നിറം മാറുന്ന കമിലിയോണുകൾ

ഏറെ വ്യത്യസ്തമായ ജൈവവൈവിധ്യത്തിന്‌ ഉടമകളാണ് മഡഗാസ്കറിലെ കമിലിയോൺ വർഗങ്ങൾ (Chameleons). ലോകത്തെ കമിലിയോണുകളിൽ 70 ശതമാന-ത്തിലധികവും മഡഗാസ്കറിൽമാത്രം കണ്ടുവരുന്നു. വലിയതോതിൽ വംശനാശ ഭീഷണി നേരിടുകയാണ്‌ ഇവയിപ്പോൾ.

കമിലിയോണുകൾ അതിന്റെ കഴിവുകളും വ്യത്യസ്ത ജീവിതരീതികളുംകൊണ്ട് ശ്രദ്ധേയമാണ്. ഇവയുടെ ജീവിതരീതിയിൽ നിറംമാറ്റം, ഭക്ഷണശീലങ്ങൾ, പ്രജനന രീതികൾ, ആശയവിനിമയം എന്നിവ പ്രധാനമാണ്. മറ്റിടങ്ങളിലെ കമിലിയോണുകളേക്കാൾ ഏറെ വൈവിധ്യമുള്ളവയുമാണ്‌ മഡഗാസ്കറിലെ കമിലിയോൺ വർഗങ്ങൾ.

88 ദശലക്ഷം വർഷങ്ങൾക്കുമുമ്പ് ആഫ്രിക്കയിൽനിന്ന് വേർപെട്ടതാണ്‌ മഡഗാസ്കർ. അതുകൊണ്ടുതന്നെ കമിലിയോണുകൾക്ക് പുതിയ ആവാസവ്യവസ്ഥകൾക്ക് അനുയോജ്യമായ അവയുടെ കഴിവുകൾ വികസിപ്പിക്കാനായി. മിക്ക കമിലിയോണുകളും വനപ്രദേശങ്ങളിലെ മരങ്ങളിൽ ജീവിക്കുന്നു. എന്നാൽ ചില ചെറുഇനങ്ങൾ മണ്ണിലോ ഇലകൾക്കടിയിലോ താമസിക്കുന്നുമുണ്ട്.

ഭക്ഷണവും ജീവിതരീതിയും

പ്രധാനമായും പ്രാണികളെയാണ് ഇവ ഭക്ഷിക്കുന്നത്. പക്ഷേ ചില കമിലിയോണുകൾ ചെറിയ സസ്യഭാഗങ്ങളും ഭക്ഷിക്കാറുണ്ട്. മിക്ക കമിലിയോണുകളും രാത്രി മരക്കൊമ്പുകളിൽ ഉറങ്ങുന്നു. ഇവ ഒറ്റയായാണ് ജീവിക്കുന്നത്. ജൈവവൈവിധ്യത്തെക്കുറിച്ച് പഠിക്കുന്നവർക്കും ഇവ ഏറെ പ്രിയപ്പെട്ടതാണ്.

മറ്റ് പ്രത്യേകതകൾ

കമിലിയോണുകൾക്ക്‌ അവരുടെ ചർമത്തിന്റെ നിറം മാറ്റാൻ കഴിയും. ത്വക്കിന്റെ താഴെയുള്ള നാനോക്രിസ്റ്റൽ പാളികൾ പ്രകാശത്തെ പ്രതിഫലിപ്പിച്ച് നിറം മാറ്റത്തിന് കാരണമാകുന്നു. നിറം മാറ്റം ക്രോമാറ്റോഫോർ കോശങ്ങളുടെ സഹായത്തോടെയാണ് നടക്കുന്നത്. മരക്കൊമ്പുകൾ, ഇലകൾ, അല്ലെങ്കിൽ മണ്ണിൽ ഒളിഞ്ഞിരിക്കാൻ ഇത്‌ സഹായിക്കുന്നു.

സ്വതന്ത്രമായി ചലിക്കുന്ന ടെലിസ്കോപിക് കണ്ണുകൾക്ക് വ്യത്യസ്ത ദിശകളിൽ നോട്ടമിടാൻ കഴിവുണ്ട്. ഇതിലൂടെ ഇവയ്ക്ക് 360 -ഡിഗ്രി ദൃശ്യപരിധി ലഭിക്കുന്നു.

