നിരാശമാത്രം നൽകി കാലാവസ്ഥാ ഉച്ചകോടി

ഈ മാസം പത്തുമുതൽ 22 വരെ ബ്രസീലിലെ ബെലെമിൽ നടന്ന ഐക്യരാഷ്ട്ര കാലാവസ്ഥാ ഉച്ചകോടി എത്രമേൽ നിർണായകമായിരുന്നോ അത്രമേൽ നിരാശാജനകവുമായി മാറി. കാലാവസ്ഥാവ്യതിയാനം നേരിടുന്നതിനുള്ള പ്രവർത്തനങ്ങളിലെ നാഴികക്കല്ലായ പാരിസ് ഉടമ്പടിയുടെ പത്താംവാർഷികത്തിൽ നടന്ന 30–ാം ആഗോള കാലാവസ്ഥാ ഉച്ചകോടി (സിഒപി 30) പാരിസ് ഉടമ്പടിയുടെ ലക്ഷ്യങ്ങളിലേക്ക് മുന്നേറുന്നതിന് കാര്യമായ സംഭാവനകളൊന്നും നൽകിയില്ലെന്നത് അത്യന്തം ആശങ്കാജനകമാണ്.

കാലാവസ്ഥാവ്യതിയാനത്തിന്റെ ദുരന്തഫലങ്ങൾ കാലം തെറ്റിയ മഴയായും വെള്ളപ്പൊക്കമായും വരൾച്ചയായും വന നശീകരണമായും അനുഭവിക്കുന്ന ലോകം അതിനെ നേരിടുന്നതിന്‌ തയ്യാറാക്കിയ കർമപദ്ധതിയായിരുന്നു 2015 ഡിസംബർ 12ന് ഒപ്പുവയ്ക്കുകയും 2016 നവംബർ നാലിന് പ്രാബല്യത്തിൽ വരികയും ചെയ്ത പാരിസ് ഉടമ്പടി.

ആഗോള താപനത്തിന്റെ തോത് പരിമിതപ്പെടുത്തുന്നതിനും ഹരിതഗൃഹ വാതകങ്ങളുടെ ബഹിർഗമനത്തിന്റെ അളവ് കുറയ്ക്കുന്നതിനും കാലാവസ്ഥാമാറ്റ പ്രതിരോധ പ്രവർത്തനങ്ങൾക്ക് രാജ്യങ്ങളെ സജ്ജമാക്കുന്നതിനും അതിനായി വികസിതരാജ്യങ്ങൾ വികസ്വര, അവികസിത രാജ്യങ്ങളെ സാമ്പത്തികമായി സഹായിക്കുന്നതിനും പാരിസ് ഉച്ചകോടി വ്യക്തമായ പദ്ധതി തയ്യാറാക്കി. ഈ ദിശയിൽ മുന്നേറുന്നതിന് നിർണായക നടപടികൾ സ്വീകരിക്കുക എന്ന ലക്ഷ്യത്തോടെ നടന്ന ബെലെം ഉച്ചകോടിയിലെ തീരുമാനങ്ങൾ പക്ഷേ അതിന് ഉതകുന്നതായില്ല.

ആഗോള താപനിലയിലെ വർധന 1.5 ഡിഗ്രി സെൽഷ്യസിൽ പിടിച്ചുനിർത്തുന്നതിനുവേണ്ടി രാജ്യങ്ങൾ സ്വന്തം നിലയ്ക്ക് നടത്തുന്ന പ്രതിരോധപ്രവർത്തനങ്ങളിലെ പോരായ്മ പരിഹരിക്കുക എന്നതാണ് ഉച്ചകോടിയുടെ പ്രധാന തീരുമാനങ്ങളിലൊന്ന്. ഇതിന്‌ രണ്ടുവർഷം നീളുന്ന ഗ്ലോബൽ ഇംപ്ലിമെന്റേഷൻ ആക്സിലറേറ്ററും പ്രഖ്യാപിച്ചിരിക്കുന്നു. എന്നാൽ, ഹരിതഗൃഹ വാതകങ്ങളുടെ ബഹിർഗമനത്തിനും ആഗോള താപനത്തിനും പ്രധാന കാരണമായ ഫോസിൽ ഇന്ധനങ്ങളുടെ ഉപയോഗം കുറയ്ക്കുന്നതു സംബന്ധിച്ച് വ്യക്തമായ നടപടിക്രമം രൂപീകരിക്കുന്നതിൽ ഉച്ചകോടി പരാജയപ്പെട്ടതോടെ ഇവ നിർദേശങ്ങളായിത്തന്നെ നിലനിൽക്കുകയേയുള്ളൂവെന്ന് വിദഗ്ധർ ചൂണ്ടിക്കാട്ടുന്നു. കാലാവസ്ഥാമാറ്റ പ്രതിരോധ പ്രവർത്തനങ്ങൾക്ക് അവികസിത, വികസ്വര രാജ്യങ്ങളെ സഹായിക്കുന്നതിനായി ഉച്ചകോടി സമാഹരിച്ചത് 125 കോടി ഡോളറാണ്. ഇതാകട്ടെ ലക്ഷ്യമിട്ട മിനിമം തുകയുടെ 40 ശതമാനംപോലും വരുന്നില്ല.

