മാലിന്യമുക്തം, 
ഹരിതാഭം കൂടാളി

മട്ടന്നൂർ കാർഷിക പ്രാധാന്യമുള്ള കൂടാളി പഞ്ചായത്തിൽ പുതിയകാലത്തിന്റെ സാധ്യതകൾ പരമാവധി പ്രയോജനപ്പെടുത്തിയാണ് വികസനമുന്നേറ്റം. മാലിന്യമുക്തവും ഹരിതാഭവുമായ ഗ്രാമമെന്ന ലക്ഷ്യവുമായാണ് പ്രവർത്തനങ്ങൾ. ഇതിന്റെ ഭാഗമായി പൊതുയിടങ്ങളിലും പുറമ്പോക്കുകളിലും പുഴയോരങ്ങളിലും മുളകൾ വച്ചുപിടിപ്പിച്ചു. തരിശുഭൂമി കൃഷിയോഗ്യമാക്കുന്നതിന് വിവിധ പദ്ധതികൾ നടപ്പാക്കി. പാടശേഖരണസമിതികൾ നന്നായി പ്രവർത്തിക്കുന്നതിന്റെ ഫലമായി ഉൽപ്പാദന വർധനവുണ്ടായിട്ടുണ്ട്. ജലജീവൻ പദ്ധതിയിൽ 5250 കണക്ഷൻ നൽകി കുടിവെള്ളക്ഷാമം പരിഹരിക്കാനായി. ഈ വർഷം അവസാനത്തോടെ 100 ശതമാനം ജലജീവൻ മിഷൻ കണക്ഷൻ പൂർത്തിയാക്കാനുള്ള പ്രവർത്തനമാണ്‌ നടക്കുന്നത്‌. പട്ടികജാതി, പട്ടികവർഗ മേഖലയിൽ ഇടപെട്ട് അവരെ സമൂഹത്തിന്റെ മുൻനിരയിൽ കൊണ്ടുവരുന്നതിനുള്ള പദ്ധതികളും അവരുടെ മക്കളുടെ വിദ്യാഭ്യാസത്തിനും ആരോഗ്യത്തിനും ഉതകുന്ന പദ്ധതികളും നടപ്പാക്കുന്നുണ്ട്. വയോജന കലാമേളയും കട്ടിൽ വിതരണവും നടത്തി. അങ്കണവാടികൾ ശിശു സൗഹൃദമാക്കൽ, ശശിശു സൗഹൃദ ചുമർചിത്രങ്ങൾ, ശിശു സൗഹൃദ ടോയ്‌ലറ്റ് എന്നിവയും ബാലസഭകൾ, ബാലമേളകൾ എന്നിവ സംഘടിപ്പിക്കാനും മുൻകൈയെടുത്തു. 26 അങ്കണവാടികളും ശിശുസൗഹൃദ ഹൈടെക്കാക്കി. ലൈഫ് മിഷൻ പദ്ധതിയിൽ 70 വീടുകളിൽ കരാർ വച്ചു. 45 വീട് പൂർത്തിയായി. ബാക്കി വീടുകളുടെ നിർമാണം പുരോഗമിക്കുന്നു. പിഎംഎവൈ പദ്ധതിയിൽ 31 വീടുകളുടെ പ്രവർത്തനം നടക്കുന്നുണ്ട്. സ്ത്രീപക്ഷ കാഴ്ചപ്പാടോടെ സ്ത്രീപദവി പഠനം നടത്തി. ഇതിന്റെ അടിസ്ഥാനത്തിൽ സ്ത്രീ ശാക്തീകരണ പദ്ധതികൾ നടപ്പാക്കി. അയൽക്കൂട്ട ഹരിതപ്രഖ്യാപനം, ടൗൺ സൗന്ദര്യവൽക്കരണം, ജലാശയങ്ങളുടെയും തോടുകളുടെയും ശുചീകരണം, കുളങ്ങളുടെ നവീകരണം തുടങ്ങിയ പ്രവർത്തനങ്ങൾ സമയബന്ധിതമായാണ് നടത്തിയത്. നിടുകുളം കടവ് പാർക്കും കൊളപ്പ വോളിബോൾ ഗ്രൗണ്ടും നിർമാണം പൂർത്തിയാക്കി ജനങ്ങൾക്ക് തുറന്നുകൊടുത്തു. നാലുപെരിയ ശ്മശാനം വാതക ശ്മശാനമാക്കാനുള്ള പ്രവർത്തനം പുരോഗമിക്കുന്നുണ്ട്. ഹെൽത്ത് ഗ്രാന്‍ഡ്‌ വിനിയോഗിച്ച് നിർമാണം പൂർത്തീകരിച്ച ആശുപത്രി കെട്ടിടം ജില്ലയിൽ തന്നെ ആദ്യത്തേതാണ്.

ലക്ഷ്യം സമഗ്ര വികസനം

വികസനത്തോടൊപ്പം കാർഷിക മേഖലയുടെ പരിപോഷണവും ലക്ഷ്യമാക്കി. അതിന് അനുസൃതമായ പദ്ധതികളാണ് ആവിഷ്കരിച്ച് നടപ്പാക്കിയത്. ഭൂരഹിതർക്ക് ഭൂമിയും വീടും നൽകുന്ന പ്രവർത്തനം, ഭവന രഹിതർക്ക് വീട് നൽകൽ എന്നിവ ലക്ഷ്യത്തോടടുത്തുവരുന്നു. അതിദരിദ്രരുടെ പട്ടികയിൽപ്പെട്ട മുഴുവനാളുകൾക്കും അവരുടെ ആവശ്യകതയ്‌ക്കനുസരിച്ചുള്ള പദ്ധതികളാണ് നടപ്പാക്കുന്നത്.

മുൻതൂക്കം 
സദ്ഭരണത്തിന്

സദ്ഭരണം യാഥാർഥ്യമാക്കുകയെന്നതിനാണ് മുൻതൂക്കം നൽകിയത്. ക്ഷേമപ്രവർത്തനങ്ങൾ തുടരുമ്പോഴും ഗ്രാമീണ റോഡുകളുടെ നിർമാണവും പുനരുദ്ധാരണവും കൃത്യതയോടെ മുന്നോട്ടു കൊണ്ടുപോയി. നാടിന്റെ മുഖമുദ്രയായ കാർഷികമേഖലയ്‌ക്ക് പുത്തനുണർവ് നൽകാൻ തൊഴിലുറപ്പ് പദ്ധതിയിലൂടെ സാധിച്ചു. ക്ഷേമ പെൻഷനുകൾ അർഹതപ്പെട്ടവർക്കെല്ലാം കൃത്യതയോടെ നൽകി. ആരോഗ്യരംഗത്ത് അലോപ്പതി, ആയുർവേദം, ഹോമിയോ മേഖലകൾക്കെല്ലാം പരിഗണന നൽകി.