ഒപ്പമുണ്ട്‌ നമ്മുടെ മേയർ
ബിജോ ടോമി
Published on Nov 16, 2025, 10:38 AM | 3 min read
രാജ്യത്തെ ഏറ്റവും പ്രായം കുറഞ്ഞ മേയർ എന്ന പദവി ആലങ്കാരികതയ്‌ക്കയ്‌പ്പുറം യുവജനങ്ങളെ കൂടുതൽ വിശ്വാസത്തിലെടുക്കുന്നതിന്‌ വഴികാട്ടിയായി. അഞ്ചുവർഷത്തിനിടെ തലസ്ഥാനത്ത്‌ നടപ്പാക്കിയ വികസന ക്ഷേമപ്രവർത്തനങ്ങൾ രാജ്യത്തിനുതന്നെ മാതൃക തീർത്തു. പ്രവർത്തനത്തിനുള്ള അംഗീകാരമായി അന്താരാഷ്‌ട്രതലത്തിലടക്കം ഒരുപിടി പുരസ്‌കാരങ്ങൾ. തദ്ദേശതെരഞ്ഞെടുപ്പിലേക്ക്‌ കടന്നപ്പോൾ കോർപറേഷനിലെ മുഴുവൻ ഇടതുപക്ഷ സ്ഥാനാർഥികളുടെയും പ്രചാരണത്തിന്‌ ഒപ്പമെത്തി പിന്തുണയും വിജയാശംസകളും നേരാനുള്ള തിരക്കിലാണ്‌ മേയർ ആര്യ രാജേന്ദ്രൻ. അഞ്ചു വർഷത്തെ പ്രവർത്തനങ്ങളെക്കുറിച്ച്‌ ആര്യ രാജേന്ദ്രൻ സംസാരിക്കുന്നു.
• ആദ്യ മത്സരത്തിൽ പ്രായം കുറഞ്ഞ സ്ഥാനാർഥിയെന്ന അനുഭവം എന്തായിരുന്നു ?
മത്സരിക്കുമ്പോൾ എല്ലാ സ്ഥാനാർഥികളെയുംപോലെ ആകാംക്ഷ ഉണ്ടായിരുന്നു. വാർഡിലെ മുൻ എൽഡിഎഫ്‌ ക‍ൗൺസിലർമാരുടെ വികസന പ്രവർത്തനങ്ങൾ ചർച്ച ചെയ്‌താണ്‌ സ്ഥാനാർഥിത്വത്തിലേക്ക്‌ കടന്നത്‌. പ്രഖ്യാപനം വന്നപ്പോൾ കോർപറേഷനിലെ ഏറ്റവും പ്രായം കുറഞ്ഞ സ്ഥാനാർഥിയായിരുന്നു. വലിയ സ്വീകാര്യതയാണ്‌ ലഭിച്ചത്‌. വോട്ട്‌ ചോദിച്ച്‌ എത്തിയപ്പോൾ വളരെ സ്‌നേഹത്തോടെ വീട്ടിലെ ഒരു അംഗത്തെപ്പോലെയാണ്‌ കണക്കാക്കിയത്‌. ആ സ്‌നേഹം എല്ലാകാലത്തും ആളുകൾ നിലനിർത്തി.
• ഈ ഭരണസമിതിയുടെ കാലത്തെ പ്രധാന നേട്ടങ്ങള്‍ ?
കേരളത്തിനും രാജ്യത്തിനും മാതൃകയാകുന്ന നിലയിലേക്ക്‌ തിരുവനന്തപുരം കോർപറേഷന്‌ എത്തിച്ചേരാൻ കഴിഞ്ഞു എന്നത്‌ ഭരണസമിതിയുടെ കൂട്ടായ പ്രവർത്തനത്തിന്റെ ഭാഗമായി സാധ്യമായതാണ്‌. സ്വപ്ന പദ്ധതിയായ ഗ്രീൻ ട്രിവാൻഡ്രം വിജയകരമായി മുന്നേറുന്നു. ഗ്രീൻ ബജറ്റ്‌ അവതരിപ്പിച്ച കേരളത്തിലെ ആദ്യത്തെ നഗരമാണ്‌ തിരുവനന്തപുരം. 2040 ഓടെ സീറോ കാർബൺ എന്ന ലക്ഷ്യത്തിലേക്ക്‌ നമ്മൾ എത്തിച്ചേരും. കെഎസ്‌ആർടിസിക്ക്‌ 115 ഇലക്‌ട്രിക്‌ ബസുകൾ വാങ്ങി നൽകി. 1.1 ലക്ഷം തെരുവുവിളക്കുകൾ എൽഇഡിയാക്കി.100 ഇലക്‌ട്രിക്‌ ഓട്ടോ സ‍ൗജന്യമായി വിതരണം ചെയ്‌തു. അഞ്ചുവർഷംകൊണ്ട്‌ 3000 കോടിയുടെ വികസന പ്രവർത്തനമാണ്‌ അടിസ്ഥാന സ‍ൗകര്യ മേഖലയിൽ നടപ്പാക്കിയത്‌.
