ആരോഗ്യസുരക്ഷ : സർക്കാർ നിലപാടിന്‌ കരുത്തേകുന്ന വിധി

സ്വകാര്യ ആശുപത്രികളിൽ ചികിത്സ തേടുന്നവരെ സംബന്ധിച്ച്‌ സുപ്രധാനമായ വിധിയാണ്‌ കഴിഞ്ഞദിവസം ഹൈക്കോടതിയിൽനിന്നുണ്ടായത്‌. മുൻകൂർ പണം നൽകിയില്ലെങ്കിലും അത്യാസന്ന വിഭാഗങ്ങളിലെത്തുന്നവർക്ക് സ്വകാര്യ ആശുപത്രികളിലടക്കം അടിയന്തരചികിത്സ നിഷേധിക്കരുത്‌. ചികിത്സാഫീസും പാക്കേജുകളുടെ തുകയും രോഗികളുടെ അവകാശങ്ങളുടെ വിവരങ്ങളും ആശുപത്രികളിലും വെബ്സൈറ്റിലും പ്രദർശിപ്പിക്കണം. ആശുപത്രി ജീവനക്കാരുടെ സമഗ്രവിവരങ്ങൾ രജിസ്ട്രേഷൻ അതോറിറ്റിയിൽ നൽകണമെന്നും ഹൈക്കോടതി നിർദേശിച്ചു. 2018ലെ കേരള ക്ലിനിക്കൽ എസ്റ്റാബ്ലിഷ്‌മെന്റ് നിയമവും ചട്ടങ്ങളും ശരിവച്ച സിംഗിൾ ബെഞ്ച് ഉത്തരവ് ചോദ്യംചെയ്ത്‌ കേരള പ്രൈവറ്റ് ഹോസ്പിറ്റൽ അസോസിയേഷൻ, ഇന്ത്യൻ മെഡിക്കൽ അസോസിയേഷൻ തുടങ്ങിയ സംഘടനകൾ നൽകിയ അപ്പീൽ തള്ളിയാണ്‌ പ്രധാന വിധി ഉണ്ടായത്‌. സംസ്ഥാന സർക്കാർ കൊണ്ടുവന്ന നിയമം ഭരണഘടനയ്ക്ക് എതിരല്ലെന്നും രാജ്യാന്തരനിലവാരത്തിന് യോജിച്ചതാണെന്നും കോടതി വ്യക്തമാക്കുകയും ചെയ്‌തു.

കേരളത്തിലെ എല്ലാ അംഗീകൃത വൈദ്യശാസ്ത്രസംവിധാനങ്ങളിലുമുള്ള ക്ലിനിക്കൽ സ്ഥാപനങ്ങളെ നിയന്ത്രിക്കുന്നതിലൂടെ പൊതുജനാരോഗ്യം മെച്ചപ്പെടുത്താൻ ലക്ഷ്യമിട്ടുള്ള ഒരു സുപ്രധാന നിയമനിർമാണമാണ് 2018ലെ കേരള ക്ലിനിക്കൽ എസ്റ്റാബ്ലിഷ്‌മെന്റ് (രജിസ്ട്രേഷൻ ആൻഡ് റഗുലേഷൻ) ആക്ട്‌. ആശുപത്രികൾമുതൽ പരിശോധനാ ലാബുകൾവരെയുള്ള സ്ഥാപനങ്ങളുടെ രജിസ്‌ട്രേഷൻ ഉൾപ്പെടെയുള്ള കാര്യങ്ങൾക്കും ഓരോ സ്ഥാപനത്തിനും സേവനത്തിനും നിശ്ചിത ഗുണനിലവാരം ഉറപ്പാക്കുന്നതിനുമായിരുന്നു പൊതുജനങ്ങളുടെ ആവശ്യം പരിഗണിച്ച്‌ കേരള സർക്കാർ നിയമം കൊണ്ടുവന്നത്. 2010ലെ ദേശീയ ക്ലിനിക്കൽ എസ്റ്റാബ്ലിഷ്‌മെന്റ്സ് (രജിസ്ട്രേഷൻ ആൻഡ് റഗുലേഷൻ) ആക്ടിന്റെ ചുവടുപിടിച്ചാണ്‌ ഇ‍ൗ നിയമം. ഫീസ്‌ നിരക്ക്, പാക്കേജ് നിരക്ക് എന്നിവ നിര്‍വചിച്ചിട്ടില്ലെന്നും അധികൃതര്‍ക്ക് അനിയന്ത്രിതമായ അധികാരമാണ് നല്‍കുന്നതെന്നുമായിരുന്നു ആശുപത്രി ഉടമകൾ വാദിച്ചത്‌. എന്നാൽ, പൊതുജനാരോഗ്യവും രോഗികളുടെ സുരക്ഷയും ഉറപ്പാക്കാനാണ് നിയമം പാസാക്കിയതെന്നും ധാര്‍മികനിലവാരം ഉള്‍പ്പെടെ പ്രോത്സാഹിപ്പിച്ച് സുതാര്യതയ്ക്കുള്ള നടപടിയാണിതെന്നും സര്‍ക്കാര്‍ ചൂണ്ടിക്കാട്ടി.