ഇവയുടെ നാവിന്റെ നീളം വളരെ വലുതാണ്. വളരെ വേഗത്തിൽ നാവ് പുറത്ത് ചാടിച്ച് ചെറുപ്രാണികളെയും ഇരകളെയും പിടിക്കുന്നു. ശരീര വലിപ്പത്തിലും ഇവയ്ക്ക് വൈവിധ്യമുണ്ട്. ഏറ്റവും ചെറിയ ബ്രൂക്കസിയ കമിലിയോണിന് 3 സെന്റീമീറ്റർ മാത്രമാണ് നീളം. ഏറ്റവും വലിയ പാർസൺസ് കമിലിയോണിന്‌ 60 സെന്റീമീറ്റർവരെ നീളം വയ്ക്കും. ഇവയ്ക്ക് പ്രത്യേക പ്രജനനകാലമുണ്ട്. സാധാരണയായി മഴക്കാലമായിരിക്കും പ്രജനന കാലം. പെൺ കമിലിയോൺ മുട്ടയിടാൻ അനുയോജ്യമായ ഇടം കണ്ടെത്താൻ മണ്ണിലേക്കിറങ്ങും. മണ്ണിൽ മുട്ട വിരിഞ്ഞിറങ്ങുന്ന കുഞ്ഞുങ്ങൾക്ക് മുതിർന്ന കമിലിയോണുകളിൽനിന്ന് സംരക്ഷണം ലഭിക്കാറില്ല. ഇവ വളരെ പതുക്കെയാണ് സഞ്ചരിക്കുന്നത്. പ്രത്യേകതയുള്ള പാദങ്ങൾ മരക്കൊമ്പുകൾ മുറുകെ പിടിക്കാൻ സഹായിക്കുന്നു.

ചില ഇനങ്ങൾ

പാൻതർ കമിലിയോൺ: വൈവിധ്യമാർന്ന നിറങ്ങളിൽ കാണപ്പെടുന്നു (ഓറഞ്ച്, നീല, പച്ച, ചുവപ്പ്). ഓരോ പ്രാദേശിക ജീവിക്കും വ്യത്യസ്ത നിറ സവിശേഷതകളുണ്ട്.

പാർസൺസ് കമിലിയോൺ: ലോകത്തിലെ ഏറ്റവും വലിയ കമിലിയോൺ ഇനങ്ങളിൽ ഒന്നാണ്. ഇവ പതുക്കെ ചലിക്കുന്നവയും ദീർഘായുസ്സുള്ളവയും ആണ്.

ബ്രൂക്കസിയ കമിലിയോൺസ്: മഡഗാസ്കറിലെ മണ്ണിനോട് ചേർന്നുനിൽക്കുന്ന ചെറു കമിലിയോൺ ഇനമാണിത് .സാധാരണയായി വനഭൂമിയിലെ ഇലകളുടെ ചുവട്ടിൽ ഒളിച്ചു ജീവിക്കുന്നു.

ഒലിവ് കമിലിയോൺ: വലിയ വലിപ്പമുള്ള ഇവ മഡഗാസ്കറിന്റെ കാലാവസ്ഥാ വ്യത്യാസങ്ങളോട് പൊരുത്തപ്പെട്ടു ജീവിക്കുന്നു. കീടങ്ങളെ നിയന്ത്രിക്കുന്നതിനും ജൈവസംഘടന നിലനിർത്തുന്നതിനും കമിലിയോണുകൾ വഹിക്കുന്ന പങ്ക്‌ വളരെ വലുതാണ്‌. അതുകൊണ്ടുതന്നെ ഇവയുടെ സംരക്ഷണം പരിസ്ഥിതിയിലെ സന്തുലിതാവസ്ഥയ്ക്ക് നിർണായകമാണ്.

(മൃഗസംരക്ഷണവകുപ്പ്‌ റിട്ട. അസി. ഡയറക്ടറാണ്‌

ലേഖകൻ)