ലൈഫിൽ ഉൾപ്പെടെ 13,037 വീടും 772 ഫ്ലാറ്റും നിർമിച്ചു. 700 വീടുകളുടെ നിർമാണം ആരംഭിക്കുന്നതിനുള്ള നടപടി അന്തിമ ഘട്ടത്തിലാണ്‌. 10,839 പൈപ്പ്‌ കണക്‌ഷൻ സ‍ൗജന്യമായി നൽകി. നഗരത്തിലെ 49 റോഡ്‌ 23 കിലോമീറ്റർ സ്‌മാർട്ട്‌ റോഡുകളായി ഉയർത്തി. കേരളത്തിലെ ഏറ്റവും വലിയ സീവേജ്‌ ട്രീറ്റ്‌മെന്റ്‌ പ്ലാന്റ്‌ മുട്ടത്തറയിൽ നിർമിച്ചു. വിവിധ ഇടങ്ങളിലായി 1000 സിസിടിവി സ്ഥാപിച്ചു. കോർപറേഷന്റെ കീഴിലുള്ള എല്ലാ സ്‌കൂളുകളിലും അത്യാധുനിക കെട്ടിടങ്ങൾ നിർമിച്ചു. 219 സ്‌മാർട്ട്‌ ക്ലാസുമുറി പൂർത്തിയായി. പ്രതിമാസം 13 ലക്ഷം കിലോ ജൈവ, അജൈവ മാലിന്യം ശേഖരിച്ച്‌ ശാസ്‌ത്രീയമായി സംസ്‌കരിക്കുന്നു. എല്ലാ ആരോഗ്യസ്ഥാപനങ്ങളുടെയും അടിസ്ഥാന സ‍ൗകര്യ വികസനത്തിന്‌ പദ്ധതികൾ രൂപപ്പെടുത്തി. അയ്യൻകാളി തൊഴിലുറപ്പ്‌ പദ്ധതിയിൽ 6,80, 500 തൊഴിൽ ദിനങ്ങൾ സൃഷ്‌ടിച്ചു.
• ആരോപണങ്ങളില്‍ വളരെ പക്വതയോടെയായിരുന്നു ഇടപെടൽ. അതിന് സഹായിച്ച ഘടകം?
സിപിഐ എം വലിയ ഉത്തരവാദിത്വമാണ്‌ ഏൽപ്പിച്ചത്‌. എല്ലാവരുടെയും പിന്തുണയുണ്ടായി. പ്രശ്നങ്ങൾ ഉണ്ടാകുമ്പോൾ പ്രയാസപ്പെടുകയോ തളരുകയോ ഇല്ലെന്ന്‌ സ്വയം ഉണ്ടാക്കിയെടുത്ത ബോധ്യമാണ്‌. ‘നാടിന്റെ വികസനവും ജനങ്ങളുടെ ക്ഷേമവും ആണ്‌ വലുത്‌’ എന്നാണ്‌ പാർടി എല്ലാ ഘട്ടത്തിലും പറഞ്ഞിട്ടുള്ളത്‌. മറ്റൊന്ന്‌ ജനങ്ങളുടെ പിന്തുണയാണ്‌. നാലു ഉപതെരഞ്ഞെടുപ്പുകൾ നടന്നപ്പോഴും നട്ടാൽ കുരുക്കാത്ത എല്ലാ നുണകളുമായാണ്‌ പ്രതിപക്ഷം പ്രചാരണം നടത്തിയത്‌. എന്നാൽ ജനങ്ങൾ അതിനെല്ലാം വോട്ടിലൂടെ കൃത്യമായ മറുപടി നൽകി. ജനങ്ങളെ വിശ്വാസത്തിലെടുത്തും അവർക്കൊപ്പം നിന്നുമാണ്‌ പ്രതിസന്ധികളെ തരണം ചെയ്യാനുള്ള കരുത്ത്‌ ആർജിച്ചത്‌.
