കുതിക്കുന്നു കായിക കേരളം
ജിജോ ജോർജ്‌
Published on May 16, 2025, 01:29 AM | 3 min read
കായിക കേരളം കുതിച്ചുയരുകയാണ്‌. വലുതും ചെറുതുമായ 354 കളിയിടമാണ്‌ ഒമ്പതു വർഷത്തിനിടെ സംസ്ഥാനത്ത്‌ ഒരുക്കിയത്‌. കളിയിടങ്ങൾ മാത്രമല്ല, ആരോഗ്യമുള്ള ജനതയെ സൃഷ്‌ടിക്കാനുള്ള ശ്രമവും കായികവകുപ്പ്‌ നടത്തുന്നു. സമഗ്രമായ സ്‌പോർട്‌സ്‌ നയവും രൂപീകരിച്ചു. തദ്ദേശസ്ഥാപനങ്ങളിൽവരെ സ്‌പോർട്‌സ്‌ കൗൺസിൽ രൂപീകരിച്ച രാജ്യത്തെ ഏക സംസ്ഥാനവും കേരളമാണ്‌. കായികമേഖലയിലെ മാറ്റത്തിന്റെ ഫലം വരാനിരിക്കുകയാണെന്ന്‌ സംസ്ഥാന സ്‌പോർട്‌സ്‌ കൗൺസിൽ പ്രസിഡന്റ്‌ യു ഷറഫലി പറയുന്നു. നാടിന്റെ കായികക്കരുത്തും വികസനവും രാജ്യത്തിനുതന്നെ മാതൃകയാകുമെന്ന പ്രതീക്ഷയും അദ്ദേഹം പങ്കുവച്ചു. തയ്യാറാക്കിയത്‌: ദേശാഭിമാനി മലപ്പുറം ബ്യൂറോയിലെ സീനിയർ റിപ്പോർട്ടർ ജിജോ ജോർജ്‌
കായിക മേഖലയിലുണ്ടായ മാറ്റം
സംസ്ഥാനത്തിന്റെ കായിക മേഖലയിലുണ്ടായ മാറ്റങ്ങൾ പറഞ്ഞറിയിക്കാൻ കഴിയാത്തതാണ്‌. ഒമ്പത്‌ വർഷംകൊണ്ട്‌ 3500 കോടി രൂപയുടെ വികസനമാണ്‌ ഈ രംഗത്തുണ്ടായത്‌. മുൻകാലങ്ങളിൽ ഉണ്ടാകാത്ത നേട്ടമാണിത്‌. 354 കളിയിടം, 14 സിന്തറ്റിക്‌ ട്രാക്ക്‌, 16 മൾട്ടിപർപ്പസ്‌ ഇൻഡോർ സ്‌റ്റേഡിയം, 14 മൾട്ടി ജിംനേഷ്യം, 12 ഓപ്പൺ ജിംനേഷ്യം, നിരവധി സ്വിമ്മിങ്‌ പൂളുകൾ എന്നിവയും യാഥാർഥ്യമാക്കിയിട്ടുണ്ട്‌. പത്തു വർഷംമുമ്പ്‌ മൂന്നോ നാലോ സിന്തറ്റിക്‌ ട്രാക്ക്‌ മാത്രമാണ്‌ സംസ്ഥാനത്തുണ്ടായിരുന്നത്‌. ഒമ്പതു വർഷത്തിനിടയിൽ 14 പുതിയ സിന്തറ്റിക്‌ ട്രാക്ക്‌ നിർമിക്കാനായി. വയനാട്ടിലും ഇടുക്കിയിലും കാസർകോട്ടുംവരെ സിന്തറ്റിക്‌ ട്രാക്ക്‌ വന്നു. നിരവധി ഫുട്‌ബോൾ ടർഫുകൾ വന്നു. മഞ്ചേരി പയ്യനാട്‌ സ്‌റ്റേഡിയം ഉൾപ്പെടെ പലതും നവീകരിച്ചു. 124 പ്രവൃത്തി നടന്നുവരികയാണ്‌.
