു. കഴിഞ്ഞ വർഷവും ഈ വർഷത്തെ ആദ്യ നാല് മാസവും ഉൾപ്പെടെയുള്ള കാലയളവിലെ കണക്കാണിത്.ദുബായിൽ നടന്ന എയർപോർട്ട് ഷോയുടെ, എയർപോർട്ട് ലീഡേഴ്സ് ഗ്ലോബൽ ഫോറത്തിലാണ് അദ്ദേഹം ഇക്കാര്യം അറിയിച്ചത്

ഇതേ കാലയളവിൽ 33.8 ദശലക്ഷം യാത്രക്കാർ സ്മാർട്ട് ഗേറ്റുകൾ ഉപയോഗിച്ചെന്നും അദ്ദേഹം പറഞ്ഞു.  ഇത്  മൊത്തം യാത്രക്കാരുടെ 39.2% ആണ് , ദുബായ് വിമാനത്താവളങ്ങളുടെ ഈ വിജയം വിവിധ വകുപ്പുകളുടെയും ഏജൻസികളുടെയും കൂട്ടായ പരിശ്രമത്തിന്‍റെ ഫലമാണ്.
'ആർട്ടിഫിഷ്യൽ ഇന്‍റലിജൻസിന്‍റെ ഉപയോഗം വർദ്ധിപ്പിച്ചിട്ടുണ്ടെങ്കിലും, മനുഷ്യ വിഭവശേഷിയുടെ പങ്ക് വളരെ പ്രധാനമാണ്. ഏതെങ്കിലും പാസ്പോർട്ടിൽ സംശയം തോന്നിയാൽ, അത് യാന്ത്രികമായി പാസ്പോർട്ട് വ്യാജരേഖ വിദഗ്ദ്ധന് കൈമാറും. അദ്ദേഹം പാസ്പോർട്ടിന്‍റെ ആധികാരികത ഉറപ്പാക്കും. ഇത് മുൻപ് സാധ്യമായിരുന്നില്ല. ഈ രംഗത്തുണ്ടായ വളർച്ചയാണിത്'-.ലഫ്റ്റനന്‍റ് ജനറൽ മുഹമ്മദ് അഹമ്മദ് അൽ മറി പറഞ്ഞു.