കല്യാണിയോട് 'നോ' പറഞ്ഞ് ദുൽഖർ! വൈറലായി കേരള പൊലീസിന്റെ റോഡ് സുരക്ഷാ സന്ദേശം

തിരുവനന്തപുരം: റോഡ് സുരക്ഷാ ബോധവൽക്കരണത്തിനായി വ്യത്യസ്തമായ വഴികൾ തേടാറുള്ള കേരള പൊലീസ് ഇത്തവണ കൂട്ടുപിടിച്ചിരിക്കുന്നത് 'വരനെ ആവശ്യമുണ്ട്' എന്ന ചിത്രത്തിലെ ഹിറ്റ് രംഗം. ഹെൽമറ്റ് ധരിക്കാൻ മടിക്കുന്നവർക്ക് ശക്തമായ മുന്നറിയിപ്പുമായി എത്തിയിരിക്കുന്ന ഈ വീഡിയോ സോഷ്യൽ മീഡിയയിൽ വൈറലായിരിക്കുകയാണ്. ദുൽഖർ സൽമാൻ കമെന്റ് ചെയ്യുവോ? എന്ന ക്യാപ്ഷനോടെയാണ് വീഡിയോ പങ്കുവെച്ചിരിക്കുന്നത്.

ബൈക്ക് യാത്രയ്ക്ക് മുൻപ് ഹെയർസ്റ്റൈൽ മോശമാകുമെന്ന് കരുതി ഹെൽമറ്റ് വെക്കാൻ മടിക്കുന്ന കല്യാണി പ്രിയദർശന്റെ കഥാപാത്രവും, എന്നാൽ ഹെൽമറ്റ് ഇല്ലാതെ വണ്ടി എടുക്കില്ലെന്ന് കടുപ്പിച്ചു പറയുന്ന ദുൽഖർ സൽമാന്റെ കഥാപാത്രവുമാണ് വീഡിയോയിലുള്ളത്. പുറംമോഡിയേക്കാൾ പ്രാധാന്യം ജീവനാണെന്ന സന്ദേശമാണ് ഈ രംഗത്തിലൂടെ കേരള പൊലീസ് ജനങ്ങളിലേക്ക് എത്തിക്കുന്നത്.

കേരള പൊലീസിന്റെ ഔദ്യോഗിക പേജുകളിൽ പങ്കുവെച്ച ഈ വീഡിയോ നിമിഷങ്ങൾക്കുള്ളിലാണ് വൈറലായത്. ഈ വീഡിയോ ശ്രദ്ധയിൽപ്പെട്ടാൽ ദുൽഖർ സൽമാൻ തന്നെ നേരിട്ട് കമന്റുമായി എത്തുമോ എന്ന പ്രതീക്ഷയിലാണ് ഇപ്പോൾ ആരാധകർ. പലരും ദുൽഖറിനെ ടാ​ഗ് ചെയ്യുന്നുമുണ്ട്.