കായിക വികസനം എല്ലായിടത്തും എത്തുന്നില്ലേ
കായികരംഗത്തെ മാറ്റം സംസ്ഥാനത്ത്‌ ആകെയുണ്ടായിട്ടുണ്ട്‌. കായികവകുപ്പിന്റെ ഒരു പദ്ധതിയെങ്കിലും നടപ്പാക്കാത്ത ഒരു മണ്ഡലവും സംസ്ഥാനത്തുണ്ടാകില്ല. എല്ലായിടത്തും സ്‌റ്റേഡിയം നിർമിച്ചു എന്നല്ല പറയുന്നത്‌. എങ്കിലും ചെറിയൊരു പദ്ധതിയെങ്കിലും എല്ലായിടത്തും അനുവദിക്കാൻ കഴിഞ്ഞിട്ടുണ്ട്‌. 102 സ്‌കൂളിലാണ്‌ കളിക്കളം ഒരുക്കുന്നത്‌. ഇതിൽ 50 എണ്ണം പൂർത്തിയായി. ബാക്കി നിർമാണം നടക്കുന്നു. ‘ഒരു പഞ്ചായത്തിൽ ഒരു കളിക്കളം’ പദ്ധതികൂടി നടപ്പാക്കിത്തുടങ്ങിയതോടെ വലിയ മാറ്റമാണ്‌ ഉണ്ടായിരിക്കുന്നത്‌. എട്ട്‌ എണ്ണം ഉദ്‌ഘാടനം ചെയ്‌തു. 76 എണ്ണത്തിന്റെ നിർമാണം പൂർത്തിയാക്കാൻ പോകുന്നു. പഞ്ചായത്തുകൾ സ്ഥലം നൽകിയാൽ അവിടെ കളിക്കളം നിർമിക്കാനുള്ള സഹായം കായികവകുപ്പ്‌ നൽകും. ഈ കാര്യത്തിൽ എംഎൽഎമാരുടെ ഭാഗത്തുനിന്ന്‌ നല്ല സഹായമാണ്‌ ലഭിക്കുന്നത്‌.
എത്രമാത്രം കായികതാരങ്ങൾക്ക്‌ ജോലി നൽകാൻ കഴിഞ്ഞിട്ടുണ്ട്‌
ഒമ്പത്‌ വർഷംകൊണ്ട്‌ 960 കായികതാരങ്ങൾക്ക്‌ നിയമനം നൽക്കാൻ കഴിഞ്ഞു. മറ്റൊരു സംസ്ഥാനത്തും ഇത്രമാത്രം താരങ്ങൾക്ക്‌ ജോലി നൽകിയിട്ടുണ്ടാകില്ല. 2012 മുതലുള്ള നിയമനമാണ്‌ എൽഡിഎഫ്‌ സർക്കാർ വന്നശേഷം നടത്തിയത്‌. 2015-–- 2019 വർഷം 249 പേർക്കാണ്‌ ജോലി നൽകിയത്‌. 2020–-24ലെ നിയമനവും വൈകാതെ നടക്കും. ഇതിനുള്ള നടപടികളും ആരംഭിച്ചിട്ടുണ്ട്‌. ഇതിനു പുറമെ ഒളിമ്പിക്‌സിലും ഏഷ്യൻ ഗെയിംസ്‌ അടക്കമുള്ള മത്സരങ്ങളിലും മെഡൽ നേടിയവർക്ക്‌ സൂപ്പർ ന്യൂമറൽ തസ്‌തിക സൃഷ്‌ടിച്ച്‌ നിയമനവും പ്രൊമോഷനുമെല്ലാം നൽകിയിട്ടുണ്ട്‌.
