ത്രിപുര അവരുടെ ആദ്യ പരീക്ഷണശാല
വിനോദ്‌ പായം
Published on Sep 19, 2025, 11:23 PM | 3 min read
ദേശീയതലത്തിൽ ഇന്ത്യാകൂട്ടായ്മ, ബിജെപിക്കെതിരെ ‘വോട്ട്‌ മോഷണം’ എന്ന പ്രചാരണവുമായി രംഗത്തുണ്ട്‌. ത്രിപുരയിൽ 2018ൽ അപ്രതീക്ഷിതമായാണ്‌ ബിജെപി അധികാരം പിടിച്ചത്‌. അവിടെയും വോട്ട്‌ മോഷണമാണോ നടന്നത്‌
ത്രിപുരയിൽ നടന്നത്‌ വോട്ട്‌ മോഷണമല്ല; മറിച്ച്‌ പൂർണമായ ജനാധിപത്യ അട്ടിമറിയാണ്‌. 2018ന്‌ ശേഷം അവിടെ ജനാധിപത്യരീതിയിൽ തെരഞ്ഞെടുപ്പ്‌ നടന്നിട്ടേയില്ല. നമ്മളിപ്പോൾ പറയുന്നത്‌ വോട്ട്‌ മോഷണത്തെക്കുറിച്ചാണ്‌. ത്രിപുരയിൽ പക്ഷേ, തെരഞ്ഞെടുപ്പേ നടന്നിട്ടില്ല എന്നതാണ്‌ യാഥാർഥ്യം. ജനാധിപത്യം അട്ടിമറിക്കാനുള്ള ബിജെപിയുടെ ആദ്യ പരീക്ഷണശാലയായിരുന്നു ത്രിപുര. അത്‌ വിജയിച്ചതോടെ, അത്തരം പരീക്ഷണം രാജ്യവ്യാപകമാക്കി. പക്ഷേ, ചെറിയ സംസ്ഥാനമായ ത്രിപുരയിൽ നടത്തിയതുപോലുള്ള കാര്യങ്ങൾ വലിയ സംസ്ഥാനങ്ങളിൽ സാധ്യമല്ല; പാർലമെന്റ്‌ തെരഞ്ഞെടുപ്പിലും സാധ്യമല്ല. അതുകൊണ്ടാണ്‌ വോട്ടുകൾ മോഷ്ടിച്ചും എസ്‌ഐആർപോലുള്ള കാര്യങ്ങൾ തെരഞ്ഞെടുപ്പ്‌ കമീഷൻ വഴി നടപ്പാക്കിയും വലിയ സംസ്ഥാനങ്ങളിൽ ജനാധിപത്യം അട്ടിമറിക്കുന്നത്‌. ഉടൻ നടക്കുന്ന ബിഹാർ തെരഞ്ഞെടുപ്പിലും മറ്റും അത്‌ വിജയിക്കുമോ എന്നതാണ്‌ ഇനി അറിയാനുള്ളത്‌. അവിടെയും വിജയിച്ചാൽ, രാജ്യവ്യാപകമായി അത്തരം പരീക്ഷണം അവർ തുടരും. ജനാധിപത്യരീതിയിൽ ജനങ്ങളെ സമീപിച്ചാൽ, അവർ നിരാകരിക്കുമെന്ന ഭയം ബിജെപിക്കുണ്ട്‌. എസ്‌ഐആർപോലുള്ള പരിഷ്‌കാരങ്ങൾ നടപ്പാക്കാൻ ബിജെപി തിരക്ക്‌ കൂട്ടുന്നതും അതിനാലാണ്‌. തെരഞ്ഞെടുപ്പ്‌ കമീഷനെപ്പോലുള്ള ഭരണഘടനാ സ്ഥാപനങ്ങളെപ്പോലും അവർ തങ്ങളുടെ ഇംഗിതം നടപ്പാക്കുന്ന ഉപകരണം മാത്രമാക്കി.
