98.4 യുഎഫ്‌എം ഫ്രണ്ട്‌സ്‌ കുവൈറ്റ്‌ ദുരിതാശ്വാസ നിധിയിലേക്ക്‌ ഒരു ലക്ഷം നൽകി

കുവൈറ്റ്‌ സിറ്റി > കുവൈറ്റിലെ  ആദ്യ സോഷ്യൽ മീഡിയ സൗഹൃദ കൂട്ടായ്മയായ 98.4 യുഎഫ്‌എം ഫ്രണ്ട്‌സ്‌ കുവൈറ്റ്‌ പ്രളയദുരിതത്തില്‍പ്പെട്ടവരെ സഹായിക്കുന്നതിനായി മുഖ്യമന്ത്രിയുടെ ദുരിതാശ്വാസ നിധിയിലേക്ക് ഒരുലക്ഷം രൂപ സഹായധനം അയച്ചു.

ഓണനിലാവ് 2018 എന്ന പേരില്‍ നടത്താന്‍ നിശ്ചയിച്ചിരുന്ന ഓണാഘോഷം റദ്ദുചെയ്തുകൊണ്ടും റാഫിൾ കൂപ്പൺ വഴിയും  കൂട്ടായ്മയിലെ അംഗങ്ങൾ വഴിയും സ്വരൂപിച്ച തുകയാണ് ദുരിതാശ്വാസനിധിയിലേക്കായ്  നല്‍കിയത്. തുടര്‍ന്നും സഹായങ്ങള്‍ ചെയ്യുമെന്ന് ഭാരവാഹികള്‍ അറിയിച്ചു. അബ്ബാസിയ പോപ്പിൻസ്  ഹാളിൽ ജംഷാദ് അയ്യൂബ്ബിന്റെ അധ്യക്ഷതയിൽ ചേർന്ന പരിപാടിക്ക് ജിജേഷ് സ്വാഗതവും  കിരൺ  പി യു നന്ദിയും പറഞ്ഞു. കെ കെ ദാസ്, ബിനോയ്, ഹബീബ് കാക്കൂര്‍,  അനീഷ്അമ്പാടി ഗീതകുമാരി, നിഷ തുടങ്ങിവര്‍ ധനസമാഹരണത്തിന് നേതൃത്വം നല്‍കി.