നമ്മുടെ സർക്കാർ തുടരും
വിനോദ്‌ പായം
Published on May 13, 2025, 11:25 PM | 3 min read
വമ്പൻ പദ്ധതികളും അടിസ്ഥാന ജനവിഭാഗങ്ങളെ കൈവിടാതുള്ള ക്ഷേമപദ്ധതികളും ഒരുപോലെ കൊണ്ടുപോകുന്നതിനാലാണ്‌ കേരളത്തിലെ ഇടതുപക്ഷ ജനാധിപത്യമുന്നണി സർക്കാരിനെ നമ്മുടെ സർക്കാർ എന്നുതന്നെ എഴുത്തുകാരൻ എം മുകുന്ദൻ അടിവരയിട്ട്‌ പറയുന്നത്‌. ഈ സർക്കാർ തുടരുമെന്ന പൊതുബോധംതന്നെയാണ്‌ എം മുകുന്ദനും പങ്കിടുന്നത്‌. അതിനെ നിലനിർത്താനും തുടരാനുമുള്ള പ്രചാരണവും നടത്തണമെന്ന ഉത്തമ ബോധ്യവും ദേശാഭിമാനിക്ക്‌ അനുവദിച്ച അഭിമുഖത്തിൽ അദ്ദേഹം പങ്കിടുന്നു. തയ്യാറാക്കിയത്‌ കണ്ണൂർ ബ്യൂറോ ചീഫ്‌ വിനോദ്‌ പായം
വമ്പൻ വികസനങ്ങൾ ദൃശ്യമാണ്‌ കേരളത്തിൽ. മലയാളിയുടെ വികസനക്കാഴ്‌ചപ്പാടുകൾ മാറുന്നുണ്ടോ
വികസനം എന്നത്‌ മുമ്പ്‌ നെഗറ്റീവായ ഒരു വാക്കായിരുന്നു. മലയാളി സമൂഹം അതിനെ അങ്ങനെ സ്വീകരിച്ചിരുന്നില്ല. ഈ ഇടതുപക്ഷ സർക്കാരിന്റെ കാലത്ത്‌ അതെല്ലാം മാറി. വികസനമെന്ന്‌ നമ്മൾ പറയുമ്പോൾ ഉദ്ദേശിക്കുന്നത്‌ പുരോഗതി എന്നാണ്‌. വികസനമെന്ന വാക്കിനോടുള്ള അലർജി ഇപ്പോഴില്ല. പ്രത്യേക വികസനം എന്നതു മാത്രമല്ല; നമ്മുടെ എല്ലാ മേഖലയിലും വികസനം പ്രകടമാണ്‌. വിദ്യാഭ്യാസം, ആരോഗ്യം, വ്യവസായം എന്നീ മേഖലകളിലെല്ലാം വലിയ മാറ്റങ്ങളുണ്ടായി. അതിൽ ഏറ്റവും പ്രധാനം അടിസ്ഥാന സൗകര്യ വികസനമാണ്‌. അടുത്ത കാലംവരെ അത്‌ ഏറെ മോശപ്പെട്ട അവസ്ഥയായിരുന്നു. എല്ലായിടത്തും അടിസ്ഥാന സൗകര്യങ്ങളുടെ അഭാവമുണ്ടായിരുന്നു. ഇന്നതില്ല; കേരളത്തിൽ എവിടെ ചെന്ന്‌ നോക്കിയാലും ഉന്നത നിലവാരത്തിലുള്ള റോഡും പാലവും കാണാനാകും. അടിസ്ഥാന സൗകര്യ വികസനത്തിന്റെ മാതൃകകളെന്ന്‌ പറയാവുന്നത്‌ നമ്മുടെ വിഴിഞ്ഞവും ദേശീയപാത വികസനവുമാണ്‌. ഇതുരണ്ടും വന്നതോടെ നമ്മൾ ആധുനിക സമൂഹമായി മാറി. ലോകത്ത്‌ ഏത്‌ വികസിത രാജ്യത്ത്‌ ചെന്ന്‌ കാണുന്നതുപോലുള്ള കാഴ്‌ചകളാണ്‌ നമ്മൾ ഇവിടെയും കാണുന്നത്‌.
