'ഒരു അമ്പത് കൊല്ലം കൂടുമ്പോഴോ നൂറ് കൊല്ലം കൂടുമ്പോഴോ ഒന്ന് വിളിച്ചുകൂടേ'; ലോക ചാപ്റ്റർ 2 ലോഡിങ്...

കൊച്ചി: മലയാള സിനിമയുടെ ചരിത്രത്തിൽ റെക്കോർഡുകൾ തിരുത്തിക്കുറിച്ച ലോക(ചാപ്റ്റർ1: ചന്ദ്ര)യുടെ രണ്ടാം ഭാ​ഗം ലോഡിങ്... ചിത്രത്തിന്റെ പുതിയ അപ്ഡേറ്റ് നൽകിയിരിക്കുകയാണ് നിർമാതാവ് കൂടിയായ ദുൽഖർ സൽമാൻ. 'വെൻ ലെജൻഡ്സ് ചിൽ' എന്ന ടാ​ഗ് ലൈനോടെയാണ് മൈക്കിൾ, ചാർലി എന്നീ കഥാപാത്രങ്ങൾ തമ്മിലുള്ള സീക്വെൻസ് പുറത്തുവിട്ടിരിക്കുന്നത്.

ചാപ്റ്റർ 1 ചന്ദ്രയാണെന്നും രണ്ടും മൂന്നും ചാപ്റ്ററുകൾ യഥാക്രമം മൈക്കിളും ചാർളിയുമായിരിക്കുമെന്നും ഉറപ്പിക്കാം. ചിത്രത്തിലെ നായക- പ്രതിനായക കഥാപാത്രങ്ങളെ അവതരിപ്പിക്കുന്നതും ടോവിനോ തന്നെ എന്ന സൂചനയുമുണ്ട്. അവൻ വരും ചാത്തൻമാർ കൊണ്ടുവരും എന്ന് വാചകത്തോടെയാണ് വീഡിയോ അവസാനിക്കുന്നത്. ചാപ്റ്റർ വണ്ണിലേക്ക് ലീഡ് ചെയ്യുന്ന നിരവധി സൂചനകളും അവസാനം പുറത്തുവിട്ട വീഡിയോയിലുണ്ട്.

ദുൽഖർ സൽമാൻ്റെ വേഫെറർ ഫിലിംസ് നിർമിച്ച ചിത്രം ലോക ചാപ്റ്റർ1: ചന്ദ്ര ഓണം റിലീസായി ആ​ഗസ്ത് 28നണ് തീയേറ്ററുകളിലെത്തിയത്. കല്യാണി പ്രിയദർശൻ, നസ്‌ലൻ എന്നിവരാണ് ചിത്രത്തിലെ പ്രധാന വേഷങ്ങൾ ചെയ്യുന്നത്. ചിത്രത്തിന്റെ രചനയും സംവിധാനവും ഡൊമിനിക് അരുൺ ആണ് നിർവഹിച്ചത്. സർവകാല റെക്കോർഡുകളും തകർത്ത് ഇപ്പോഴും പ്രദർശനം തടരുകയാണ് ലോക ചാപ്റ്റർ 1.

സൂപ്പർഹീറോയായ ചന്ദ്രയായി കല്യാണി പ്രിയദർശൻ വേഷമിട്ടിരിക്കുന്ന ചിത്രത്തിൽ സണ്ണി എന്ന കഥാപാത്രമാണ് നസ്‌ലൻ അവതരിപ്പിക്കുന്നത്. ഇൻസ്‌പെക്ടർ നാച്ചിയപ്പ ഗൗഡ എന്ന കഥാപാത്രമായി തമിഴ് താരം സാൻഡിയും അഭിനയിച്ചിരിക്കുന്നു. ഒന്നിലധികം ഭാഗങ്ങളിൽ ഒരുങ്ങുന്ന സിനിമാറ്റിക്ക് യൂണിവേഴ്‌സിൻ്റെ ആദ്യ ഭാഗമാണ് ഇപ്പോൾ പുറത്തിറങ്ങിയത്.

ഛായാഗ്രഹണം- നിമിഷ് രവി, സംഗീതം- ജേക്‌സ് ബിജോയ്, എഡിറ്റർ- ചമൻ ചാക്കോ, എക്സിക്യൂട്ടീവ് പ്രൊഡ്യൂസേഴ്സ്- ജോം വർഗീസ്, ബിബിൻ പെരുമ്പള്ളി, അഡീഷണൽ തിരക്കഥ- ശാന്തി ബാലചന്ദ്രൻ, പ്രൊഡക്ഷൻ ഡിസൈനർ- ബംഗ്ലാൻ, കലാസംവിധായകൻ- ജിത്തു സെബാസ്റ്റ്യൻ, മേക്കപ്പ്- റൊണക്സ് സേവ്യർ, കോസ്റ്റ്യൂം ഡിസൈനർ- മെൽവി ജെ, അർച്ചന റാവു, സ്റ്റിൽസ്- രോഹിത് കെ സുരേഷ്, അമൽ കെ സദർ, ആക്ഷൻ കൊറിയോഗ്രാഫർ- യാനിക്ക് ബെൻ, പ്രൊഡക്ഷൻ കൺട്രോളർ- റിനി ദിവാകർ, വിനോഷ് കൈമൾ, ചീഫ് അസോസിയേറ്റ്- സുജിത്ത് സുരേഷ്, പിആർഒ- ശബരി.