ആപത്ത്‌ തിരിച്ചറിയാത്ത അധോമുഖ വാമനന്മാർ
കേരളത്തിൽ കോൺഗ്രസ്‌ നയിക്കുന്ന വലതുപക്ഷ രാഷ്‌ട്രീയം മുന്പെങ്ങുമില്ലാത്ത പ്രതിസന്ധിയിലാണ്‌. പത്തുവർഷത്തോളമായി ഭരണമില്ലാത്ത അവസ്ഥ അവരെ നിരാശരാക്കുന്നു. ദീർഘകാലമായി തങ്ങളെ പിന്തുണയ്‌ക്കുന്ന ജനവിഭാഗങ്ങൾ കോൺഗ്രസിന്റെയും യുഡിഎഫിന്റെയും നിലപാടില്ലായ്‌മമൂലം അവരെ കൈയൊഴിയുന്നു. ന്യൂനപക്ഷങ്ങളിൽനിന്നടക്കം വലിയ വിഭാഗം ജനങ്ങൾ പുരോഗമനപക്ഷത്ത്‌ നിലയുറപ്പിക്കാൻ തുടങ്ങിയതോടെ അങ്കലാപ്പിലാണ്‌ കോൺഗ്രസ്‌, മുസ്ലിംലീഗ്‌ നേതൃത്വം. 2016 മുതൽ എൽഡിഎഫ്‌ സർക്കാർ നടപ്പാക്കിയ ജനക്ഷേമ പരിപാടികളെ ഹൃദയത്തിലേറ്റുന്ന ജനങ്ങളിലൂടെ ഇടതുപക്ഷത്തിന്റെ അടിത്തറ കൂടുതൽ ബലിഷ്‌ഠമാകുകയും ചെയ്യുന്നു.
ഇ‍ൗ സാഹചര്യം തരണം ചെയ്യാനും എൽഡിഎഫിനെ പരാജയപ്പെടുത്താനും കോൺഗ്രസും ലീഗും കണ്ടെത്തിയ ഒറ്റമൂലി ജമാഅത്തെ ഇസ്ലാമി എന്ന മതരാഷ്‌ട്രവാദ സംഘടനയുമായി പരസ്യമായ ബന്ധം സ്ഥാപിക്കലാണ്‌. ഹുകുമത്തെ ഇലാഹി (ദൈവിക ഭരണം) എന്ന ഏകമാത്ര അജൻഡയിലൂന്നി പ്രവർത്തിക്കുന്ന ജമാഅത്തെ ഇസ്ലാമിയെ യുഡിഎഫ്‌ ആശ്ലേഷിക്കുന്നതിന്റെ ആപത്ത്‌ ചൂണ്ടിക്കാട്ടുന്നത്‌ സിപിഐ എമ്മും ഇടതുപക്ഷവും മാത്രമല്ല, പരമ്പരാഗതമായി യുഡിഎ-ഫിനെ പിന്തുണയ്‌ക്കുന്ന സുന്നി, മുജാഹിദ്‌ സംഘടനകൾകൂടിയാണ്‌. സമസ്‌ത കേരള ജം ഇയ്യത്തുൽ ഉലമയെയും കേരള നദ്‌വത്തുൽ മുജാഹിദീനെയുംപോലുള്ള പ്രസ്ഥാനങ്ങളുടെ എതിർപ്പ്‌ അവഗണിച്ചാണ്‌ യുഡിഎഫ്‌–ജമാഅത്തെ ഇസ്ലാമി ബാന്ധവം.