• ഇ‍ൗ തെരഞ്ഞെടുപ്പിൽ മത്സരിക്കാത്തത്‌ പ്രതിപക്ഷം വിവാദമാക്കാൻ ശ്രമിക്കുന്നതിനെക്കുറിച്ച്‌ ?
തിരുവനന്തപുരം കോർപറേഷൻ ചരിത്രത്തിൽ ഉൾപ്പെടെ മേയർമാർ എല്ലാവരും തുടർന്ന്‌ മത്സരിച്ചവരല്ല. എല്ലാ കാലത്തും ജനപ്രതിനിധിയായി ഇരിക്കാം എന്നതാകരുത്‌ ഒരു ഇടതുപക്ഷപ്രവർത്തകനെ സംബന്ധിച്ച്‌ പ്രധാനം. പദവിയും അധികാരങ്ങളും മാത്രമല്ല ജനങ്ങളുടെ വിഷയത്തിൽ ഇടപെടാനുള്ള മാർഗം. ഇ‍ൗ പ്രചാരണത്തിനെല്ലാം നേതൃത്വം നൽകുന്നത്‌ ബിജെപിയുടെയും കോൺഗ്രസിന്റെയും സമുന്നതരായ നേതാക്കളാണ്‌. തെരഞ്ഞെടുപ്പിൽ മത്സരിച്ചാൽ മാത്രമേ നിലനിൽപ്പുള്ളൂ എന്ന്‌ കരുതുന്നവരാണ്‌ ഇതൊരു രാഷ്ട്രീയ പ്രശ്‌നമായി കാണുന്നത്‌. ഇടതുപക്ഷത്തെയും സിപിഐ എമ്മിനെയും സംബന്ധിച്ച്‌ ഓരോ തെരഞ്ഞെടുപ്പിലും ജനകീയ വിഷയങ്ങൾ ഏറ്റെടുക്കുക എന്നതാണ്‌ പ്രധാനം. കഴിഞ്ഞ കാലങ്ങളിൽ നടത്തിയ വികസന ജനക്ഷേമപ്രവർത്തനങ്ങൾ മാത്രം പറഞ്ഞാണ്‌ ഞങ്ങൾ 101 വാർഡിലും ജനങ്ങളെ അഭിമുഖീകരിക്കുന്നത്‌.
മാധ്യമപ്രവർത്തകരും കാണിക്കേണ്ട മര്യാദയുണ്ട്‌. വ്യക്‌തിപരമായ കാര്യങ്ങൾ നൽകുമ്പോൾ അഭിപ്രായം ചോദിക്കണം. മനോരമ സ്വീകരിച്ച നിലപാട്‌ അതല്ല. തിരുവനന്തപുരം ഞാൻ ജനിച്ചു വളർന്ന എന്റെ സ്ഥലമാണ്‌. തിരുവനന്തപുരത്തുനിന്ന്‌ മാറിനിന്നുകൊണ്ട്‌ സംഘടനാപ്രവർത്തനം നടത്താൻ കഴിയുമോ എന്നുള്ളത്‌ ചിന്തിക്കാൻ കഴിയാത്തതാണ്‌. തെരഞ്ഞെടുപ്പ്‌ സമയത്ത്‌ ഒരു വിവാദം സൃഷ്‌ടിക്കാനാണ്‌ ശ്രമം. അവർ ഇത്‌ അവസാനിപ്പിച്ച്‌ പിന്നോട്ട്‌ പോകുന്നതാണ്‌ നല്ലത്‌.
ബിജെപിയുടെ ക‍ൗൺസിലർ തിരുമല അനിലിന്റെ മരണംപോലെ, അവരുടെ സംഘടനാ പ്രശ്നങ്ങൾ കാരണം തൃക്കണ്ണാപുരത്ത്‌ മറ്റൊരു പ്രവർത്തകൻകൂടി ജീവനൊടുക്കിയിരിക്കുകയാണ്. എന്റെ രാഷ്ട്രീയ ഭാവിയെപ്പറ്റി ആശങ്കപ്പെടുന്ന മറ്റു രാഷ്ട്രീയ പാർടികളുടെ സംസ്ഥാന അധ്യക്ഷൻ ഉൾപ്പെടെയുള്ള നേതാക്കൾ തങ്ങളുടെ പാർടിയിലെ സാധാരണക്കാരായ പ്രവർത്തകരുടെ വികാരം മനസ്സിലാക്കി പെരുമാറിയിരുന്നുവെങ്കിൽ ഇങ്ങനെയുള്ള സംഭവങ്ങൾ ഒഴിവാക്കാമായിരുന്നു.
