'അവിശ്വാസവും കടന്ന് അഞ്ച് വർഷം'; മേയറായിരുന്ന ഓര്‍മ പങ്കുവെച്ച് മന്ത്രി വി ശിവൻകുട്ടി
ബിജോ ടോമി
Published on Nov 24, 2025, 12:32 PM | 2 min read
ഭൂരിപക്ഷമില്ലാതിരുന്നിട്ടും വികസന പ്രവര്‍ത്തനങ്ങളില്‍ പുലര്‍ത്തിയ നിഷ്‌പക്ഷതകൊണ്ട്‌ കാലാവധി പൂര്‍ത്തിയാക്കി. ബിജെപിയും യുഡിഎഫും ഒരുമിച്ച് കൊണ്ടുവന്ന അവിശ്വാസം പരാജയപ്പെട്ടു. കൂറുമാറ്റ നിരോധന നിയമം ആദ്യമായി പ്രയോഗിച്ചതും ക‍ൗൺസിൽ തടസ്സപ്പെടുത്തിയ അംഗങ്ങളെ പ്രത്യേക അധികാരം ഉപയോഗിച്ച്‌ സസ്‌പെൻഡ്‌ ചെയ്‌ത ആദ്യ സംഭവവുമടക്കം നിരവധി ഓർമകൾ. 1995–2000 കാലയളവിൽ തിരുവനന്തപുരം കോർപറേഷൻ മേയറായിരുന്ന മന്ത്രി വി ശിവൻകുട്ടി സംസാരിക്കുന്നു
ഉള്ളൂർ പഞ്ചായത്ത്‌ പ്രസിഡന്റ്‌ സ്ഥാനത്തുനിന്നാണ്‌ കോർപറേഷനിലെ പെരുന്താന്നി വാർഡിൽ മത്സരത്തിനിറങ്ങിയത്‌. വാർഡ്‌ അപരിചിതം. ജനങ്ങൾ ഇരുകൈയും നീട്ടി സ്വീകരിച്ചു. 1,600 വോട്ടിന്റെ ഭൂരിപക്ഷത്തിലാണ്‌ ജയിച്ചത്‌, മേയറായി. കോർപറേഷനിലെ ആ തെരഞ്ഞെടുപ്പിലെ ഏറ്റവും വലിയ ഭൂരിപക്ഷമായിരുന്നു. 50 വാർഡുകളാണ്‌ ഉണ്ടായിരുന്നത്‌. എൽഡിഎഫിന്‌ 23 ക‍ൗൺസിലർമാരും. ഭൂരിപക്ഷം ഇല്ലാതിരുന്നിട്ടും അഞ്ചു വർഷം തികച്ചുവെന്ന്‌ ശിവൻകുട്ടി പറഞ്ഞു.
എം പി പത്‌മനാഭൻ, സ്റ്റാൻലി സത്യനേശൻ, പ്രഭാകരൻനായർ എന്നിങ്ങനെ മൂന്ന്‌ മുൻ മേയർമാർ ക‍ൗൺസിലർമാരായി ഉണ്ടായിരുന്നു. അഞ്ച് വർഷം പൂർത്തീകരിച്ചു എന്നു മാത്രമല്ല, മെഡിക്കൽ കോളേജ്‌, കുറവൻകോണം, കളിപ്പാൻകുളം, തൃക്കണ്ണാപുരം വാർഡുകളിൽ നടന്ന ഉപതെരഞ്ഞെടുപ്പുകളിൽ എൽഡിഎഫിന്‌ വിജയിക്കാനുമായി. മുനിസിപ്പൽ നിയമം അനുസരിച്ച്‌ തുക ചെലവഴിക്കണമെങ്കിൽ ക‍ൗൺസിലിന്റെ അംഗീകാരം വേണം. ഓരോ ക‍ൗൺസിൽ ചേരുമ്പോഴും ടെൻഷനാണ്‌. ബിജെപിയും കോൺഗ്രസും പിഡിപിയുമെല്ലാം ഒന്നിച്ചു നിന്നാൽ ക‍ൗൺസിൽ പരാജയപ്പെടും. ക‍ൗൺസിലിന്‌ ആദ്യ ബെല്ല്‌ കൊടുക്കുന്നതിനു മുമ്പ്‌ തന്നെ എത്രപേർ വന്നുവെന്ന്‌ നോക്കും. അങ്ങനെ അഞ്ചു വർഷവും ടെൻഷൻ നിറഞ്ഞ കാലമായിരുന്നു – ശിവൻകുട്ടി ഓർക്കുന്നു.