രണ്ടാം തവണയും ബിജെപി ഭരണം പിടിച്ചു. എന്താണ്‌ നിലവിൽ ത്രിപുരയുടെ അവസ്ഥ
വളരെ മോശം അവസ്ഥയിലൂടെയാണ്‌ ഞങ്ങളുടെ സംസ്ഥാനം കടന്നുപോകുന്നത്‌. അസംബ്ലി തെരഞ്ഞെടുപ്പിൽ സംഘപരിവാർ സ്വീകരിച്ച അതേ ജനാധിപത്യ അട്ടിമറിയാണ്‌ പാർലമെന്റ്‌, തദ്ദേശ തെരഞ്ഞെടുപ്പുകളിലും സ്വീകരിച്ചത്‌. സ്വയംഭരണ ഗിരിവർഗ മേഖലയിൽപ്പോലും ബിജെപി കടന്നുകയറി ജനാധിപത്യ സ്വഭാവം ഇല്ലാതാക്കി. പകരം അവിടെ ഗുണ്ടാരാജാണ്‌. അഴിമതിയാണ്‌ അവിടങ്ങളിൽ വിലസുന്നത്‌. പരാതിയുണ്ടെങ്കിൽ പൊലീസ്‌ സ്‌റ്റേഷനിൽ ചെന്ന്‌ പറയാൻ പറ്റില്ല. പൊലീസുകാർ പരാതിക്കാരെ ‘മൊണ്ടൽ ലീഡേഴ്‌സ്‌’ എന്ന പ്രാദേശിക പാർടി നേതൃത്വത്തിന്‌ മുന്നിലേക്കാണ്‌ പറഞ്ഞുവിടുന്നത്‌. ബിജെപിയുടെയും തിപ്രമോത്ത പാർടിയുടെയും നേതാക്കളാണ്‌ അവിടെയുള്ളത്‌. പരാതി നൽകാനുള്ള കേവല ജനാധിപത്യ അവകാശംപോലും ത്രിപുരക്കാർക്ക്‌ നഷ്ടമായി. പ്രാദേശിക ഭരണനേതൃത്വത്തിനെതിരെ ഒരു പരാതിയും കോടതിയിൽ എത്തില്ല.
ഇത്തരം ജനാധിപത്യവിരുദ്ധ നയങ്ങൾക്കെതിരായി ഏതുതരം പ്രക്ഷോഭങ്ങൾക്കാണ്‌ ഇടതുപക്ഷം നേതൃത്വം കൊടുക്കുന്നത്‌
എല്ലാസമയത്തും സമരവഴിയിലാണ്‌ ഞങ്ങൾ. സമരം ചെയ്യാനുള്ള അനുമതിയും സർക്കാർ നൽകില്ല. പ്രകടനം നടത്താൻപോലും അനുമതി നൽകില്ല. പത്ത്‌ അപേക്ഷ നൽകിയാൽ ഒന്നോ രണ്ടോ എണ്ണം മാത്രമാണ്‌ അനുവദിക്കുക. ആ സാഹചര്യത്തിൽ ഞങ്ങൾക്ക്‌ നിയമം ലംഘിച്ച്‌ രംഗത്തിറങ്ങേണ്ടി വരുന്നു. ഞങ്ങൾക്ക്‌ മറ്റു വഴികളില്ല. ഞങ്ങളുടെ നിരന്തര പോരാട്ടം ക്രമേണ ജനങ്ങൾ മനസ്സിലാക്കും എന്നുറപ്പാണ്‌. ഇത്തരം സമരങ്ങളിൽ ജനപങ്കാളിത്തം കൂടുന്നുണ്ട്‌. അതിനിയും വർധിച്ച്‌ വലിയ മുന്നേറ്റമായി തീരുമെന്നതിൽ സംശയമില്ല.
ഇടതുപക്ഷമുന്നണിയുടെ കാലത്ത്‌ ത്രിപുരയിൽ നടപ്പാക്കിയ ക്ഷേമപ്രവർത്തനങ്ങളുടെ അവസ്ഥ എന്താണിപ്പോൾ
ഇടതുമുന്നണിയുടെ കാലത്ത്‌ ത്രിപുരയിൽ നടത്തിയ എല്ലാത്തരം ക്ഷേമപ്രവർത്തനങ്ങളെയും അവർ അട്ടിമറിച്ചു. അഴിമതിയും ഗുണ്ടാരാജും മാത്രമാണ്‌ ഫലപ്രദമായി നടക്കുന്നത്‌. ഞങ്ങളുടെ കാലത്ത്‌ 100 തൊഴിൽദിനംവരെ മഹാത്മാഗാന്ധി തൊഴിലുറപ്പ്‌ പദ്ധതിയിൽ നൽകിയിരുന്നു. ഇപ്പോഴത്‌ 30– 32 ദിനംവരെ കിട്ടിയാലായി. 2018ലെ തെരഞ്ഞെടുപ്പിൽ 350 രൂപ കൂലിയാക്കുമെന്നാണ്‌ ബിജെപി പ്രഖ്യാപിച്ചത്‌. ഇപ്പോഴും 300 രൂപയിൽ കുറവാണ്‌. ഡബിൾ എൻജിൻ നടപ്പാകുന്നില്ലെന്ന കാര്യം ഇപ്പോൾ എല്ലാ ത്രിപുരക്കാർക്കും ബോധ്യമുണ്ട്‌.