സർക്കാർ ഓഫീസുകളിലുണ്ടായ മാറ്റവും എടുത്തു പറയണം. പണ്ട്‌ സർക്കാർ ഓഫീസുകളെന്നു പറയുന്നത്‌ പീടിക മുറിക്ക്‌ സമാനമാണ്‌. ഇപ്പോൾ പഞ്ചായത്ത്‌ ഓഫീസിൽ കയറിയാൽ നമുക്ക്‌ അഭിമാനമാണ്‌. സ്‌മാർട്ട്‌ ഓഫീസുകളാണെങ്ങും. സാങ്കേതികവിദ്യ ഉപയോഗിച്ച്‌, സർട്ടിഫിക്കറ്റുകൾ എളുപ്പത്തിൽ കിട്ടുന്ന അവസ്ഥയായി. സർക്കാർ സേവനങ്ങൾ പൊതുജനങ്ങൾക്ക്‌ വളരെ എളുപ്പമായി. പഴയ ചുവപ്പുനാട ഇപ്പോഴില്ല. ഓൺലൈനായതിനാൽ സാധാരണക്കാർക്ക്‌ സർക്കാർ ഓഫീസുകളിൽ കയറിയിറങ്ങേണ്ടതില്ല. ഇത്തരത്തിൽ ഭരണനടപടികൾ എല്ലാം സുതാര്യമായത്‌ വലിയ മാറ്റമാണ്‌.
പൊതുവെ സമാധാനത്തിന്റെ ഒരന്തരീക്ഷം കേരളത്തിൽ അടുത്ത കാലത്തുണ്ട്‌. പഴയതുപോലുള്ള കൊലപാതകവും രക്തച്ചൊരിച്ചിലുകളുമില്ല. കുറച്ചുകൂടി സന്തോഷത്തോടെ സ്വതന്ത്രരായി ജീവിക്കാവുന്ന സാഹചര്യം ഇന്നുണ്ട്‌. ഇത്തരം പ്രവർത്തനങ്ങൾ തുടരണം എന്നൊരു പ്രചോദനം സമൂഹത്തിന്‌ പൊതുവായുണ്ട്‌.
ഈ സർക്കാർ തുടരും എന്നൊരു പൊതുബോധം സൃഷ്ടിക്കപ്പെട്ടിട്ടുണ്ടോ
എൽഡിഎഫ്‌ സർക്കാരിന്‌ അനുകൂലമായ പൊതുബോധം സമൂഹത്തിലുണ്ട്‌. വേറൊരു സർക്കാരിനും ഇതുപോലെ പ്രവർത്തിക്കാൻ കഴിയില്ലെന്നും ബോധ്യമുണ്ട്‌. ഒരുപാട്‌ പ്രതികൂല സാഹചര്യങ്ങൾ മറികടന്നാണ്‌ നാം ഈ നേട്ടമുണ്ടാക്കിയത്‌. ഈ സർക്കാർ വന്നപ്പോഴാണ്‌ നിപാ, പ്രളയം, കോവിഡ്‌ തുടങ്ങിയ വലിയ പ്രതിസന്ധികൾ ഉണ്ടായത്‌. അതിനെയെല്ലാം മറികടന്നാണ്‌ നാം ഇത്രയും നേട്ടം കൈവരിച്ചത്‌. ജനങ്ങൾ ഇക്കാര്യം എത്രത്തോളം മനസ്സിലാക്കുന്നുണ്ടെന്ന്‌ എനിക്കറിയില്ല. സർക്കാർ കൊണ്ടുവന്ന മാറ്റങ്ങൾ എല്ലാവരിലും എത്തിക്കാനുള്ള വഴികൾ നമ്മൾ തേടണം.
