മഴയിങ്ങെത്തി; ശ്രദ്ധിക്കാനുണ്ട്‌ പലതും

മഴക്കാലം ഇങ്ങെത്തി. ഇത്തവണ നേരത്തേയാണ്‌ കാലവർഷത്തിന്റെ വരവ്‌. മഴക്കാലത്ത്‌ ശ്രദ്ധിക്കേണ്ട പലതുമുണ്ട്‌.

വാഹനം ഓടിക്കുന്നവർ ജാഗ്രതൈ

മഴയത്ത്‌ വണ്ടി ഓടിക്കുന്നവർ നന്നായി ശ്രദ്ധിച്ചില്ലെങ്കിൽ അപകടം ക്ഷണിച്ചുവരുത്തിയെന്നുവരാം. റോഡ്‌ തെന്നൽ ഉണ്ടാകുന്നതിനാൽ ബ്രേക്ക്‌ നന്നായി പ്രവർത്തിച്ചെന്നുവരില്ല. അതിനാൽ മഴക്കാലത്തിനുമ്പ്‌ അറ്റകുറ്റപ്പണികളും മറ്റും നടത്തണം. മഴക്കാലത്ത് ഉണ്ടാകുന്ന വാഹനാപകടങ്ങളിൽ അക്വാപ്ലെയിനിങ് അല്ലെങ്കിൽ ഹൈഡ്രോപ്ലെയിനിങ് എന്ന പ്രതിഭാസത്തിന് വലിയ പങ്കുണ്ട്. വണ്ടിയോടിക്കുമ്പോൾ എല്ലാ നിയന്ത്രണവും ഡ്രൈവറുടെ പക്കൽ തന്നെയാണെങ്കിലും ടയറും റോഡും തമ്മിലുള്ള ഘർഷണം പ്രധാന ഘടകമാണ്. മഴപെയ്യുമ്പോൾ റോഡിൽ വെള്ളത്തിന്റെ ഒരു നേർത്ത പാളി രൂപംകൊള്ളുന്നു. അത് ഒഴിവാക്കുന്നതിനാണ്‌ ടയറുകളിൽ ചെറിയ ചാലുകൾപോലുള്ള രൂപം ഉണ്ടാക്കിയിരിക്കുന്നത്. അതിലൂടെ വെള്ളം ‘പമ്പ് ചെയ്തു’കളഞ്ഞ്‌ ടയറും റോഡും തമ്മിലുള്ള ബന്ധം നിലനിർത്തുന്നു.

എന്നാൽ, വാഹനത്തിന്റെ വേഗം കൂടുമ്പോൾ ഈ ചാലുകൾക്കിടയിൽപ്പെടുന്ന വെള്ളം പമ്പ് ചെയ്തുകളയാനുള്ള സമയം ലഭിക്കാത്തതിനാൽ അവ അവിടെ കെട്ടിനിൽക്കുകയും വെള്ളം കംപ്രസിബിൾ അല്ലാത്തതിനാൽ ടയർ റോഡിൽനിന്ന്‌ അൽപ്പം വിട്ടുമാറി നിൽക്കുകയും ചെയ്യുന്നു. ഇത്തരത്തിൽ ടയറിന്റെയും റോഡിന്റെയും ഭൗതികമായ ബന്ധം വിച്ഛേദിക്കുന്ന പ്രതിഭാസത്തിനാണ് ജലനാളി പ്രവർത്തനം (അക്വ പ്ലെയിനിങ്) എന്ന് പറയുന്നത്. വാഹനത്തിന്റെ വേഗം വർധിക്കുമ്പോൾ അക്വ പ്ലെയിനിങ് സാധ്യതയും വർധിക്കുന്നു. തേയ്‌മാനം സംഭവിച്ച ടയറുകളുടെ ചാലുകളുടെ കനം കുറവായതിനാൽ പമ്പിങ്ങിന്റെ വേഗം കുറയുകയും അതുവഴി വെള്ളത്തിന്റെ പാളി നിലനിൽക്കുകയും ചെയ്യും. ഇതും വാഹനം തെന്നിമാറാനുള്ള സാധ്യത വർധിപ്പിക്കുന്നു. അതുകൊണ്ടുതന്നെ ജാഗ്രത പ്രധാനം. സൈക്കിളും ബൈക്കുമൊക്കെ ഉപയോഗിക്കുന്നവർ കൂടുതൽ ശ്രദ്ധിക്കണം. ഒപ്പം കാൽനട യാത്രികരും.

രോഗങ്ങളെ അകറ്റാം

കൊതുക്, എലി എന്നിവയാണ്‌ മഴക്കാലത്തെ പ്രധാന രോഗവാഹകർ. വെള്ളക്കെട്ടുകൾ കൊതുകുകൾ പെരുകുന്നതിന് കാരണമാകും. കെട്ടിക്കിടക്കുന്ന വെള്ളത്തിൽ എലിയുടെ വിസർജ്യം ഉണ്ടാകാം. മുറിവുള്ള കാൽ അതിൽ സ്പർശിക്കുമ്പോൾ എലിപ്പനി ഉൾപ്പെടെയുള്ള രോഗങ്ങൾ ഉണ്ടായേക്കാം. ഡെങ്കിപ്പനി, പകർച്ച പനി, മറ്റ്‌ പകർച്ചവ്യാധികൾ തുടങ്ങിയവയ്‌ക്കെതിരെ കരുതൽ വേണം. കൃത്യമായ ഇടവേളയിൽ തിളപ്പിച്ചാറ്റിയ വെള്ളം കുടിക്കണം. പാമ്പ്‌ അടക്കമുള്ള ഇഴജന്തുക്കളുടെ ശല്യം വർധിക്കുന്ന സമയമാണ്‌ മഴക്കാലം. പരിസരം ശുചിയായി സൂക്ഷിക്കണം. ജലാശയങ്ങളും കെട്ടിക്കിടക്കുന്ന വെള്ളവും തോടുകളും നദികളുമെല്ലാം കുട്ടികൾക്കടക്കം അപകടം വരുത്തുമെന്നതിനാൽ ജാഗ്രത വേണം. മലവെള്ളപ്പാച്ചിലും ഉരുൾപൊട്ടൽ സാധ്യതയുമുള്ള മേഖലകളിൽ കൂടുതൽ ജാഗ്രത പുലർത്തണം. ഇലക്‌ട്രിക് ഉപകരണങ്ങൾ കൈകാര്യം ചെയ്യുമ്പോൾ ശ്രദ്ധിക്കണം.