ഗീതു മോഹൻദാസ് ഇൻ ആക്ഷൻ: ബിഹൈൻഡ് ദി സീൻസ് ദൃശ്യങ്ങളുമായി 'ടോക്സിക്' ടീമിന്റെ ജന്മദിനാശംസകൾ

ബം​ഗളൂരു: സംവിധായിക ഗീതു മോഹൻദാസിന്റെ ജന്മദിനത്തോടനുബന്ധിച്ച് 'ടോക്സിക്' സിനിമയുടെ ഷൂട്ടിംഗ് സെറ്റിൽ നിന്നുള്ള ബിടിഎസ് വീഡിയോ പുറത്തുവിട്ട് അണിയറപ്രവർത്തകർ. സെറ്റിൽ ഗീതുവിന്റെ നേതൃപാടവവും സർഗ്ഗാത്മകമായ കഴിവുകളും വ്യക്തമാക്കുന്നതാണ് ഈ വീഡിയോ. വലിയ ആക്ഷൻ രംഗങ്ങൾ നിയന്ത്രിച്ചും, അഭിനേതാക്കൾക്ക് കൃത്യമായ നിർദ്ദേശങ്ങൾ നൽകിയും വലിയ ഷൂട്ടിംഗ് സംഘത്തെ അതീവ ആത്മവിശ്വാസത്തോടെ ഗീതു നയിക്കുന്നത് ഇതിൽ കാണാം. "വ്യത്യസ്തമായ അനുഭവം സമ്മാനിച്ച ഓരോ ഷോട്ടിനും പിന്നിൽ അവരുണ്ടായിരുന്നു" എന്ന സന്ദേശത്തോടെയാണ് ചിത്രത്തിന്റെ അണിയറപ്രവർത്തകർ ഈ ജന്മദിന വീഡിയോ പങ്കുവെച്ചിരിക്കുന്നത്.

ഇന്ത്യൻ സിനിമയിലെ തന്നെ ഏറ്റവും വലിയ ബ്രഹ്മാണ്ഡ ചിത്രങ്ങളിൽ ഒന്നായ 'ടോക്സിക്' എത്രത്തോളം വലിയ കാൻവാസിലാണ് ഒരുങ്ങുന്നത് എന്ന് ഈ വീഡിയോയിലൂടെ വ്യക്തമാകുന്നുണ്ട്. ഇത്രയും വലിയൊരു അന്താരാഷ്ട്ര പ്രൊജക്റ്റ് നിയന്ത്രിക്കാൻ മുന്നോട്ട് വന്നിട്ടുള്ള ഇന്ത്യയിലെ വളരെ ചുരുക്കം വനിതാ സംവിധായികമാരിൽ ഒരാളാണ് ഗീതു മോഹൻദാസ്. വിപുലമായ സെറ്റുകളും സങ്കീർണ്ണമായ ആക്ഷൻ രംഗങ്ങളും കൈകാര്യം ചെയ്യുമ്പോൾ തന്നെ, സിനിമയുടെ ഓരോ വശങ്ങളിലും തന്റെ സർഗ്ഗാത്മകമായ കാഴ്ചപ്പാട് നിലനിർത്താൻ അവർക്ക് സാധിക്കുന്നുണ്ടെന്ന് ഈ ദൃശ്യങ്ങൾ തെളിയിക്കുന്നു.

'ടോക്സിക്: എ ഫെയറിടെയിൽ ഫോർ ഗ്രോൺ അപ്സ്' എന്ന് പേരിട്ടിരിക്കുന്ന ഈ ചിത്രത്തിൽ കന്നഡ സൂപ്പർതാരം യഷിനൊപ്പം നയൻതാര, കിയാര അദ്വാനി, ഹുമ ഖുറേഷി, രുക്മിണി വസന്ത്, താര സുതാരിയ എന്നിവർ പ്രധാന വേഷങ്ങളിൽ എത്തുന്നു. കെവിഎൻ പ്രൊഡക്ഷൻസും മോൺസ്റ്റർ മൈൻഡ് ക്രിയേഷൻസും ചേർന്ന് നിർമ്മിക്കുന്ന ഈ ചിത്രം അതിന്റെ വലിയ നിർമ്മാണ ശൈലി കൊണ്ട് ഇതിനകം തന്നെ വാർത്തകളിൽ ഇടംപിടിച്ചിട്ടുണ്ട്. ഇന്ത്യൻ സിനിമാ ലോകം ഏറ്റവും ആകാംഷയോടെ കാത്തിരിക്കുന്ന ഈ ചിത്രം ഉടൻ തന്നെ ലോകമെമ്പാടുമുള്ള തിയേറ്ററുകളിൽ റിലീസ് ചെയ്യും.