ആഘോഷങ്ങളുടെ പകിട്ടിനിടയിൽ മറന്നുപോകുന്ന ചില മനുഷ്യരുണ്ട്! കുറിപ്പുമായി എ എ റഹിം

തിരുവനന്തപുരം: യെലഹങ്ക കൊഗിലുവിൽ കർണാടക കോൺഗ്രസ്‌ സർക്കാരിന്റെ ബുൾഡോസർ രാജിൽ വഴിയാധാരമായ കുടുംബങ്ങൾക്ക് നീതി ലഭിക്കണമെന്ന് ഡിവൈഎഫ്ഐ അഖിലേന്ത്യാ പ്രസിഡന്റ് എ എ റഹിം എംപി. ആഘോഷങ്ങളുടെ പകിട്ടിനിടയിൽ മറന്നുപോകുന്ന ചില മനുഷ്യരുണ്ട്, അടച്ചുപിടിച്ച ഭരണകൂടത്തിന്റെ കാതുകൾ തുറക്കാൻ, ഈ നിശബ്ദരായ മനുഷ്യർക്ക് വേണ്ടി നമ്മൾ ശബ്ദമുയർത്തിയേ തീരൂവെന്ന് അദ്ദേഹം ഫെയ്സ്ബുക്കിൽ കുറിച്ചു.

ഫെയ്സ്ബുക്ക് കുറിപ്പ്

നീതിയുടെ സൂര്യനുദിക്കേണ്ട റിപ്പബ്ലിക് ദിനത്തിൽ നീതിക്കായി കാത്തിരിക്കുകയാണ് ആ പാവങ്ങൾ..നമ്മൾ ഇന്ന് അവർക്കായി സംസാരിക്കണമെന്ന് അവർ ആഗ്രഹിക്കുന്നു. ഇന്ന് ജനുവരി 26. ലോകത്തിലെ ഏറ്റവും വലിയ ജനാധിപത്യ രാജ്യമായ നമ്മുടെ ഇന്ത്യ അതിന്റെ 77-ാം റിപ്പബ്ലിക് ദിനം ആഘോഷിക്കുകയാണ്. ഡൽഹിയിലെ കർത്തവ്യപഥിൽ നമ്മുടെ രാജ്യം അതിന്റെ സൈനിക കരുത്തും സാംസ്കാരിക വൈവിധ്യവും ലോകത്തിന് മുന്നിൽ അഭിമാനപൂർവ്വം പ്രദർശിപ്പിക്കുന്ന ദിവസം. ബഹുമാനപ്പെട്ട രാഷ്ട്രപതിയുടെ കൈകളാൽ ത്രിവർണ്ണ പതാക വാനോളമുയരുമ്പോൾ ഓരോ ഇന്ത്യക്കാരന്റെയും ഉള്ളിൽ അഭിമാനത്തിന്റെ തിരയിളക്കമുണ്ടാകും.

​എന്നാൽ ആഘോഷങ്ങളുടെ പകിട്ടിനിടയിൽ മറന്നുപോകുന്ന ചില മനുഷ്യരുണ്ട്! രാജ്യതലസ്ഥാനത്തുനിന്ന് ഏതാണ്ട് 2100 കിലോമീറ്റർ അകലെ ബംഗളുരുവിൽ ഹൃദയഭേദകമായ മറ്റൊരു കാഴ്ചയുണ്ട്. ​അധികാരത്തിന്റെ ബുൾഡോസറുകൾ ഇടിച്ചുനിരത്തിയ മൺകൂനകൾക്ക് മുകളിൽ, നഷ്ടപ്പെട്ട ജീവിതത്തിന്റെ കഷണങ്ങൾ പെറുക്കിക്കൂട്ടി കാത്തിരിക്കുന്ന നിസ്സഹായരായിപ്പോയ ഒരു കൂട്ടം മനുഷ്യർ! പാർശ്വവൽക്കരിക്കപ്പെട്ടവർ... അവർക്ക് സ്വന്തമായുണ്ടായിരുന്ന ഏക സമ്പാദ്യം അവരുടെ തലചായ്ക്കാനുള്ള ആ ഇടമായിരുന്നു. നീതിയുടെ സൂര്യനുദിക്കേണ്ട റിപ്പബ്ലിക് ദിനത്തിലും ഭരണകൂടത്തിന്റെ കനിവിനായി കാത്തിരിക്കുകയാണ് ആ പാവങ്ങൾ. അവർക്ക് വേണ്ടി വിശ്രമമില്ലാതെ പോരാടുന്ന 'സംഗമ' എന്ന സന്നദ്ധ സംഘടനയുടെ പോരാട്ടങ്ങൾക്കൊപ്പം ഞാനും ചേരുകയാണ്. അടച്ചുപിടിച്ച ഭരണകൂടത്തിന്റെ കാതുകൾ തുറക്കാൻ, ഈ നിശബ്ദരായ മനുഷ്യർക്ക് വേണ്ടി നമ്മൾ ശബ്ദമുയർത്തിയേ തീരൂ. ഈ മനുഷ്യർക്ക് നിരുപാധിക പിന്തുണ പ്രഖ്യാപിച്ചുകൊണ്ട് സോഷ്യൽ മീഡിയയിൽ നടക്കുന്ന ഹാഷ്‌ടാഗ് ക്യാമ്പയിന്റെ ഭാഗമാവുകയാണ് ഞാനും. നിങ്ങളും ഈ പോരാട്ടത്തിൽ പങ്കുചേരാൻ അഭ്യർത്ഥിക്കുന്നു.

​

#kogilukoogu​ ഈ ഹാഷ്‌ടാഗ് ഉപയോഗിച്ച് നിങ്ങളുടെ പ്രൊഫൈലുകളിലും ഈ വിഷയം പങ്കുവെക്കൂ. നിസ്സഹായരായ മനുഷ്യർക്ക് നീതി ലഭിക്കും വരെ നമുക്ക് പോരാട്ടം തുടരാം... ഏവർക്കും ഹൃദയം നിറഞ്ഞ റിപ്പബ്ലിക് ദിനാശംസകൾ. #kogilukoogu