ഗ്രാമിയിൽ നിന്ന് പിന്മാറി ബിടിഎസ്; സംഗീതത്തെ ഭാഷയുടെ പേരിൽ വേർതിരിക്കുന്നതിൽ പ്രതിഷേധം

ലോസ് ഏഞ്ചൽസ് : ഗ്രാമി അവാർഡിൽ നിന്ന് പിന്മാറിയതായി ദക്ഷിണ കൊറിയൻ മ്യൂസിക് ബാൻഡ് ആയ ബിടിഎസ് ​അറിയിച്ചു. ​​ലോകമെമ്പാടും കോടിക്കണക്കിന് ആരാധകരുള്ള ബാൻഡ് ആണ് ബിടിഎസ്. ഗ്രാമിയിൽ ബെസ്റ്റ് ഏഷ്യൻ പോപ് മ്യൂസിക് പെർഫോമൻസ് എന്ന പേരിൽ പുതിയ കാറ്റ​ഗറി ഉൾപ്പെടുത്തിയതിൽ പ്രതിഷേധിച്ചാണ് പിന്മാറ്റം.

സം​ഗീതത്തെ പ്രാദേശികമായും ഭാഷാപരമായും വേർതിരിക്കുന്ന നടപടിയാണിതെന്ന് ബിടിഎസ് ആരോപിച്ചു. ഇതോടെ പുതിയ ആൽബം 'അരിരം​ഗ്' പുരസ്കാരത്തിനായി സമർപ്പിക്കുന്നില്ലെന്നും ബിടിഎസ് അറിയിച്ചു. ബിടിഎസിന്റെ ഏഴ് അം​ഗങ്ങളും ഇൻസ്റ്റാ​ഗ്രാമിലൂടെ പോസ്റ്റ് പങ്കവെച്ചിട്ടുണ്ട്.

സൈനിക സേവനത്തിന് ശേഷം തിരിച്ചെത്തിയ ബിടിഎസിലെ മുഴുവൻ അം​ഗങ്ങളും ചേർന്ന് പുറത്തിറക്കിയ 'അരിരം​ഗ്' ആൽബം ലോകമാകെ ഹിറ്റ് ആയിരുന്നു. ​ഗ്രാമിയിൽ ആൽബം ഓഫ് ദി ഇയർ പുരസ്കാരം നേടാൻ സാധ്യതയുള്ള ആൽബമായിരുന്നു 'അരിരം​ഗ്'. എന്നാൽ കൊറിയൻ ബാൻഡിനെ മറ്റു താരങ്ങൾക്കൊപ്പം പരി​ഗണിക്കാതെ പ്രത്യേക കാറ്റ​ഗറിയിൽ മാറ്റിനിർത്തനാണ് ശ്രമിക്കുന്നതിെന്ന് ആരാധകരും വിമർശകരും ചൂണ്ടിക്കാണിക്കുന്നു.

അതേസമയം ഏഷ്യൻ സം​ഗീതത്തിന്റെ വളർച്ചയെയും വൈവിധ്യത്തെയും ആഘോഷിക്കുന്നതിനാണ് പുതിയ കാറ്റ​ഗറി ഉൾപ്പെടുത്തിയതെന്നാണ് ​ഗ്രാമിയുടെ വിശദീകരണം. മറ്റു പ്രധാന കാറ്റ​ഗറികളിൽ മത്സരിക്കുന്നതിൽ ഇത് ഏഷ്യൻ താരങ്ങൾക്ക് തടസമാവില്ലെന്നും ​ഗ്രാമി സിഇഒ ഹാർവി മേസൺ ജൂനിയർ അറിയിച്ചു.

​ഗ്രാമിയിൽ പ്രധാന വിഭാ​ഗങ്ങളിൽ നോമിനേഷൻ ലഭിച്ച ആദ്യ കൊറിയൻ പോപ് ബാൻഡ് ആണ് ബിടിഎസ്. അഞ്ച് തവണ ബിടിഎസിന് ​ഗ്രാമി നോമിനേഷൻ ലഭിച്ചിട്ടുണ്ട്. ​ഗ്രാമി വേദിയിൽ പരിപാടികൾ അവരിപ്പിച്ചിട്ടുണ്ടെങ്കിലും ഇതുവരെ ബിടിഎസിന് പുരസ്കാരം ലഭിച്ചിട്ടില്ല.