ആദ്യ കൂറുമാറ്റവും സസ്‌പെൻഷനും
നഗരപാലികാ നിയമം നിലവില്‍ വന്ന ശേഷമുള്ള ആദ്യ ക‍ൗൺസിലായിരുന്നു. തദ്ദേശ സ്ഥാപനങ്ങളില്‍ കൂറുമാറ്റ നിരോധന നിയമം പ്രാബല്യത്തിലായതും അക്കാലത്താണ്‌. അതനുസരിച്ച് ആദ്യമായി ഒരംഗത്തെ അയോഗ്യനാക്കുന്നത് താന്‍ മേയറായിരുന്നപ്പോഴാണ്‌. ഡെപ്യൂട്ടി മേയറായിരുന്ന സിപിഐയുടെ സതീശൻ അപ്പുറം ചാടി. തുടർന്ന്‌ അയോഗ്യനാക്കി. തുടർന്ന്‌ പ്രതിപക്ഷം അവിശ്വാസപ്രമേയം കൊണ്ടുവന്നു. ബിജെപിയും യുഡിഎഫും ഒരുമിച്ച് നിന്നു. അവിശ്വാസം പാസാകുമെന്ന്‌ എല്ലാവർക്കും ഉറപ്പായിരുന്നു. ഇന്നത്തെ പോലെ ചാനലുകൾ ഇല്ലെങ്കിലും വലിയൊരു മാധ്യമപ്പട തന്നെയുണ്ടായിരുന്നു. മേയർ പുറത്താകാൻ പോകുവാണല്ലോ. എന്നാൽ വോട്ടിങ്‌ ആയപ്പോൾ ലീഗ്‌ ക‍ൗൺസിലർമാർ വാക്ക്‌ഒ‍ൗട്ട്‌ നടത്തി. അങ്ങനെ അവിശ്വാസം പരാജയപ്പെട്ടു. കൗണ്‍സില്‍ യോഗങ്ങളില്‍ ബഹളമുണ്ടാക്കിയതിന് അന്നത്തെ പ്രതിപക്ഷ നേതാവായിരുന്ന എം എ വാഹിദ് ഉള്‍പ്പെടെ ആറ് കൗണ്‍സിലര്‍മാരെ സസ്‌പെന്‍ഡ് ചെയ്തു. ആദ്യമായായിരുന്നു മേയറുടെ ഇ‍ൗ അധികാരം പ്രയോഗിക്കപ്പെട്ടത്‌.
ഗ്രീന്‍സിറ്റി ക്ലീന്‍സിറ്റി മുതൽ പാലും മുട്ടയും വരെ
ദേശീയതലത്തിൽ തന്നെ അന്ന്‌ ചർച്ച ചെയ്യപ്പെട്ടതായിരുന്നു കോർപറേഷൻ പരിധിയിലെ എല്ലാ പൊതുവിദ്യാലയങ്ങളിലും നടപ്പാക്കിയ പാലും മുട്ടയും പദ്ധതി. എല്ലാദിവസവും വൈകിട്ട്‌ കുട്ടികൾക്ക്‌ പാലും മുട്ട പുഴുങ്ങിയതും വിതരണംചെയ്‌തു. അന്നത്തെ മുഖ്യമന്ത്രി ഇ കെ നായനാരാണ്‌ പദ്ധതി ഉദ്‌ഘാടനം ചെയ്‌തത്‌. നായനാർ ഇന്ത്യയിൽ എവിടെ പ്രസംഗിച്ചാലും ഇ‍ൗ പദ്ധതിയെക്കുറിച്ച്‌ പറയുമായിരുന്നു. ആദ്യമായി പഞ്ഞമാസത്തിൽ മത്സ്യത്തൊഴിലാളികൾക്ക് 3,000 രൂപ നൽകി. അന്ന്‌ നടപ്പിലാക്കിയ പ്രധാന പദ്ധതിയായിരുന്നു "ഗ്രീന്‍സിറ്റി ക്ലീന്‍സിറ്റി’. കേരള ചരിത്രത്തിൽ ആദ്യമായി ഒരു മാലിന്യ സംസ്‌കരണ പ്ലാന്റ്‌ വിളപ്പിൽശാലയിൽ സ്ഥാപിച്ചു. അപേക്ഷിച്ച്‌ ഒരു ദിവസംകൊണ്ട്‌ പെർമിറ്റ്‌ ലഭിക്കുന്ന പദ്ധതി നടപ്പിലാക്കി. ഇപ്പോൾ കോർപറേഷന്‌ സമീപമുള്ള കംപ്യൂട്ടർ വിദ്യാലയം ആ സമയത്ത്‌ സ്ഥാപിച്ചതാണ്‌.
പാളയത്തുള്ള ജനസേവന കേന്ദ്രം, ഇന്റർനെറ്റ്‌ സെന്റർ, പ്രദർശന വിൽപ്പന കേന്ദ്രം എന്നിവ കൊണ്ടുവന്നു. അനധികൃത കെട്ടിട നിർമാണത്തിനെതിരെ കർശന നടപടി സ്വീകരിച്ചു. കിഴക്കേകോട്ടയിൽ ഒരു ഇരുനില കെട്ടിടം തന്നെ പൊളിച്ചുനീക്കി. ശംഖുംമുഖം തെക്കേ കൊട്ടാരം രാജാവ്‌ കോർപറേഷന്‌ നൽകിയതാണ്‌. അത്‌ ഒരു സ്വകാര്യ വ്യക്തി കൈയടക്കിയിരിക്കുകയായിരുന്നു. ആ കെട്ടിടം തിരിച്ചു പിടിച്ചു. സ്റ്റാച്യു മുതൽ കിഴക്കേകോട്ട വരെയുള്ള റോഡിന്റെ വീതി കൂട്ടലും റെയിൽവേ മേൽപ്പാലവും ബൃഹത്‌ പദ്ധതിയായിരുന്നു. വികസന കാര്യങ്ങളിലെല്ലാം സഹകരിക്കുന്ന സമീപനമായിരുന്നു അന്നത്തെ പ്രതിപക്ഷത്തിന്റേതെന്നും വി ശിവൻകുട്ടി പറഞ്ഞു.
