വിവാഹമോചനം നേടിയത് ജീവിതത്തിലെ ഏറ്റവും നല്ല കാര്യമെന്ന് ജെന്നിഫർ ലോപ്പസ്

ഗായിക ഹോളിവുഡ് താരം, നിര്‍മ്മാതാവ് എന്നീ നിലകളില്‍ പ്രശസ്തയായ ജെന്നിഫര്‍ ലോപ്പസ് ബെന്‍ ആഫ്ലെക്കുമായുള്ള വിവാഹമോചനത്തെക്കുറിച്ച് തുറന്നുപറഞ്ഞു. പീപ്പിള്‍ മാസികയ്ക്കു നല്‍കിയ അഭിമുഖത്തിലാണ് ആദ്യമായി പരസ്യ പ്രതികരണം നടത്തുന്നത്.

“അത് എനിക്ക് സംഭവിച്ച ഏറ്റവും നല്ല കാര്യം തന്നെയാണ്. വിവാഹ ബന്ധം വേർപെടുത്തിയത് എന്നെ മാറ്റിമറിച്ചു. എനിക്ക് ആവശ്യമായ രീതിയില്‍ വളരാന്‍ സഹായിച്ചു,” എന്ന് ലോപ്പസ് പറഞ്ഞു.

ലോപ്പസിന്റെ പുതിയ സിനിമയായ Kiss of the Spider Woman-ന്‍റെ എക്സിക്യൂട്ടീവ് പ്രൊഡ്യൂസറാണ് ആഫ്ലെക്ക്. ഈ ചിത്രം 2025 ജനുവരിയില്‍ സണ്‍ഡാന്‍സ് ഫിലിം ഫെസ്റ്റിവലില്‍ പ്രീമിയര്‍ ചെയ്യപ്പെട്ടു. അതേ മാസത്തിലാണ് ഇരുവരുടെയും വിവാഹമോചനം അന്തിമമായത്.

ചിത്രീകരണകാലത്തെ അനുഭവങ്ങള്‍ ഓര്‍മ്മിപ്പിച്ചുകൊണ്ട് ലോപ്പസ് പറഞ്ഞു: “സെറ്റില്‍ ആയിരിക്കുമ്പോള്‍ എനിക്ക് വളരെ സന്തോഷമുണ്ടായിരുന്നു. പക്ഷേ വീട്ടില്‍ കാര്യങ്ങള്‍ നല്ലതായിരുന്നില്ല. ആ വിരോധാഭാസം എങ്ങനെ കൈകാര്യം ചെയ്യണം എന്ന ചോദ്യവുമായി ജീവിക്കേണ്ടിവന്നു.”

2002-ല്‍ ലോപ്പസും ആഫ്ലെക്കും ആദ്യമായി കണ്ടുമുട്ടി. ഗിഗ്ലി എന്ന സിനിമയുടെ സെറ്റിൽ വെച്ചായിരുന്നു ഇത്. കണ്ടുമുട്ടിയതിന് ശേഷം ഡേറ്റിങ് തുടർന്ന ഇരുവരും തമ്മിൽ വിവാഹ നിശ്ചയം വരെ എത്തി. എങ്കിലും 2004-ല്‍ ബന്ധം അവസാനിച്ചു. തുടര്‍ന്ന് ഇരുവരും വ്യത്യസ്തമായ പ്രണയ ബന്ധങ്ങളില്‍ പ്രവേശിക്കുകയും കുഞ്ഞുങ്ങൾ ഉൾപ്പെടെ കുടുംബജീവിതം നയിക്കുകയും ചെയ്തു.

2021-ല്‍ ആണ് പഴയ പ്രണയം വീണ്ടും ഉണര്‍ന്നത്. അപ്പോഴേക്കും പഴയ പ്രണയ ജോഡികൾ രണ്ടു പേരും വിവാഹ മോചിതരായിരുന്നു. അങ്ങിനെ 2022-ല്‍ ലാസ് വെഗാസില്‍ ലളിതമായ ചടങ്ങില്‍ വിവാഹം കഴിച്ചു. ഒരു മാസം കഴിഞ്ഞ് ജോര്‍ജിയയില്‍ വലിയ ആഘോഷവിവാഹവും നടന്നു. ഇതും അധിക കാലം നീണ്ടില്ല 2024-ല്‍ ലോപ്പസ് വിവാഹമോചനക്കുറിപ്പു നല്‍കി. ഇതേ കുറിച്ചാണ് അവർ ആദ്യമായി പരസ്യ പ്രതികരണം നടത്തിയിരിക്കുന്നത്.

