'ഈ മ യൗ' മെയ് നാലിന്

അങ്കമാലി ഡയറീസിന് ശേഷം ലിജോ ജോസ് പെല്ലിശേരി സംവിധാനംചെയ്യുന്ന ചിത്രം 'ഈ മ യൗ' മെയ് നാലിന് റിലിസ് ചെയ്യും. സംവിധായകൻ ആഷിഖ് അബുവിന്റെ വിതരണ കമ്പനിയാണ് സിനിമ തിയറ്ററുകളിലെത്തിക്കുന്നത്. 'സന്തോഷത്തോടെയും അഭിമാനത്തോടെയും ലിജോയുടെ 'ഈ മ യൗ' ഞങ്ങൾ ഏറ്റടുക്കുന്ന വിവരം അറിയിക്കട്ടെ. അടുത്തമാസം നാലിന് ചിത്രം നിങ്ങളിലേക്കെത്തും' അഷിഖ് ഫെയ്‌സ്ബുക്കിൽ കുറിച്ചു. ഈശോ മറിയം യൗസേപ്പ് എന്നതിന്റെ ചുരുക്കമാണ് ഈ മ യൗ. നേരത്തേ രണ്ട് തവണ റിലീസ് തീയതി പ്രഖ്യാപിച്ചിരുന്നെങ്കിലും മാറ്റിവയ്ക്കുകയായിരുന്നു. വിനായകൻ, ചെമ്പൻ വിനോദ് ജോസ്, ദിലീഷ് പോത്തൻ എന്നിവരാണ് പ്രധാന കഥാപാത്രങ്ങളെ അവതരിപ്പിക്കുന്നത്.രാജേഷ് ജോർജ് കുളങ്ങരയാണ് നിർമാണം.പി എഫ് മാത്യൂസിന്റേതാണ് തിരക്കഥ.ഷൈജു ഖാലിദാണ് ഛായാഗ്രഹണം. സംഗീതം പ്രശാന്ത്പിള്ള.