മതനിരപേക്ഷത, ദേശീയത, ലിബറൽ ജനാധിപത്യം, സോഷ്യലിസം തുടങ്ങിയ സംവിധാനങ്ങൾ ഇസ്ലാമികമല്ലെന്നും അവ ജാഹിലയത്ത്‌ (അജ്ഞത) ആണെന്നും വാദിക്കുന്ന അബുൾ അഅ്‌ലാ മ‍ൗദൂദിയുടെ ആശയങ്ങളാണ്‌ ആ സംഘടനയുടെ അടിത്തറ. മനുസ്‌മൃതിയെ ഭരണഘടനയ്‌ക്കും മിത്തുകളെ ചരിത്രത്തിനും മുകളിൽ പ്രതിഷ്‌ഠിക്കുന്ന ആർഎസ്എസുമായി വലിയ അകലമൊന്നും ഇ‍ൗ മുസ്ലിം പരിവാർ സംഘടനയ്‌ക്കില്ല. ഇന്ത്യൻ സ്വാതന്ത്ര്യസമരത്തിന്റെ ഒരു പാരമ്പര്യവും അവകാശപ്പെടാനാകാത്ത ഇരട്ടകളാണവ. ഹിന്ദു മഹാസഭയുടെ സ്ഥാപകരിൽ ഒരാളായി അറിയപ്പെടുന്ന കോൺഗ്രസുകാരൻകൂടിയായ മദൻമോഹൻ മാളവ്യയുടെ ജീവചരിത്രമെഴുതിയത്‌ മ‍ൗദൂദിയാണ്‌. സ്വാതന്ത്ര്യസമരകാലംതൊട്ട്‌ ജമാഅത്തെ ഇസ്ലാമിയെ അംഗീകരിക്കാൻ അന്നത്തെ കോൺഗ്രസ്‌ തയ്യാറായിട്ടില്ല. ദേശീയതലത്തിൽ മ‍ൗലാന അബുൾ കലാം ആസാദും കേരളത്തിൽ മുഹമ്മദ്‌ അബ്‌ദുറഹിമാൻ സാഹിബും പ്രതിനിധാനം ചെയ്‌ത ദേശീയ മുസ്ലിം ധാരയുമായി ഇഴുകിച്ചേർന്നാണ്‌ കോൺഗ്രസ്‌ പ്രവർത്തിച്ചത്‌. ഇന്ത്യയിൽ ജമാഅത്തെ ഇസ്ലാമി ഹിന്ദ്‌ എന്ന പേരിലാണെങ്കിൽ അന്തർദേശീയതലത്തിൽ പാകിസ്ഥാനിലും ബംഗ്ലാദേശിലും മറ്റ്‌ പേരുകളിലാണ്‌ പ്രവർത്തനം. ആർഎസ്എസുമായി ഒളിഞ്ഞും തെളിഞ്ഞും സഖ്യം ചേരാൻ മടിയില്ലാത്തവരാണ്‌ ജമാഅത്തെ ഇസ്ലാമിയെന്ന്‌ കഴിഞ്ഞ ജമ്മു കശ്‌മീർ നിയമസഭാ തെരഞ്ഞെടുപ്പ്‌ തെളിയിച്ചു. സിപിഐ എം കേന്ദ്ര കമ്മിറ്റി അംഗം മുഹമ്മദ്‌ യൂസുഫ്‌ തരിഗാമിക്കെതിരെ മത്സരിച്ചത്‌ ബിജെപി പിന്തുണയുള്ള ജമാഅത്തെ ഇസ്ലാമി നേതാവായിരുന്നു.
എന്നാൽ, ബാബ്‌റി മസ്‌ജിദ്‌ തകർത്തപ്പോഴും ഗുജറാത്ത്‌ വംശഹത്യക്കുശേഷവും വെറുക്കപ്പെട്ട സംഘടനയായി ആർഎസ്‌എസ്‌ മാറിയിട്ടും അവരുമായി ചർച്ച നടത്തിയവരാണ്‌ ജമാഅത്തെ ഇസ്ലാമി നേതാക്കൾ. സ്വന്തം ജിഹ്വകളിലൂടെ അവർ പ്രചരിപ്പിക്കുന്നത്‌ സിപിഐ എമ്മും ബിജെപിയും ബന്ധമുണ്ടെന്ന നട്ടാൽ മുളയ്‌ക്കാത്ത നുണ. മതനിരപേക്ഷത സംരക്ഷിക്കാൻ മുന്നിൽനിൽക്കുന്ന സിപിഐ എമ്മിന്റെ നേതാക്കളായ മുഖ്യമന്ത്രി പിണറായി വിജയൻ, കെ കെ ശൈലജ, പി ജയരാജൻ തുടങ്ങിയവരെ സംഘപരിവാർ അനുകൂലികളാക്കാനുള്ള കഠിനശ്രമത്തിലാണ്‌ മീഡിയ വൺ ചാനൽ. സമൂഹമാധ്യമത്തിൽ കോൺഗ്രസ്‌, ലീഗ്‌ അണികളാണ്‌ ഇ‍ൗ ആഖ്യാനത്തിന്റെ പ്രചാരകർ. ലീഗിനും എസ്‌ഡിപിഐയെപ്പോലുള്ള തീവ്രവാദസംഘടനകൾക്കും ഒരുപോലെ ആശയാടിത്തറ പണിയുന്ന ദ‍ൗത്യമാണ്‌ കേരളത്തിലെ ജമാഅത്തെ ഇസ്ലാമിക്ക്‌.