കേരളത്തിലെ പ്രധാനപ്പെട്ട സ്വകാര്യ ആശുപത്രി ശൃംഖലകളെ ആഗോള കോർപറേറ്റുകൾ ഏറ്റെടുക്കുകയാണ്‌. ആഗോള കോർപറേറ്റുകൾ ഇങ്ങോട്ടുവരുന്നത് കേരളത്തെ സേവിക്കാമെന്ന താൽപ്പര്യത്തോടെയല്ല, മറിച്ച്‌ ലാഭം ഉണ്ടാക്കുക എന്ന ലക്ഷ്യത്തോടെയാണ്‌. പല കോർപറേറ്റ് ആശുപത്രി ശൃംഖലകളും മാർക്കറ്റിങ് തന്ത്രങ്ങളുടെ ഭാഗമായി കേരളത്തിന്റെ പല ഭാഗങ്ങളിലും ആരോഗ്യകേന്ദ്രങ്ങൾ വ്യാപിപ്പിക്കുന്നു. സ്വകാര്യ ആശുപത്രി ശൃംഖലകളേക്കാൾ മികച്ച സംവിധാനമായി സർക്കാർ ആശുപത്രികളെ എൽഡിഎഫ്‌ സർക്കാർ ശക്തിപ്പെടുത്തുകയാണ്‌. എല്ലാ ജില്ലകളിലും മെഡിക്കൽ കോളേജുകളും കാത്ത്‌ ലാബ്‌ ഉൾപ്പെടെയുള്ള ആധുനികസംവിധാനങ്ങളും ഏർപ്പെടുത്തുന്നുണ്ട്‌. സൂപ്പർ സ്‌പെഷ്യാലിറ്റി സ‍ൗകര്യങ്ങളുമായി, ഏറ്റവും സങ്കീർണമായ ശസ്‌ത്രക്രിയകൾ മെഡിക്കൽ കോളേജുകളിലും ജനറൽ ആശുപത്രികളിലും സ‍ൗജന്യമായും കുറഞ്ഞ ചെലവിലും നടത്തുന്നുണ്ട്‌. ഇത്‌ സ്വകാര്യ ആശുപത്രികൾക്ക്‌ ഭീഷണിയാകുമെന്ന്‌ മനസ്സിലാക്കി കേരളത്തിലെ പല പ്രമുഖ മാധ്യമങ്ങളും സർക്കാർ ആശുപത്രികൾക്കെതിരെ വ്യാജവാർത്തകൾ നിരന്തരം സൃഷ്ടിക്കുകയാണ്‌.

