അടുത്ത 100 ജന്മത്തിലും രജനിയായിത്തന്നെ ജനിക്കണം, സിനിമയും അഭിനയവും അത്രക്ക് ഇഷ്ടം; ഐഎഫ്എഫ്ഐയിൽ സ്റ്റൈൽ മന്നൻ

പനാജി: 'സിനിമയിൽ അഭിനയിച്ച ഈ 50 വർഷവും 10 -15 വർഷം പോലെയാണ് തോന്നിയത്. സിനിമയും അഭിനയവും അത്രക്ക് ഇഷ്ടമാണ്. അടുത്ത 100 ജന്മത്തിലും ഒരു നടനായി, രജനികാന്ത് ആയി തന്നെ ജനിക്കാനാണ് ആഗ്രഹം' - സൂപ്പർതാരം രജനികാന്ത് പറഞ്ഞ് നിർത്തിയതോടെ നിലയ്ക്കാത്ത കൈയ്യടി ആരംഭിച്ചു.

ഗോവയിൽ നടന്ന 56-ാമത് ഇന്ത്യൻ അന്താരാഷ്ട്ര ചലച്ചിത്രമേളയുടെ സമാപന ചടങ്ങിലാണ് സ്റ്റൈൽ മന്നന്റെ വൈകാരിക മുഹൂർത്തം അരങ്ങേറിയത്. ചലച്ചിത്രമേഖലയിൽ 50 വർഷം പൂർത്തിയാക്കിയ രജനിയെ ലൈഫ് ടൈം അച്ചീവ്മെന്റ് അവാർഡ് നൽകി ചടങ്ങിൽ ആദരിച്ചു.

'ഈ പുരസ്‌കാരം സംവിധായകർക്കും നിർമാതാക്കൾക്കും എഴുത്തുകാർക്കും പിന്നെ എന്നെ ഞാനാക്കിയ തമിഴ് മക്കൾക്കും സമർപ്പിക്കുന്നു'- രജനി കൂട്ടിച്ചേർത്തു.

നെൽസൺ ദിലീപ് കുമാർ സംവിധാനം ചെയ്ത് സൂപ്പർ ഹിറ്റായ ജയിലറിന്റെ രണ്ടാം ഭാഗമാണ് ഇനി വരാനിരിക്കുന്ന രജനികാന്ത് ചിത്രം. ചിത്രീകരണത്തിനായി താരം കേരളത്തിലുമെത്തിയിരുന്നു. അട്ടപ്പാടിയിലായിരുന്നു മുൻപ് ചിത്രത്തിന്റെ ഷൂട്ടിങ്. സൺ പിക്ചേഴ്സിന്റെ ബാനറിൽ കലാനിധി മാരനാണ് സിനിമയുടെ നിർമാണം.