എന്താണ്‌ ത്രിപുരയിൽ ഇടതുപക്ഷത്തിന്റെ ഭാവി
അഴിമതി, തൊഴിലില്ലായ്‌മ, വികസനമുരടിപ്പ്‌, ആരോഗ്യ, വിദ്യാഭ്യാസ മേഖലയിലെ പ്രശ്‌നങ്ങൾ എന്നിവ ഉയർത്തിക്കാട്ടി ഞങ്ങൾ നിരന്തര പോരാട്ട പാതയിലാണ്‌. തെരഞ്ഞെടുപ്പ്‌ വരും; പോകും. അതിലെ വിജയം രണ്ടാമത്തെ കാര്യമാണ്‌. ഇടതുപക്ഷ രാഷ്ട്രീയം ഉയർത്തിപ്പിടിച്ച്‌ മുന്നാട്ടു പോകുക എന്നതാണ്‌ പ്രധാനം. അതിന്‌ ഫലം കാണുന്നുണ്ട്‌. യഥാർഥ ജനാധിപത്യ പോരാട്ടം നടന്നാൽ, ഞങ്ങൾക്ക്‌ സാധ്യതയുണ്ട്‌ എന്നതുതന്നെയാണ്‌ പറയാനുള്ളത്‌. യഥാർഥത്തിൽ 2023ലെ തെരഞ്ഞെടുപ്പിൽ ഇടതുപക്ഷം മുന്നിലേക്ക്‌ വന്നതാണ്‌. ആ സമയത്താണ്‌ ഗിരിവർഗ മേഖലയിൽ ബിജെപിയുടെ അജൻഡയിൽ തിപ്രമോത്ത പാർടി (ടിഎംപി) ഉദയം കൊള്ളുന്നത്‌. ആ മേഖലയിൽ വോട്ട്‌ ഭിന്നിപ്പിച്ച്‌, ഇടതുപക്ഷത്തെ ഇല്ലാതാക്കാനുള്ള ശ്രമമായിരുന്നു. അത്‌ തൽക്കാലം വിജയിച്ചു. തിപ്രമോത്ത ഇപ്പോൾ ബിജെപിയുടെ പ്രധാന സഖ്യകക്ഷിയുമായി.
കേരളത്തിലെ ഇടതുപക്ഷമുന്നേറ്റത്തെ എങ്ങനെയാണ്‌ കാണുന്നത്‌
കേരളത്തിലെ ജനാഭിമുഖ്യ ഇടതുപക്ഷനയങ്ങൾ ദേശീയതലത്തിൽത്തന്നെ ബദൽ മുന്നേറ്റമാണ്‌. എല്ലാ മേഖലയിലും കേരളം ദേശീയനിലവാരത്തിന്‌ എത്രയോ മുകളിലാണ്‌. അതുതന്നെയാണ്‌ ഇടതുപക്ഷത്തിന്റെ ബദൽനയങ്ങൾ. ആരോഗ്യ വിദ്യാഭ്യാസ, അടിസ്ഥാനവർഗ മേഖലയിലെ ബദൽനയങ്ങൾ കേന്ദ്രത്തെ അസ്വസ്ഥമാക്കുന്നുണ്ട്‌. കേന്ദ്രത്തിൽനിന്ന്‌ നൽകേണ്ട സഹായം ഇല്ലാതാക്കി, ശ്വാസം മുട്ടിക്കാനുള്ള ശ്രമം അതുകൊണ്ടാണ്‌. യഥാർഥത്തിൽ കേരളത്തിലെ ജനങ്ങൾ ഇതെല്ലാം മനസ്സിലാക്കുന്നുണ്ട്‌. അത്തരത്തിലുള്ള ഉയർന്ന പ്രബുദ്ധത മലയാളിക്കുണ്ട്‌. കേരളം മുന്നോട്ടുവയ്‌ക്കുന്ന ബദൽ ദേശീയനയങ്ങളെ ജനങ്ങൾതന്നെ തുടർന്നും സംരക്ഷിക്കുമെന്നത്‌ ഉറപ്പാണ്‌.