മുൻ ഉച്ചകോടികളിൽ പ്രഖ്യാപിച്ചതും നടപ്പാകാത്തതുമായവയുടെ ആവർത്തനമല്ലാതെ മറ്റൊന്നും ബെലെം ഉച്ചകോടിയിലും ഉണ്ടാകാത്തതിന് പ്രധാന കാരണം യുഎസ് അടക്കമുള്ള വികസിതരാജ്യങ്ങളുടെ നിഷേധാത്മക നിലപാടുതന്നെയാണ്. കാലാവസ്ഥാവ്യതിയാനം നേരിടുന്നതിൽ സാമ്പത്തികമായി മുന്നാക്കംനിൽക്കുന്ന രാജ്യങ്ങളും പിന്നാക്ക രാജ്യങ്ങളും തമ്മിൽ നിലനിൽക്കുന്ന രൂക്ഷമായ ഭിന്നത ഈ ഉച്ചകോടിയിലും മറനീക്കി. ഫോസിൽ ഇന്ധനങ്ങളുടെ ഉപയോഗം കുറയ്ക്കണമെന്ന് സാമ്പത്തികമായി പിന്നാക്കംനിൽക്കുന്ന രാജ്യങ്ങൾ ശക്തിയായി വാദിച്ചെങ്കിലും വൻ ശക്തികൾ അതിന്‌ വഴങ്ങിയില്ല. ഈ സാഹചര്യത്തിൽ ആഗോള താപനത്തിന്റെ തോത് 1.5 ഡിഗ്രി സെൽഷ്യസിൽ പിടിച്ചുകെട്ടുക എന്ന പാരിസ് ഉടമ്പടിയുടെ ലക്ഷ്യം അസാധ്യമായിത്തന്നെ തുടരും.

പാരിസ് ഉടമ്പടിയിൽനിന്നുതന്നെ 2026 ജനുവരിമുതൽ പിന്മാറുമെന്ന് അമേരിക്ക നേരത്തേ പ്രഖ്യാപിച്ചിരിക്കേ കാലാവസ്ഥാവ്യതിയാനത്തിന് പരിഹാരം കാണുന്നതിനും പ്രതിരോധം ചമയ്ക്കുന്നതിനും നടക്കുന്ന ശ്രമങ്ങളുടെ ഭാവി എന്താകുമെന്ന് കണ്ടറിയേണ്ടിയിരിക്കുന്നു. അസംബന്ധം എന്നു വിളിച്ച് അതീവ ഗൗരവമേറിയ ഈ ഉച്ചകോടിയെ ആദ്യമേ തള്ളിക്കളഞ്ഞ യുഎസ് പ്രസിഡന്റ്‌ ഡോണൾഡ് ട്രംപ് നൽകുന്നത് തീർച്ചയായും പ്രതീക്ഷയല്ലല്ലോ. ആഗോള താപനമെന്നത് വലിയ തട്ടിപ്പാണെന്നു പറഞ്ഞ് കണ്ണടച്ച് ഇരുട്ടാക്കുന്ന ട്രംപിനെപ്പോലുള്ള നേതാക്കൾ ലോകത്തെ നയിക്കുന്നത് പ്രകാശത്തിലേക്കാകാൻ വഴിയുമില്ല.

സത്യത്തിന്റെ ഉച്ചകോടിയെന്നാണ് 30–ാം യുഎൻ ആഗോള കാലാവസ്ഥാ ഉച്ചകോടിയെ ആതിഥേയ രാജ്യമായ ബ്രസീലിന്റെ പ്രസിഡന്റ്‌ ലുല ഡിസിൽവ വിശേഷിപ്പിച്ചത്. അത്യന്തം പരിസ്ഥിതിപ്രാധാന്യമുള്ള ആമസോൺ വനങ്ങളുടെ സാന്നിധ്യമുള്ള ബ്രസീലിൽ നടന്ന ഉച്ചകോടി അതിനാൽത്തന്നെ പ്രതീകാത്മകവുമായി. എന്നാൽ, മനുഷ്യരാശി നേരിടുന്ന നിർണായക വെല്ലുവിളി ചെറുക്കുന്നതിൽ ആഗോള സാമ്പത്തികശക്തികൾ പുലർത്തുന്ന ആത്മാർഥതയില്ലായ്മയും ഉദാസീനതയും ഒരിക്കൽക്കൂടി ഉച്ചകോടിയിൽ ലോകം കണ്ടു. അതിനാൽ അത്‌ കയ്ക്കുന്ന സത്യങ്ങളുടെ ഉച്ചകോടിയായി എന്നു പറയേണ്ടിയിരിക്കുന്നു.