ഓർഡർ ചെയ്ത പാലും ബ്ര‍ഡും നായകൾക്ക് നൽക്കാൻ നിർദേശം; കൈയടി നേടി ഡെലിവറി ബോയ്‍യും യുവതിയും

ലഖ്‌നൗ: രാപ്പകൽ വ്യത്യാസമില്ലാതെ നഗരത്തിലെ തിരക്കേറിയ വീഥികളിലൂടെയും ഇടവഴികളിലൂടെയും ഓടി നടന്ന് സാധനങ്ങൾ എത്തിച്ചുനൽകുന്നവരാണ് ഡെലിവറി റൈഡർമാർ. പലതരത്തിലുള്ള ആളുകളെയും സാഹചര്യങ്ങളെയും തങ്ങളുടെ ജോലിത്തിരക്കിനിടയിൽ ഇവർക്ക് നേരിടേണ്ടി വരാറുണ്ട്. എന്നാൽ ലഖ്‌നൗവിലെ ഒരു ഡെലിവറി ബോയിക്ക് കഴിഞ്ഞ ദിവസം നേരിടേണ്ടി വന്നത് തികച്ചും അപ്രതീക്ഷിതവും ഹൃദയസ്പർശിയുമായ ഒരു അനുഭവമായിരുന്നു.

ലഖ്‌നൗ ആസ്ഥാനമായുള്ള വ്ലോഗറും ഡെലിവറി റൈഡറുമായ രോഹിത് തന്റെ 'രോഹിത് വ്ലോഗ്‌സ്റ്റർ' എന്ന ഇൻസ്റ്റാഗ്രാം അക്കൗണ്ടിലൂടെയാണ് ഈ വേറിട്ട സംഭവം പങ്കുവെച്ചത്. പാലും ബ്രഡും അടങ്ങുന്ന ഒരു ഓർഡറുമായി നിശ്ചിത വിലാസത്തിൽ എത്തിയ രോഹിത്, സാധനങ്ങൾ എവിടെയാണ് വയ്ക്കേണ്ടത് എന്ന് ചോദിക്കാനായി ഉപഭോക്താവിനെ ഫോണിൽ വിളിച്ചു. എന്നാൽ ഫോൺ എടുത്ത യുവതി ആവശ്യപ്പെട്ടത് ചുറ്റുവട്ടത്ത് തെരുവ് നായ്ക്കൾ ഇരിക്കുന്നുണ്ടോ എന്ന് നോക്കാനായിരുന്നു. അവർ അവിടെയുണ്ടെന്ന് കണ്ടതോടെ, ആ പാലും ബ്രഡും അവർക്ക് നൽകാൻ യുവതി രോഹിത്തിനോട് അഭ്യർത്ഥിച്ചു.

സാധനങ്ങൾ വാങ്ങാൻ എന്തുകൊണ്ടാണ് അവർ നേരിട്ട് വരാത്തതെന്ന് ആദ്യം രോഹിത് അത്ഭുതപ്പെട്ടെങ്കിലും, ഒരു വിവാഹ ചടങ്ങിൽ പങ്കെടുക്കാൻ പോകേണ്ടി വന്നതിനാൽ കൃത്യസമയത്ത് അവിടെ എത്താൻ സാധിച്ചില്ലെന്ന് അവർ വ്യക്തമാക്കി. നായ്ക്കൾക്ക് ഭക്ഷണം നൽകാനായി അവിടെ പാത്രങ്ങൾ വെച്ചിട്ടുണ്ടെന്നും അവർ അറിയിച്ചു. എന്നാൽ പാത്രങ്ങൾ കണ്ടെത്താൻ കഴിയാതിരുന്നപ്പോൾ, ആ പാക്കറ്റുകൾ പൊട്ടിച്ച് തന്നെ ഭക്ഷണം നൽകാൻ അവർ നിർദ്ദേശിച്ചു. സാധിക്കുമെങ്കിൽ അവയെ സ്വയം ഊട്ടണമെന്നും അവർ സ്നേഹപൂർവ്വം ആവശ്യപ്പെട്ടു.

യുവതിയുടെ നിർദ്ദേശപ്രകാരം രോഹിത് ആ പാക്കറ്റുകൾ തുറക്കുകയും ഓടിക്കൂടിയ നായ്ക്കൾക്ക് പാലും ബ്രഡും നൽകുകയും ചെയ്തു. തെരുവ് നായ്ക്കൾക്ക് വേണ്ടിയാണ് ആ യുവതി ഈ ഓർഡർ നൽകിയതെന്ന് രോഹിത് വീഡിയോയിലൂടെ പ്രേക്ഷകർക്ക് വിശദീകരിച്ചു നൽകുന്നുണ്ട്. ഈ ദൃശ്യങ്ങൾ വളരെ വേഗത്തിലാണ് സോഷ്യൽ മീഡിയയിൽ തരംഗമായത്.

നിരവധി ആളുകളാണ് വീഡിയോയ്ക്ക് താഴെ പ്രതികരണങ്ങളുമായി എത്തിയത്. "ഞാനും ഇതുപോലെ ചെയ്യാറുണ്ട്" എന്ന് ഒരാൾ കുറിച്ചപ്പോൾ, റൈഡറുടെയും ഓർഡർ നൽകിയ യുവതിയുടെയും മനസ്സുനന്മയെ അഭിനന്ദിച്ചുകൊണ്ട് നിരവധി കമന്റുകൾ വന്നു. പാക്കറ്റിൽ തന്നെ പാലും ബ്രഡും കുഴച്ചു നൽകിയിരുന്നെങ്കിൽ അവർക്ക് കുറച്ചുകൂടി എളുപ്പത്തിൽ കഴിക്കാമായിരുന്നു എന്ന ഉപദേശത്തോടൊപ്പം തന്നെ, ഇങ്ങനെയൊരു പ്രവർത്തിക്ക് തയ്യാറായ രോഹിത്തിന് അഭിനന്ദന പ്രവാഹമാണ് ലഭിക്കുന്നത്. മനുഷ്യത്വത്തിന്റെ ചെറിയ അടയാളങ്ങൾ എങ്ങനെ ഒരു സാധാരണ ദിവസത്തെ സവിശേഷമാക്കുന്നു എന്നതിന്റെ മികച്ച ഉദാഹരണമായി മാറുകയാണ് സംഭവം.