കായിക താരങ്ങൾക്കുള്ള പാരിതോഷികം
ഒളിമ്പിക്‌സ്‌, ഏഷ്യൻ ഗെയിംസ്‌, നാഷണൽ ഗെയിംസ്‌ എന്നിവ വരുമ്പോൾ മുൻകൂട്ടി പാരിതോഷികം പ്രഖ്യാപിക്കുന്ന രീതി നമ്മുടെ സംസ്ഥാനത്തില്ല. മെഡൽ കിട്ടിക്കഴിഞ്ഞാൽ മന്ത്രിസഭായോഗം ചേർന്ന്‌ പാരിതോഷികം പ്രഖ്യാപിക്കുന്നതാണ്‌ രീതി. 2022 ഗുജറാത്ത്‌, 2023 ഗോവ ദേശീയ ഗെയിംസിലെയും വിജയികൾക്ക്‌ പാരിതോഷികം നൽകി. 2025 ഉത്തരാഖണ്ഡ്‌ ദേശീയ ഗെയിംസ്‌ വിജയികൾക്കുള്ള പാരിതോഷികം പ്രഖ്യാപിച്ചിട്ടുണ്ട്‌. വൈകാതെ വിതരണം ചെയ്യും. ഉത്തരാഖണ്ഡ്‌ ദേശീയ ഗെയിംസിൽ പങ്കെടുക്കാൻ മുഴുവൻ താരങ്ങളെയും വിമാനത്തിലാണ്‌ കൊണ്ടുപോയത്‌. അഞ്ഞൂറിലധികം താരങ്ങളാണ്‌ കേരളത്തെ പ്രതിനിധാനം ചെയ്‌ത്‌ മത്സരിച്ചത്‌. രാജ്യത്ത്‌ മറ്റൊരു സംസ്ഥാനത്തും ഇങ്ങനെ വിമാനത്തിൽ കായികതാരങ്ങളെ കൊണ്ടുപോയിട്ടുണ്ടാകില്ല. മൂന്നു ദിവസത്തെ ട്രെയിൻ യാത്ര താരങ്ങൾക്ക്‌ ഉണ്ടാക്കുന്ന ക്ഷീണം പരിഗണിച്ചായിരുന്നു ഈ തീരുമാനം.
സ്‌പോർട്‌സ്‌ ഹോസ്‌റ്റലുകളുടെ പ്രവർത്തനം
തൊട്ടടുത്ത വർഷം റിസൽട്ട്‌ ഉണ്ടാക്കണമെന്ന ഉദ്ദേശ്യത്തോടെയല്ല സ്‌പോർട്‌സ്‌ ഹോസ്‌റ്റലുകളിലേക്ക്‌ താരങ്ങളെ സെലക്ട്‌ ചെയ്യാറുള്ളത്‌. പല അക്കാദമികളും സ്‌കൂളുകളും മുൻ വർഷം മികച്ച പ്രകടനം നടത്തിയ താരങ്ങളെ കൊണ്ടുവന്ന്‌ സ്‌കൂൾ മീറ്റുകളിലും ജൂനിയർ മീറ്റുകളിലും നേട്ടം കൊയ്യാറുണ്ട്‌. ഒളിമ്പിക്‌സിലും ഏഷ്യൻതലത്തിലും മെഡൽ നേടുകയെന്ന ദീർഘകാല ലക്ഷ്യത്തോടെയാണ്‌ സ്‌പോർട്‌സ്‌ കൗൺസിൽ താരങ്ങളെ തെരഞ്ഞെടുക്കുന്നത്‌. കോവിഡ്‌ കാലത്ത്‌ രണ്ടു വർഷത്തോളം ഹോസ്‌റ്റലുകൾ പൂർണമായും അടഞ്ഞു കിടന്നു. അതിന്റെയൊരു ക്ഷീണം മാറി വരുന്നതേയുള്ളൂ. ഈ വർഷത്തെ സംസ്ഥാന സ്‌കൂൾ കായികമേളയിൽ തിരുവനന്തപുരം ജിവി രാജ സ്‌കൂൾ മികച്ച പ്രകടനമാണ്‌ നടത്തിയത്‌. കണ്ണൂർ സ്‌പോർട്‌സ്‌ ഡിവിഷനും തിരിച്ചുവരികയാണ്‌. കുന്നംകുളം ഹോസ്‌റ്റലും ഭാവിയിൽ നല്ല റിസൽട്ട്‌ ഉണ്ടാക്കും.