കേരളത്തിൽ സമീപകാലത്ത്‌ നടന്ന ഉപതെരഞ്ഞെടുപ്പുകളിലെല്ലാം ജമാഅത്തെ ഇസ്ലാമിയുടെ പിന്തുണ പരസ്യമായിത്തന്നെ സ്വീകരിച്ചു യുഡിഎഫ്‌. പലയിടത്തും തീവ്രവാദകക്ഷിയായ എസ്‌ഡിപിഐയും യുഡിഎ-ഫിനെ പിന്തുണച്ചു. പാലക്കാട്‌, നിലന്പൂർ ഉപതെരഞ്ഞെടുപ്പുകളിലാണ്‌ ജമാ അത്തെ ഇസ്ലാമിയും എസ്‌ഡിപിഐയും ഘടകകക്ഷികളെപ്പോലെ പ്രവർത്തിച്ചത്‌. ഇപ്പോഴിതാ തദ്ദേശ തെരഞ്ഞെടുപ്പിൽ ഒ‍ൗദ്യോഗിക ഘടകകക്ഷിയല്ലാതിരുന്നിട്ടും ആവശ്യപ്പെട്ട അത്രയും സീറ്റുകൾ ജമാഅത്തെ ഇസ്ലാമിയുടെ രാഷ്‌ട്രീയരൂപമായ വെൽഫെയർ പാർടിക്ക്‌ നൽകി. കേരള കോൺഗ്രസ്‌ ജോസഫ്‌ ഗ്രൂപ്പിനേക്കാൾ സീറ്റുകൾ.
തദ്ദേശ, നിയമസഭാ തെരഞ്ഞെടുപ്പുകൾക്കപ്പുറത്തും വിശാലമായ ഒരു രാഷ്‌ട്രീയഭൂമികയുണ്ടെന്ന്‌ തിരിച്ചറിയാതെയാണ്‌ മതരാഷ്‌ട്രവാദികളെ യുഡിഎഫ്‌ ഒക്കത്തിരുത്തുന്നത്‌. ജമാഅത്തെ ഇസ്ലാമിയെ ആർഎസ്എസുമായി കാന്തപുരം വിഭാഗവും മുസ്ലിം ബ്രദർഹുഡുമായി സമസ്‌തയും തുലനം ചെയ്യുന്പോൾ അവർ നൽകുന്ന ആപത്‌സൂചനകൾ തിരിച്ചറിയാൻ കഴിയാത്ത അധോമുഖ വാമനന്മാരായ യുഡിഎഫ്‌ നേതാക്കൾ കേരളത്തെ വലിയൊരു ആപത്തിലേക്കാണ്‌ തള്ളിവിടുന്നത്‌. ഇസ്ലാമിന്റെ പേരിലുള്ള തീവ്രവാദം ശക്തിപ്പെടുന്നത്‌ ഹിന്ദുത്വശക്തികളെയാണ്‌ ആഹ്ലാദിപ്പിക്കുക എന്ന സത്യം ഇവർ കണ്ടില്ലെന്നു നടിക്കുകയാണ്‌.
Related News
Dont Miss it
0 comments