സായ്​ കൃഷ്ണക്ക്​ കണ്ണൂർ വിമാനത്താവളത്തിൽ ഉജ്വല സ്വീകരണം

മട്ടന്നൂർ

കേന്ദ്ര ശാസ്ത്ര സാങ്കേതിക വകുപ്പും നാഷണല്‍ ഇന്നവേഷന്‍ ഫൗണ്ടേഷനും ചേര്‍ന്ന് ദേശീയതലത്തില്‍ നല്‍കുന്ന ഇന്‍സ്‌പെയര്‍ മനാക് അവാര്‍ഡില്‍ മൂന്നാം സ്ഥാനം നേടി നാടിന്​ അഭിമാനമായ എടയന്നൂര്‍ ജിവിഎച്ച്എസ്എസിലെ ഒന്പതാം ക്ലാസ് വിദ്യാര്‍ഥി ഇ കെ സായ് കൃഷ്ണക്ക്​ കണ്ണൂർ അന്താരാഷ്​ട്ര വിമാനത്താവളത്തിൽ ഉജ്വല സ്വീകരണം. കേന്ദ്ര ശാസ്ത്ര സാങ്കേതിക മന്ത്രി ഡോ. ജിതേന്ദ്ര സിങ്ങിൽനിന്ന്​ അവാര്‍ഡ് വാങ്ങി ഡൽഹിയിൽനിന്ന്​ ശനിയാഴ്‌ച രാത്രി ​വിമാനത്താവളത്തിൽ വന്നിറങ്ങിയ സായ്കൃഷ്ണയെ സ്വീകരിക്കാൻ വിവിധ രാഷ്ട്രീയ നേതാക്കളും നാട്ടുകാരും ബന്ധുക്കളും എടയന്നൂർ ഹൈസ്കൂളിലെ കുട്ടികളുമായി നൂറുകണക്കിന് പേരാണ്​ വിമാനത്താവളത്തിലെത്തിയത്​. എംപിമാരായ വി ശിവദാസൻ, പി സന്തോഷ് കുമാർ, വി കെ സനോജ് എംഎൽഎ, പി കെ ശ്രീമതി, കീഴല്ലൂർ പഞ്ചായത്ത് പ്രസിഡന്റ്‌ സി സജീവൻ, വൈസ്​ പ്രസിഡന്റ്‌​ വി വി വനജ, സ്ഥിരം സമിതി ചെയർമാന്മാരായ ടി രുധീഷ്​, വി ജസ്ന, മട്ടന്നൂർ എഇഒ കെ ബിന്ദു, എടയന്നൂർ ജിഎച്ച്എസ് പ്രധാനാധ്യാപിക എം ജി ഗീത, വി ആർ ഭാസ്‌കരൻ, ബിജു ഏളക്കുഴി എന്നിവരുടെ നേതൃത്വത്തിലായിരുന്നു സ്വീകരണം. പൂർവ വിദ്യാർഥിയായ സായ്​ കൃഷ്ണക്ക്​ കാനാട്​ എൽപി സ്കൂൾ പ്രധാനാധ്യാപകൻ വി രാജേഷിന്റെ നേതൃത്വത്തിൽ സ്വീകരണം നൽകി. കാനാട്​ കരിയിൽ എകെജി സ്മാരക വായനശാല നേതൃത്വത്തിൽ നാട്ടിൽ പൗര സ്വീകരണം നൽകി. വി കെ സനോജ് എംഎൽഎ ഉദ്​ഘാടനം ചെയ്തു. വീട്ടിൽ നടന്ന ചടങ്ങിൽ ബ്ലോക്ക് പഞ്ചായത്ത് പ്രസിഡന്റ്‌​, എം വി സരള, മുൻ ജില്ലാ പഞ്ചായത്ത്‌ സ്ഥിരം സമിതി ചെയർമാൻ എൻ വി ചന്ദ്രബാബു, പഞ്ചായത്ത്​ സ്ഥിരം സമിതി ചെയർപേഴ്സൺ വി ജസ്‌ന, വായനശാല സെക്രട്ടറി പി സി നിധേഷ് എന്നിവർ സംസാരിച്ചു. പി കെ ചന്ദ്രൻ സ്വാഗതവും പി മിഥുൻ നന്ദിയും പറഞ്ഞു. ബോട്ടപകടങ്ങളില്‍ രക്ഷാപ്രവര്‍ത്തനം വേഗത്തിലാക്കുന്നതിനുള്ള സ്മാര്‍ട്ട് അണ്ടര്‍വാട്ടര്‍ ബോട്ട് അലാറമാണ് സായ്​ കൃഷ്ണയെ ​ അവാര്‍ഡിന് അര്‍ഹനാക്കിയത്. നാലുലക്ഷം രൂപയുടെ സ്‌കോളര്‍ഷിപ്പ് ലഭിക്കും. കെഎസ്ഇബി ഡിവിഷണല്‍ അക്കൗണ്ട്‌സ് ഓഫീസര്‍ കാനാട്ടെ രാമകൃഷ്ണന്‍ മനിയേരിയുടെയും എടയന്നൂര്‍ ജിഎച്ച്എസ് അധ്യാപിക ഇ കെ സിനിയുടെയും മകനാണ്.