സർവകാല റെക്കോർഡിൽ സ്വർണവില: 75,000ത്തിലേക്ക് കുതിക്കുന്നു

കൊച്ചി : സംസ്ഥാനത്ത് സ്വർണവിലയിൽ സർവകാല റെക്കോർഡ്. പവന് ഇന്ന് 200 രൂപയാണ് കൂടിയത്. ഇതോടെ വില 74,560 ആയി. ഇന്നലെ 74,360 രൂപയായിരുന്നു സ്വർണവില. ഗ്രാമിന് 25 രൂപ കൂടി വില 9,320 ആയി. പെരുന്നാൾ ദിനത്തിൽ കുത്തനെ ഇടിഞ്ഞ സ്വർണവില പിന്നീട് തുടർച്ചയായി വർധിക്കുകയായിരുന്നു. 71,000ത്തിലേക്ക് താഴ്ന്ന വിലയാണ് ഇപ്പോൾ 75,000ത്തിലേക്ക് അടുക്കുന്നത്. ഇസ്രയേൽ- ഇറാൻ സംഘർഷം വർധിച്ചാൽ ഇനിയും സ്വർണവില കുത്തനെ ഉയരുമെന്നാണ് വിവരം. മുമ്പ് ഏപ്രിൽ 22ന് പവൻ വില 74,000 കടന്നിരുന്നു.

അഞ്ച് ശതമാനം പണിക്കൂലിയും നികുതിയും ഉൾപ്പെടെ ഒരുപവന് 79,000ത്തോളം രൂപ നൽകേണ്ടി വരും. 24 കാരറ്റിന് പവന് 81,344 രൂപയും ​ഗ്രാമിന് 10,168 രൂപയുമാണ് വില. 18 കാരറ്റിന് പവന് 61,008 രൂപയും ​ഗ്രാമിന് 7,626 രൂപയുമാണ് വില. ജനുവരി 22നാണ് സ്വർണവില ആദ്യമായി 60,000 കടന്നത്. തുടർന്ന് ഫെബ്രുവരി 11ന് പവൻ വില 64,000 കടന്നിരുന്നു. മാർച്ച് 14ന് 65,000 കടന്ന വില ഏപ്രിൽ 12നാണ് ആദ്യമായി 70,000 കടന്നത്. ​തുടർന്ന് ഏപ്രിൽ 17ന് പവൻ വില 71,000ഉം ഏപ്രിൽ 22ന് വില 74,000ഉം കടന്നു.

രാജ്യാന്തര വിപണിയിലെ ചലനങ്ങൾക്ക് അനുസരിച്ചാണ് രാജ്യത്ത് സ്വർണവില നിശ്ചയിക്കുന്നത്. അന്താരാഷ്ട്ര വിപണിയിലെ മാറ്റങ്ങളും ട്രംപിന്റെ വ്യാപാരയുദ്ധവും താരിഫുമെല്ലാം രാജ്യത്തെ സ്വർണവിലയിൽ പ്രതിഫലിക്കുന്നുണ്ട്. പശ്ചിമേഷ്യയിൽ സംഘർഷ സാഹചര്യം ഉടലെടുത്തത് സ്വർണവിലയെ കാര്യമായി ബാധിക്കുമെന്നാണ് കണക്കുകൾ സൂചിപ്പിക്കുന്നത്. സ്വർണത്തിന്റെ രാജ്യാന്തര വില, ഡോളർ – രൂപ വിനിമയ നിരക്ക്, ഇറക്കുമതി തീരുവ എന്നിവ അടിസ്ഥാനമാക്കിയാണ് സംസ്ഥാനത്ത് സ്വർണ വില നിർണയിക്കുന്നത്. വെള്ളിയ്ക്ക് ​ഗ്രാമിന് 120.10 രൂപയും കിലോ​ഗ്രാമിന് 1,20,100 രൂപയുമാണ് വില.

ജൂണിലെ സ്വർണവില

ജൂൺ 1 : 71,360

ജൂൺ 2 : 72,480

ജൂൺ 3 : 72,640

ജൂൺ 4 : 72,720

ജൂൺ 5 : 73,040

ജൂൺ 6 : 73,040

ജൂൺ 7 : 71,840

ജൂൺ 8 : 71,840

ജൂൺ 9 : 71,640

ജൂൺ 10 : 71,560

ജൂൺ 11 : 72,160

ജൂൺ 12 : 72,800

ജൂൺ 13 : 74,360

ജൂൺ 14 : 74,560