ധനുഷും കൃതി സനോണും ഒന്നിക്കുന്ന തേരെ ഇഷ്ഖ് മേ; കൃതിയുടെ ഫസ്റ്റ് ലുക്ക് ടീസർ പുറത്ത്

മുംബൈ: തെന്നിന്ത്യൻ സെൻസേഷൻ ധനുഷും ബോളിവുഡ് താരം കൃതി സനോണും ഒന്നിക്കുന്ന തേരെ ഇഷ്ഖ് മേയു‌ടെ ടീസർ വീഡിയോ പുറത്ത്. കൃതി സനോണിന്റെ ഫസ്റ്റ് ലുക്ക് ടീസറാണ് അണിയറപ്രവർത്തകർ പുറത്തുവിട്ടത്. പ്രശസ്ത സംവിധായകൻ ആനന്ദ് എൽ റായിയാണ് സംവിധാനം. ഹിറ്റ് ചിത്രമായ രാഞ്ജന, അത്‍രം​ഗി രേ എന്നീ ചിത്രങ്ങളിൽ ധനുഷും ആനന്ദ് എൽ റായിയും ഒരുമിച്ച് പ്രവർത്തിച്ചിരുന്നു.

കൃതി സനോണിന്റെ അതിതീവ്രമായിട്ടുള്ള കഥാപാത്രത്തിന്റെ ഫസ്റ്റ് ലുക്കാണ് ടീസറിൽ കാണിക്കുന്നത്. കയ്യിൽ മണ്ണെണ്ണ കുപ്പിയുമായി നടന്ന് കലാപം നടക്കുന്നതിനിടയിലൂടെ കടന്നുപോകുന്നത് വീഡിയോയിൽ കാണാം.ശക്തമായ പശ്ചാത്തലത്തിൽ ഹിന്ദിയിൽ കൃതിയുടെ ഡയലോ​ഗും കേൾക്കാം.

പ്രേക്ഷകരെ ആകാംക്ഷയുടെ മുൾമുനയിൽ നിർത്തുംവിധം കൃതിയു‌ടെ കഥാപാത്രമായ മുക്തി കയ്യിൽ കരുതിയിരുന്ന മണ്ണെണ്ണയൊഴിച്ച് സി​ഗരറ്റ് കത്തിക്കുന്നിടത്താണ് വീഡിയോ അവസാനിക്കുന്നത്.

കഴിഞ്ഞ ദിവസം സമാനമായ രീതിയിൽ ധനുഷിന്റെ ഫസ്റ്റ് ലുക്ക് ടീസറും അണിയറപ്രവർത്തകർ പുറത്തുവിട്ടിരുന്നു. പശ്ചാത്തലത്തിൽ ശക്തമായ ഡയലോ​ഗും സ്ക്രീനിൽ കലാപത്തിനിടയിലൂ‌ടെ ന‌ടക്കുന്ന ധനുഷിനെയുമാണ് ടീസറിൽ കാണാനാവുന്നത്.