അമേരിക്കൻ നടനും ചലച്ചിത്ര നിർമ്മാതാവുമാണ് ബെൻ ആഫ്ലെക്. രണ്ട് അക്കാദമി അവാർഡുകൾ, രണ്ട് ബാഫ്റ്റ അവാർഡുകൾ, മൂന്ന് ഗോൾഡൻ ഗ്ലോബ് എന്നിവ അദ്ദേഹത്തിന്റെ അംഗീകാരങ്ങളിൽ ഉൾപ്പെടുന്നു. അമേരിക്കയിൽ ഏറ്റവും കൂടുതൽ സ്വാധീനം ചെലുത്തിയ ഹിസ്പാനിക് കലാകാരിയായ ജെന്നിഫർ ലോപസിന്റെ എട്ട് കോടി ആൽബങ്ങൾ ലോകമെമ്പാടുമായി വിറ്റഴിച്ചിട്ടുണ്ട്.

മുമ്പത്തെ ബന്ധങ്ങളില്‍നിന്നുള്ള കുട്ടികളോടൊപ്പമാണ് ഇരുവരും ജീവിക്കുന്നത്. ജെന്നിഫർ ലോപ്പസ് 2004 മുതൽ 2014 വരെ മാർക്ക് ആന്റണിയെ വിവാഹം കഴിച്ചു, മാക്സ്, എമ്മ എന്നീ ഇരട്ടകളുടെ മാതാപിതാക്കളാണ് അവർ. അതേസമയം, നടൻ 2005 മുതൽ 2018 വരെ ജെന്നിഫർ ഗാർണറെ വിവാഹം കഴിച്ചു, അവർക്ക് വയലറ്റ്, സെറാഫിന, സാമുവൽ എന്നീ മൂന്ന് കുട്ടികളുണ്ട്. 56-കാരിയാണ് നടിയും ഗായികയമായ ജെന്നിഫർ ലോപ്പസ്. 53-കാരനാണ് അഫ്ലെക്ക്.

വിവാഹമോചനത്തിന് ശേഷം ലോപ്പസ് തന്റെ കരിയറിലാണ് മുഴുവന്‍ ശ്രദ്ധ കേന്ദ്രീകരിക്കുന്നത്. Kiss of the Spider Woman കഴിഞ്ഞ വര്‍ഷം ന്യൂയോര്‍ക്കില്‍ ചിത്രീകരിച്ചു. ഇപ്പോള്‍ അവള്‍ സിനിമയുടെ പ്രമോഷനിലാണ്. അടുത്തിടെ പുറത്തിറങ്ങാൻ പോകുന്ന സംഗീത ആൽബങ്ങളും ആരാധകര്‍ക്കായി കാത്തുവെച്ചിരിക്കുന്നു.

2000 ഫെബ്രുവരിയിൽ, ലോപ്പസും അന്നത്തെ കാമുകൻ ഷോൺ കോംബ്സും ഗ്രാമി അവാർഡിൽ പങ്കെടുത്തു. അന്ന് ലോപ്പസ് ഒരു പച്ച വെർസേസ് സിൽക്ക് ഷിഫോൺ വസ്ത്രം ധരിച്ചിരുന്നു. അന്നുവരെയുള്ള ഗൂഗിളിന്റെ ചരിത്രത്തിലെ ഏറ്റവും അധികം ആളുകൾ തെരഞ്ഞ ചിത്രമായി മാറി. അഭിനയത്തിലും പാട്ടിലും ഒരു പോലെ ആരാധകരുടെ അംഗീകാരത്തിലേക്ക് തിരിച്ച് വന്നിരിക്കയാണ് അവർ.

Kiss of the Spider Woman, ഡിയഗോ ലൂനയും ടൊനാറ്റിയുഹും നായകനായെത്തുന്ന ഈ ചിത്രം, 1976-ല്‍ പുറത്തിറങ്ങിയ മാനുവല്‍ പ്യൂഗ് നോവലിന്റെ ബ്രോഡ്വേ ക്ലാസിക് ആസ്പദമാക്കിയതാണ്. ചിത്രം ഒക്ടോബര്‍ 10-ന് ലോകമെമ്പാടും റിലീസ് ചെയ്യപ്പെടും.