​നിലവിൽ ആരോഗ്യമേഖല സേവനം എന്നതിനപ്പുറത്തേക്ക് തീർത്തും വലിയ കച്ചവടമായി മാറിയിരിക്കുന്ന സന്ദർഭത്തിലാണ്‌ കേരള ക്ലിനിക്കൽ എസ്റ്റാബ്ലിഷ്‌മെന്റ് നിയമം ശരിവച്ചുകൊണ്ട്‌ ഹൈക്കോടതി വിധി ഉണ്ടായിരിക്കുന്നത്‌. ചികിത്സതേടി എത്തുന്നവർക്ക്‌ സഹായകമായ മാർഗനിർദേശങ്ങളും വിധിയിലുണ്ട്‌. ലഭ്യമായ സേവനങ്ങളും ഫീസ് വിവരങ്ങളും റിസപ്ഷനിലും അഡ്മിഷൻ ഡെസ്കിലും സൈറ്റിലും നൽകുന്നതോടൊപ്പം ബ്രോഷറുകൾ ഇറക്കണമെന്നും ബെഡ്ഡുകൾ, ഐസിയു, ആംബുലൻസ് വിവരങ്ങളും ഫോൺനമ്പരുകളും പ്രദർശിപ്പിക്കണമെന്നും ബില്ലുകൾ, സ്കാനിങ്‌ തുടങ്ങിയ പരിശോധനാ റിപ്പോർട്ടുകൾ ഡിസ്ചാർജ് സമയത്ത് രോഗികൾക്ക്‌ കൈമാറണമെന്നും കോടതി നിർദേശിച്ചതിനും പ്രാധാന്യമുണ്ട്‌. ഇപ്പോൾ ഭൂരിഭാഗം ആശുപത്രികളും ചികിത്സയുടെ വിശദാംശങ്ങളും പരിശോധനാ റിപ്പോർട്ടുകളും രോഗികൾക്ക്‌ നൽകുന്നില്ല.

സമീപവർഷങ്ങളിൽ അമിതമായ ചാർജുകളും അധാർമിക രീതികളും സംബന്ധിച്ച്‌ സ്വകാര്യ ആശുപത്രികൾക്കെതിരെ നിരവധി പരാതികൾ ഉയർന്നുവരുന്നുണ്ട്‌. തോന്നുംപടിയാണ്‌ വൻകിട ആശുപത്രികൾ ഓരോന്നിനും നിരക്ക്‌ നിശ്ചയിക്കുന്നത്‌. മരുന്നുകൾക്കും മറ്റ് മെഡിക്കൽ സാധനങ്ങൾക്കും സേവനങ്ങൾക്കും അന്യായമായ നിരക്ക്‌ ഇ‍ൗടാക്കുന്നതിന്റെ ഞെട്ടിക്കുന്ന വിവരങ്ങൾ പലപ്പോഴും പുറത്തുവന്നിട്ടുണ്ട്. ചികിത്സാപ്പിഴവുമൂലമുള്ള മരണങ്ങളും സ്വകാര്യ ആശുപത്രികളിൽ ഉണ്ടാകുന്നു. ഡോക്ടർമാരെ പലപ്പോഴും പ്രത്യേക പാക്കേജുകളിൽ നിയമിക്കുകയും അനാവശ്യമായ പരിശോധനകളും ശസ്ത്രക്രിയകളും ഉൾപ്പെടെയുള്ളവ നടത്തുന്നതായും വിലയിരുത്തിയിട്ടുണ്ട്‌. കേരളത്തിൽ ഇത്തരം അനാവശ്യപ്രവണതകൾ അവസാനിപ്പിക്കാനും എല്ലാത്തരം മെഡിക്കൽ സേവനങ്ങളുടെയും പരിശോധനാ സംവിധാനങ്ങളുടെയും നിലവാരം ഉറപ്പുവരുത്താനും കേരള ക്ലിനിക്കൽ എസ്റ്റാബ്ലിഷ്‌മെന്റ് നിയമം ഹൈക്കോടതി ശരിവച്ചതിലൂടെ സാധിക്കും.