വികസനത്തുടർച്ചതേടി റജി

കൂടാളി

ഹോം ടെക്‌സ്‌റ്റൈൽ നിർമാണരംഗത്ത്‌ ഇന്ത്യയുടെ അഭിമാനമായ ശബരി കോട്ടൺസിന്റെ കൊളോളം യൂണിറ്റിലെ തൊഴിലാളികൾ ഏറെ ആവേശത്തിലായിരുന്നു. കൂടാളി ഡിവിഷനിൽനിന്ന്‌ ജില്ലാ പഞ്ചായത്തിലേക്ക്‌ ജനവിധി തേടുന്ന എൽഡിഎഫ്‌ സ്ഥാനാർഥി പി പി റജിയെ സ്വീകരിക്കാൻ കാത്തിരിക്കുകയായിരുന്നു അവർ. പുഞ്ചിരിയോടെ കടന്നുവന്ന റജിക്ക്‌ ചുറ്റുംകൂടിയ തൊഴിലാളികൾ, തങ്ങളിലൊരാളായി അവരെ ഹൃദയത്തിൽ സ്വീകരിച്ചു. കഴിഞ്ഞ അഞ്ചുവർഷം കുറ്റ്യാട്ടൂർ പഞ്ചായത്തിന്റെ വികസനത്തേര്‌ തെളിച്ച ഭരണമികവിന്റെ അനുഭവസമ്പത്തുമായാണ്‌ റജി ജില്ലാ പഞ്ചായത്തിലേക്ക്‌ മത്സരിക്കുന്നത്‌. സമീപപ്രദേശമായ ഉരുവച്ചാൽ സ്വദേശിയായതിനാൽ അധികം പരിചയപ്പെടുത്തലുകൾ വേണ്ടിവന്നില്ല. സംസ്ഥാന സർക്കാരിന്റെ വികസന–ക്ഷേമ പ്രവർത്തനങ്ങളെപ്പറ്റിയുള്ള ലളിതമായ വാക്കുകളിലൂടെ റജി വോട്ടഭ്യർഥിച്ചു. മഹിളാ അസോസിയേഷൻ കുറ്റ്യാട്ടൂർ വില്ലേജ്‌ സെക്രട്ടറിയായും മയ്യിൽ ഏരിയാ കമ്മിറ്റിയംഗമായും പ്രവർത്തനപാരമ്പര്യമുള്ള റജി എല്ലാവർക്കും സുപരിചിതയാണ്‌. സ്ഥാനാർഥിയെത്തിയതോടെ ജോലിക്ക്‌ താൽക്കാലിക വിരാമമിട്ട്‌ തൊഴിലാളികൾ തങ്ങളുടെ ആവശ്യങ്ങളെക്കുറിച്ച്‌ റജിയോട്‌ സംസാരിച്ചു. ആവശ്യങ്ങൾ ശ്രദ്ധയോടെ കേട്ടു. അവർക്കൊപ്പം സെൽഫിയെടുത്ത്‌ റജി അടുത്ത സ്വീകരണകേന്ദ്രത്തിലേക്ക്‌. കൂടാളി പഞ്ചായത്തിലെ മുഴുവൻ വാർഡുകളും കുറ്റ്യാട്ടൂർ, മലപ്പട്ടം, ഇരിക്കൂർ പഞ്ചായത്തുകളുടെ ഭാഗങ്ങളും ചേർത്ത്‌ രൂപീകരിച്ചതാണ്‌ ജില്ലാ പഞ്ചായത്ത്‌ കൂടാളി ഡിവിഷൻ. എൽഡിഎഫിന്റെ ശക്തികേന്ദ്രമായ ഡിവിഷൻ ഇക്കുറി റജിക്ക്‌ വർധിച്ച ഭൂരിപക്ഷം നൽകി വികസനത്തുടർച്ച ഉറപ്പാക്കുമെന്നാണ്‌ പ്രവർത്തകരുടെ പ്രതീക്ഷ. സിപിഐ എം കൂടാളി ലോക്കൽ സെക്രട്ടറി പി പി ന‍ൗഫൽ, ബ്ലോക്ക്‌ പഞ്ചായത്ത്‌ സ്ഥാനാർഥി എൻ വി സ്‌മിത, പഞ്ചായത്ത്‌ സ്ഥാനാർഥികളായ കട്ടയാട്ടിൽ ജയപ്രകാശൻ, മനോജൻ കക്കത്ത്‌ എന്നിവരും സ്ഥാനാർഥിക്കൊപ്പമുണ്ടായി.