ഡോൺ 3ൽ നിന്ന് പിന്മാറി: റൺവീറിനോട് 40 കോടി നഷ്ടപരിഹാരം ആവശ്യപ്പെട്ട് നിർമാതാക്കൾ

മുംബൈ: ബോളിവുഡ് സിനിമാലോകത്തെ ഞെട്ടിച്ച്, ഏറെ പ്രതീക്ഷയോടെ കാത്തിരുന്ന 'ഡോൺ 3' എന്ന ചിത്രത്തിൽ നിന്നും നടൻ രൺവീർ സിങ് പിന്മാറി. ഫർഹാൻ അക്തറിന്റെ എക്സൽ എന്റർടൈൻമെന്റ് നിർമിക്കുന്ന ഈ ചിത്രത്തിന്റെ പ്രീ-പ്രൊഡക്ഷൻ ജോലികൾ അവസാനഘട്ടത്തിൽ എത്തിനിൽക്കെയാണ് നടന്റെ ഈ അപ്രതീക്ഷിത തീരുമാനം. രൺവീറിന്റെ പിന്മാറ്റം മൂലം തങ്ങൾക്കുണ്ടായ സാമ്പത്തിക നഷ്ടം നികത്താൻ 40 കോടി രൂപ താരം നഷ്ടപരിഹാരമായി നൽകണമെന്ന് നിർമാതാക്കൾ ആവശ്യപ്പെട്ടതായാണ് പുറത്തുവരുന്ന റിപ്പോർട്ടുകൾ.

തിരക്കഥാ വികസനം, ലൊക്കേഷൻ ആസൂത്രണം, ഷെഡ്യൂളിംഗ് തുടങ്ങി വലിയൊരു തുക ഇതിനകം തന്നെ പ്രൊഡക്ഷൻ ഹൗസ് ഈ ചിത്രത്തിനായി ചെലവഴിച്ചിട്ടുണ്ട്. 2026 ജനുവരിയിൽ ചിത്രീകരണം ആരംഭിക്കാൻ നിശ്ചയിച്ചിരുന്ന പ്രോജക്റ്റിൽ നിന്നുള്ള നടന്റെ പിന്മാറ്റം നിർമാണ പ്രവർത്തനങ്ങളെയും ഷെഡ്യൂളിംഗിനെയും കാര്യമായി ബാധിച്ചു. 2023-ൽ ഷാരൂഖ് ഖാന് ശേഷം ഡോൺ ഫ്രാഞ്ചൈസിയുടെ പുതിയ മുഖമായി രൺവീർ സിങ്ങിനെ പ്രഖ്യാപിച്ചത് വലിയ വാർത്തയായിരുന്നു. എന്നാൽ ഇപ്പോൾ താരം പിന്മാറിയതോടെ ചിത്രത്തിന്റെ ഭാവി അനിശ്ചിതത്വത്തിലായിരിക്കുകയാണ്.

നിലവിൽ ഈ വിഷയത്തിൽ രൺവീർ സിങ്ങോ എക്സൽ എന്റർടൈൻമെന്റോ ഔദ്യോഗിക പ്രതികരണങ്ങൾ നടത്തിയിട്ടില്ല. തന്റെ വരാനിരിക്കുന്ന ചിത്രമായ 'ധുരന്ദർ 2'-ന്റെ തിരക്കുകളിലാണ് രൺവീർ ഇപ്പോൾ. ആദിത്യ ധർ സംവിധാനം ചെയ്യുന്ന ഈ ബിഗ് ബജറ്റ് ചിത്രം മാർച്ച് 19-ന് തിയേറ്ററുകളിൽ എത്തും. സഞ്ജയ് ദത്ത്, അർജുൻ രാംപാൽ തുടങ്ങിയ വമ്പൻ താരനിര അണിനിരക്കുന്ന ഈ ചിത്രത്തിലാണ് താരത്തിന്റെ മുഴുവൻ ശ്രദ്ധയും.