സുരാജിന്റെ വില്ലൻ മോഡ്, കിടിലൻ ലുക്കിൽ മോഹൻലാൽ; ജയിലർ 2 ട്രെയിലർ പുറത്ത്

കൊച്ചി: തെന്നിന്ത്യൻ സിനിമാ ലോകം ആവേശത്തോടെ കാത്തിരുന്ന ജയിലർ 2 ട്രെയിലർ പുറത്ത്. മുത്തുവേൽ പാണ്ഡ്യന്റെ പുതിയ ലോകവും വിടാതെ പിന്തുടരുന്ന പഴയ സംഭവങ്ങളുമാണ് ട്രെയിലറിൽ അവതരിപ്പിച്ചിരിക്കുന്നത്. ഒന്നാം ഭാ​ഗമായ ജയിലറിൽ മുത്തുവേൽ പാണ്ഡ്യനെന്ന രജനികാന്തിന്റെ കഥാപാത്രം തിരികെയെത്തുന്ന ആവേശത്തിലാണ് ആരാധകർ. ഇത്തവണ ചിത്രത്തിൽ കൂടുതൽ സസ്പെൻസുകൾ ഒളിപ്പിച്ചിട്ടുണ്ട്. നെൽസൺ ദിലീപ്കുമാർ സംവിധാനം ചെയ്യുന്ന ചിത്രത്തിൽ വമ്പൻ പ്രതീക്ഷയാണ് സിനിമാ ലോകത്തിന്. ഒക്ടോബർ 15ന് ചിത്രം തിയറ്ററിലെത്തും. സംവിധായകൻ നെൽസൺ തന്നെയാണ് ചിത്രത്തിന്റെ രചനയും നിർവ്വഹിക്കുന്നത്.

ജയിലർ 2ൻ്റെ ലോകത്തേക്ക് സുരാജ് വെഞ്ഞാറമൂടിനെ സ്വാ​ഗതം ചെയ്തുകൊണ്ട് അണിയറപ്രവർത്തകർ കഴിഞ്ഞ ദിവസം പുതിയ അപ്ഡേറ്റ് പുറത്തുവിട്ടു. ചിത്രത്തിൽ ദിലീപ് എന്ന കഥാപാത്രത്തെയാണ് സുരാജ് അവതരിപ്പിക്കുന്നത്. ട്രെയിലറിൽ ഞെട്ടിക്കുന്ന പെർഫോമൻസിലാണ് സുരാജിനെ കാണാനാവുക.

സൺ പിക്‌ചേഴ്‌സിന്റെ ബാനറിൽ കലാനിധി മാരൻ നിർമ്മിക്കുന്ന ആക്ഷൻ കോമഡി ചിത്രത്തിൽ മുത്തുവേൽ പാണ്ഡ്യൻ ഐപിഎസായി രജനികാന്ത് വീണ്ടും വെള്ളിത്തിരയിലെത്തും. ആദ്യ ഭാഗത്തിലുണ്ടായിരുന്ന രമ്യാ കൃഷ്ണൻ (വിജി), യോഗി ബാബു (വിമൽ), മിർണ (ശ്വേത) എന്നിവർക്കൊപ്പം വൻ താരനിരയാണ് ഇത്തവണ അണിനിരക്കുന്നത്.

എസ് ജെ സൂര്യ പ്രധാന വേഷത്തിലെത്തുമ്പോൾ മലയാളത്തിൽ നിന്ന് സുരാജ് വെഞ്ഞാറമൂട്, അന്ന രാജൻ, ഹക്കിം ഷാജഹാൻ എന്നിവരും ചിത്രത്തിന്റെ ഭാഗമാകുന്നു. ജതിൻ സർനയാണ് മറ്റൊരു പ്രധാന താരം. ആദ്യ ഭാഗത്തിലെ പോലെ തന്നെ അതിഥി വേഷങ്ങളിലൂടെ ആരാധകരെ ആവേശം കൊള്ളിക്കാനും ജയിലർ 2 ഒരുങ്ങുന്നുണ്ട്. ആവേശം കൂട്ടാൻ മോഹൻലാലും ശിവരാജ്കുമാറും ജയിലർ 2വിലും ഉണ്ട്. മോഹൻലാൽ അവതരിപ്പിക്കുന്ന മാത്യു എന്ന കഥാപാത്രത്തിന്റെ ഫ്ലാഷ് ബാക്ക് ജയിലർ 2ൽ ഉണ്ടാകും. മിഥുൻ ചക്രവർത്തി, വിജയ് സേതുപതി എന്നിവരും ചിത്രത്തിൽ കാമിയോ വേഷങ്ങളിൽ പ്രത്യക്ഷപ്പെടുമെന്നാണ് വിവരം.

ആദ്യ ഭാഗത്തിലെ വില്ലൻ 'വർമ്മനെ' (വിനായകൻ) ഫ്ലാഷ്ബാക്ക് രംഗങ്ങളിലൂടെ രണ്ടാം ഭാഗത്തിലും ഉൾപ്പെടുത്തിയിട്ടുണ്ട്. 2025 ജനുവരിയിൽ ഔദ്യോഗികമായി പ്രഖ്യാപിച്ച ചിത്രത്തിന്റെ ഷൂട്ടിംഗ് മാർച്ചിൽ ചെന്നൈയിലാണ് ആരംഭിച്ചത്. ഒരു വർഷം നീണ്ടുനിന്ന ചിത്രീകരണം കഴിഞ്ഞ ഏപ്രിലിലാണ് പൂർത്തിയായത്. ആദ്യ ഭാഗത്തിന് സംഗീതമൊരുക്കിയ അനിരുദ്ധ് രവിചന്ദർ തന്നെയാണ് രണ്ടാം ഭാഗത്തിന്റെയും സംഗീത സംവിധായകൻ. വിജയ് കാർത്തിക് കണ്ണൻ ഛായാഗ്രഹണവും ആർ നിർമ്മൽ എഡിറ്റിംഗും നിർവ്വഹിക്കുന്നു. ആദ്യ ഭാഗം ബോക്സ് ഓഫീസിൽ സൃഷ്ടിച്ച തരംഗം രണ്ടാം ഭാഗത്തിലൂടെ ആവർത്തിക്കാനാകുമെന്ന പ്രതീക്ഷയിലാണ് സിനിമാ ലോകം.