രാജ്യാന്തര സ്‌പോർട്‌സ്‌ സമ്മിറ്റ്‌ ഗുണകരമായോ
തിരുവനന്തപുരത്ത്‌ നടന്ന രാജ്യാന്തര സ്‌പോർട്‌സ്‌ സമ്മിറ്റ്‌ കേരളത്തിന്റെ കായികമേഖലയ്‌ക്ക്‌ പുത്തനുണർവാണ്‌ നൽകിയത്‌. 6000 കോടി രൂപയുടെ നിക്ഷേപമാണ്‌ ഇതുവഴി സംസ്ഥാനത്തേക്ക്‌ വരുന്നത്‌. സ്വകാര്യ കമ്പനികളും കേരളത്തിന്റെ കായികമേഖലയിൽ നിക്ഷേപിക്കാൻ തയ്യാറായി വരികയാണ്‌. കേരള ക്രിക്കറ്റ്‌ അസോസിയേഷൻ 1200 കോടിയുടെ പദ്ധതിയാണ്‌ പ്രഖ്യാപിച്ചിട്ടുള്ളത്‌. മീരാൻ ഗ്രൂപ്പും സ്‌കോർ ലൈനുംകൂടി 800 കോടി രൂപയുടെ പദ്ധതിയാണ്‌ പ്രഖ്യാപിച്ചത്‌. അതിന്റെ ഭാഗമാണ്‌ പുതുതായി തുടങ്ങിയ സൂപ്പർ ലീഗ്‌ കേരള (എസ്‌എൽകെ) ഫുട്‌ബോൾ. കേരളത്തിലെ ഫുട്‌ബോൾ താരങ്ങൾക്ക്‌ വലിയ അവസരമാണ്‌ ഇതുവഴി ലഭിക്കുന്നത്‌. മികച്ച പ്രതിഫലം ലഭിക്കുന്നതിനൊപ്പം വിദേശ താരങ്ങൾക്കൊപ്പം കളിക്കാനും അവസരം ലഭിക്കുന്നു. പുതിയ താരങ്ങൾക്ക്‌ ഐ ലീഗ്‌, ഐഎസ്‌എൽ അടക്കമുള്ളവയിലേക്ക്‌ അവസരമൊരുങ്ങുന്നു.
സംസ്ഥാനത്ത്‌ പുതിയ കായിക സംസ്‌കാരം രൂപപ്പെടുന്നുണ്ടോ
എല്ലാ തദ്ദേശസ്ഥാപനങ്ങളിലും സ്‌പോർട്‌സ്‌ കൗൺസിലുകൾ രൂപീകരിക്കാനായി. ഇത്‌ വലിയ മാറ്റമാണ്‌ ഉണ്ടാക്കിയിട്ടുള്ളത്‌. സ്‌റ്റേഡിയങ്ങൾ നിർമിക്കുകയോ താരങ്ങൾക്ക്‌ ജോലി കൊടുക്കുകയോ മാത്രമല്ല, ആരോഗ്യമുള്ള ഒരു ജനതയെ വാർത്തെടുക്കുകയാണ്‌ ലക്ഷ്യം. സ്‌പോർട്‌സ്‌ ഇന്ന്‌ നമ്മുടെ സ്‌കൂൾ പാഠ്യപദ്ധതിയുടെ ഭാഗമാണ്‌. കായിക കരിക്കുലംതന്നെ തയ്യാറായിട്ടുണ്ട്‌. കുട്ടികളെയും ചെറുപ്പക്കാരെയും മാത്രമല്ല, എല്ലാ പ്രായത്തിലുള്ളവരെയും കളിക്കളങ്ങളിലേക്ക്‌ കൊണ്ടുവരികയാണ്‌ ലക്ഷ്യം.
ലഹരിക്കെതിരെ വലിയ ക്യാമ്പയിനാണ്‌ കായികമന്ത്രി വി അബ്ദുറഹിമാന്റെ നേതൃത്വത്തിൽ നടക്കുന്നത്‌. ‘കിക്ക്‌ ഡ്രഗ്‌സ്‌–- സേ യെസ്‌ ടു സ്‌പോർട്‌സ്‌’ എന്ന പേരിൽ ലഹരിവിരുദ്ധയാത്ര നടന്നുവരികയാണ്‌. 24ന്‌ മലപ്പുറം തിരൂരിലാണ്‌ ജാഥയുടെ സമാപനം. വലിയ പങ്കാളിത്തമാണ്‌ ഈ യാത്രയിൽ കണ്ടുവരുന്നത്‌. അധ്യയനവർഷം ആരംഭിക്കുന്നതോടെ സ്‌കൂളുകൾ കേന്ദ്രീകരിച്ച്‌ വേറെയും ക്യാമ്പയിൻ നടത്തും. കുട്ടികളിൽ കളിയിടങ്ങളോട്‌ ലഹരിയുണ്ടാക്കി എടുക്കുകയാണ്‌ ലക്ഷ്യം. അതുവഴി ആരോഗ്യമുള്ള ഒരു ജനതയെ വാർത്തെടുക്കാൻ കഴിയണം.
