ഏഐ മതി; 30,000 ജീവനക്കാരെ പിരിച്ചുവിടാൻ ആമസോൺ

സാൻഫ്രാൻസിസ്കോ: നിർമ്മിതബുദ്ധി സാങ്കേതികതകൾ കൂട്ടിച്ചേർത്ത് ചെലവ് ചുരുക്കൽ പ്രഖ്യാപിച്ച് ഇ-കൊമേഴ്‌സ്-ടെക് ഭീമൻ ആമസോൺ. പതിനായിരക്കണക്കിന് ഓഫീസ് ജീവനക്കാരെ പിരിച്ചുവിടാൻ ഒരുക്കം തുടങ്ങി. ഏകദേശം 30,000 തസ്തികകൾ വെട്ടിക്കുറയ്ക്കുമെന്ന് വാർത്താ ഏജൻസികൾ റിപ്പോർട്ട് ചെയ്തു.

ആമസോണിലെ ഏകദേശം 3,50,000 ഓഫീസ് ജോലികളിൽ 10% ഈ കുറവ് വരുത്തും. കമ്പനിയുടെ ജീവനക്കാരിൽ ഭൂരിഭാഗവും ഉൾപ്പെടുന്ന നേരിട്ടുള്ള മനുഷ്യ പ്രയത്നം ഉപയോഗിക്കുന്ന വിതരണ, വെയർഹൗസ് തൊഴിലാളികളെ ഇത് തത്ക്കാലം ബാധിക്കില്ല.

ഉപഭോക്താക്കളുമായി ഓൺലൈനിൽ ഇടപഴകുന്നത് മുതൽ ഓഫീസുകൾ കൂടുതൽ കാര്യക്ഷമമാക്കുന്നത് വരെയുള്ള പ്രവർത്തനങ്ങളിൽ എഐയുടെ കഴിവിനെ ആമസോൺ ചീഫ് എക്സിക്യൂട്ടീവ് ആൻഡി ജാസി പ്രശംസിച്ചിരുന്നു.

"എല്ലാ ഉപഭോക്തൃ അനുഭവങ്ങളെയും AI മാറ്റുമെന്ന ഞങ്ങളുടെ ബോധ്യം ഫലപ്രാപ്തിയിലെത്താൻ തുടങ്ങിയിരിക്കുന്നു," എന്നായിരുന്നു പ്രസ്താവന. ഇതിന് തുടർച്ചയായി തന്നെ വെട്ടിക്കുറയ്ക്കലുകൾ വരുമെന്ന് ആശങ്ക പടർന്നിരുന്നു.