ക്ഷേമപെൻഷൻപോലെ അടിസ്ഥാന ജനവിഭാഗത്തിന്‌ ഏറെ ആശ്രയമായ നിരവധി ക്ഷേമപദ്ധതികൾ എണ്ണിയെണ്ണി പറയാനുള്ളവ ഈ സർക്കാർ നടപ്പാക്കി. വിതരണം ചെയ്‌ത പെൻഷന്റെ കണക്ക്‌ വിവരിച്ചാൽ ചിലപ്പോൾ സാധാരണക്കാർ മനസ്സിലാക്കിക്കൊള്ളണമെന്നില്ല. അതേസമയം പ്രകടമായ മാറ്റങ്ങൾ അവർ പെട്ടെന്ന്‌ ഉൾക്കൊള്ളും.
സർക്കാർ നടപടികളിൽ പോരായ്‌മകളുണ്ടോ. പ്രകടമായി തോന്നിയത്‌ എന്താണ്‌
മുഖ്യമന്ത്രിയുമായി കഴിഞ്ഞയാഴ്‌ച കണ്ണൂരിൽ നടത്തിയ മുഖാമുഖം പരിപാടിയിൽ ഞാൻ ഉന്നയിച്ച ഒരു വിഷയമുണ്ട്‌. വമ്പൻകാര്യങ്ങളിൽ നമ്മൾ ശ്രദ്ധിക്കുമ്പോൾ ചെറിയ ചെറിയ കാര്യങ്ങളിൽ നമ്മുടെ അശ്രദ്ധയുണ്ട്‌. അതിൽ പ്രധാനപ്പെട്ട ഒന്നാണ് തെരുവുനായ ശല്യം. അതിനെ നിയന്ത്രിക്കാൻ കാര്യമായ ശ്രദ്ധ പതിപ്പിക്കണം. ടൂറിസമാണ്‌ കേരളത്തിന്റെ മുഖ്യഭാവി. കശ്‌മീരിലെ പുതിയ സംഭവങ്ങളുടെ പശ്‌ചാത്തലത്തിൽ പ്രത്യേകിച്ചും. വിദേശ വിനോദസഞ്ചാരികൾ വരാൻ കൊതിക്കുന്ന പ്രധാന ഇടമാണ്‌ കേരളം. ജപ്പാനിലെ ഫ്രഞ്ച്‌ അംബാസഡർ കേരളം കാണാൻ വരുന്നുണ്ടെന്ന്‌ രണ്ടുദിസവം മുമ്പ്‌ എന്നോട്‌ സൂചിപ്പിച്ചിട്ടുണ്ട്‌. വിദേശികൾ വരുമ്പോൾ അവർക്ക്‌ ഒരുതരത്തിലുള്ള ബുദ്ധിമുട്ടുമുണ്ടാകരുത്‌. എല്ലാതരത്തിലുമുള്ള സുരക്ഷിതത്വവും നൽകണം. തെരുവിൽ അലയുന്ന നായകളുടെ കാഴ്‌ച അവർക്ക്‌ അരോചകമാകും.
ഇതോടൊപ്പം റോഡിൽ കാർക്കിച്ച്‌ തുപ്പുക, പൊതുസ്ഥലത്ത്‌ മൂത്രമൊഴിക്കുക, റോഡിൽ വാഹനങ്ങൾ ഓടിക്കുമ്പോഴുള്ള അച്ചടക്കമില്ലായ്‌മ തുടങ്ങിയ നമ്മുടെ ഇമേജുകളും മാറ്റണം. വിദേശികൾക്ക്‌ ഇത്തരം കാഴ്‌ചകൾ പ്രാകൃതമാണ്‌. അവർക്കത്‌ ഷോക്കാണ്‌. ഒരാധുനിക സമൂഹത്തിൽ ഇത്തരം കാഴ്‌ചകൾ കാണില്ല. ഇതിനുള്ള പരിഹാരം ജനങ്ങളെ ബോധവൽക്കരിച്ചും കർശന നടപടിയെടുത്തും മറ്റും സർക്കാർ ചെയ്യേണ്ടതുണ്ട്‌. അങ്ങനെയല്ലാതെ നാം സിംഗപ്പുർപോലെയോ ദുബായ് പോലെയോ ഉള്ള വികസിത നാടാകില്ല. ഇതേസമയം, വളരെ ശ്രദ്ധയോടെ കൈകാര്യം ചെയ്യേണ്ട ഒന്നാണ് ടൂറിസം. കാരണം ടൂറിസം വികസിക്കുമ്പോൾ അതിന്റെ കൂടെ മയക്കുമരുന്ന്, ബാലലൈംഗികത തുടങ്ങിയ വിപത്തുകൾ കൂടി കടന്നുവരാനിടയുണ്ട്.
സർക്കാരിനെതിരെ സമരങ്ങൾ ഉണ്ടാകുന്നുണ്ടല്ലോ
സമരം ചെയ്‌തുണ്ടായ സർക്കാരാണിത്‌. ആര്‌ എന്തിനായി സമരം ചെയ്‌താലും അത്‌ കേൾക്കണമെന്നാണ്‌ എന്റെ അഭിപ്രായം. ഇപ്പോൾ ആശ സമരത്തിലൊക്കെ, എനിക്ക്‌ അവരോട് അനുഭാവം ഉണ്ടായിരുന്നു. പക്ഷേ, പിന്നീടത്‌ സംസ്ഥാന സർക്കാർവിരുദ്ധ സമരം മാത്രമായി. അതായിരുന്നു അതിന്റെ കുഴപ്പം. അതിജീവനസമരം എന്നതിനപ്പുറം കേവലം സർക്കാർവിരുദ്ധ സമരം മാത്രമായതിനാൽ, അതിനുള്ള ശ്രദ്ധയും ജനപിന്തുണയും നഷ്ടപ്പെട്ടു.
പുതിയ കാലത്ത്‌ ഇടതുപക്ഷ സർക്കാരിന്‌ ഭരണത്തിൽ ഏതുതരം മാതൃകയാണ്‌ മുന്നിലുണ്ടാകേണ്ടത്‌
കേരളത്തെ മറ്റൊരു വികസിത ഭൂപ്രദേശമായിത്തന്നെയാണ്‌ വിദേശത്തുള്ളവർ കാണുന്നത്‌. ഇക്കാര്യത്തിൽ നമുക്ക്‌ മാതൃകയാക്കാവുന്ന രാജ്യം വിയറ്റ്‌നാമാണ്‌. അമേരിക്ക ബോംബിട്ട്‌ തകർത്തുകളഞ്ഞ രാജ്യമാണത്‌. ആ തകർച്ചയിൽനിന്ന്‌ ഭയങ്കരമായി അവർ വികസിച്ചുവന്നു. അവർ കൈവരിച്ച പുരോഗതി അത്ഭുതകരമാണ്‌. ഇവിടെ എൽഡിഎഫ്‌ സർക്കാർ ചെയ്‌തതുപോലെ ചില നയമാറ്റങ്ങൾ കൊണ്ടുവന്നതിനാൽ, അവിടെ വിനോദ സഞ്ചാരികളുടെ ഒഴുക്കാണ്‌. വിയറ്റ്‌നാം നമുക്ക്‌ ഏതുരീതിയിലും മാതൃകയാക്കാവുന്ന രാജ്യമാണെന്നാണ്‌ എന്റെ അഭിപ്രായം. കമ്യൂണിസമുള്ള, നെൽക്കൃഷിയുള്ള, നമ്മളെപ്പോലെ ചോറു തിന്നുന്ന... നമുക്ക്‌ അവരുമായി ഒരുപാട്‌ സാദൃശ്യമുണ്ട്‌. ഹോചിമിന്റെ ചിത്രമാണ്‌ നമ്മൾ ഇവിടെ പ്രദർശിപ്പിക്കേണ്ടത്‌. അമേരിക്കയിൽ പോയി ഒരു ഷർട്ട്‌ വാങ്ങി നോക്കിയാൽ അതിൽ ‘മെയ്‌ഡ്‌ ഇൻ വിയറ്റ്‌നാം’ എന്നുകാണാം. അതാണ്‌ അവിടെയുണ്ടായ മാറ്റം.
