രജനി മോഹനെ ഹൃദയത്തോട്‌ ചേർത്ത്‌ മാതമംഗലം

പെരിങ്ങോം

‘‘വരരുത് കോൺഗ്രസ്, വന്നാൽ കേരളമില്ല’’ കുറ്റൂർ കുഴിക്കാട്ടെ കണ്ടങ്കോൽ കല്യാണിക്ക്‌ എൺപത്തിരണ്ട് വയസ്സായെങ്കിലും വാക്കുകളിലുണ്ട്‌ കൃത്യത. പറഞ്ഞുകഴിഞ്ഞ ഉടനെ രജനി മോഹനെ ചേർത്തുപിടിച്ച് വിതുമ്പി കൂടെ അനുഗ്രഹവും. ‘‘മരുന്നു വാങ്ങാൻ പെൻഷൻ തന്ന സർക്കാറാ.. ജയിച്ചുവരും...നല്ല ഭൂരിപക്ഷത്തോടെ’’. പെരിങ്ങോം- വയക്കര പഞ്ചായത്തിലെ കാഞ്ഞിരപ്പൊയിലിലെ സ്വീകരണകേന്ദ്രത്തിൽ എഴുപത്തിയാറുകാരിയായ കൂത്തൂർ കാർത്യായനിയമ്മക്കും പറയാൻ വേറൊന്നില്ല. ‘‘ഈനും മുമ്പെ കണ്ടിനാ നമ്മ... ഇങ്ങന തരുന്ന സർക്കാരിനെ. എത്രയാ തന്നേ. ഈ സർക്കാറ് മതി’’. എൽഡിഎഫ്‌ സർക്കാരിന്റെ ക്ഷേമപദ്ധതികളുടെ ഗുണഭോക്താക്കളാണ്‌ രജനി മോഹന്റെ സ‍്വീകരണകേന്ദ്രങ്ങളിൽ ആവേശം നിറക്കുന്നത്‌. വോട്ടർമാരുടെ ഹൃദയത്തിൽനിന്നുള്ള അനുഗ്രഹങ്ങളുമേറ്റുവാങ്ങിയാണ്‌ മാതമംഗലം ഡിവിഷൻ എൽഡിഎഫ് സ്ഥാനാർഥി രജനി മോഹന്റെ പര്യടനം. പലസ്ഥലങ്ങളിലും മത്സരമേയില്ലെന്ന പ്രതീതിയാണ്‌. ആശ വർക്കേഴ്‌സ്‌ യൂണിയൻ കേന്ദ്ര കമ്മിറ്റി അംഗമായും സിഐടിയു ജില്ലാ കമ്മിറ്റി അംഗമായും കഴിഞ്ഞ അഞ്ചുവർഷം പയ്യന്നൂർ ബ്ലോക്ക്‌ പഞ്ചായത്ത് സ്ഥിരംസമിതി അധ്യക്ഷയായും സിപിഐ എമ്മിന്റെ പെരിങ്ങോം ഏരിയാ കമ്മിറ്റി അംഗമായും പൊതുരംഗത്ത് നിറഞ്ഞുനിൽക്കുന്ന രജനി മോഹനെ അറിയാത്തവരില്ല. മാതമംഗലം ടൗണിൽനിന്നാണ് ഞായറാഴ്ചത്തെ പര്യടനം. രാവിലെ തന്നെ ടൗൺ ജനസഞ്ചയമായി. വാദ്യമേളത്തിന്റെയും മുത്തുക്കുടകളുടെയും അകന്പടിയോടെ സ്ഥാനാർഥിയെ സ്വീകരിച്ചു. ഓരോ സ്വീകരണകേന്ദ്രം കഴിയുമ്പോഴും ചരിത്രവിജയമാണെന്ന് അടിവരയിടുന്ന കാഴ്‌ച. മാതമംഗലത്തുനിന്ന്‌ തായിറ്റേരി, കുഴിക്കാട്, പെരുവാമ്പ, ഓടമുട്ട്, കടുക്കാരം. ഉച്ചവെയിലിനെ വകഞ്ഞുമാറ്റി അമ്മമാരും, കുട്ടികളും, യുവജനങ്ങളും സ്ഥാനാർഥിയെ വരവേറ്റു. പെരിന്തട്ട നോർത്തിലെ സ്വീകരണകേന്ദ്രത്തിൽ മുൻ ബ്ലോക്ക് പഞ്ചായത്ത് പ്രസിഡന്റ് എം ടി പി നൂറുദ്ദീൻ സരസമായ പ്രസംഗത്തിൽ യുവതലമുറയ്ക്ക് കണക്ട് ടു വർക്ക് സ്കോളർഷിപ്പിനെക്കുറിച്ച് സംസാരിച്ചപ്പോൾ കൈയടിയോടെയാണ് സ്വീകരിച്ചത്. നാടിന്റെ സ്നേഹവും, ആശീർവാദവും ഏറ്റുവാങ്ങി സമാപനകേന്ദ്രമായ കാങ്കോൽ- ആലപ്പടമ്പ് പഞ്ചായത്തിലെ പാനോത്തേക്ക്. പയ്യന്നൂർ ബ്ലോക്ക് പഞ്ചായത്ത് പെരിന്തട്ട ഡിവിഷൻ സ്ഥാനാർഥി കെ കമലാക്ഷൻ, മാത്തിൽ ഡിവിഷൻ സ്ഥാനാർഥി കെ ജി ബിന്ദുമോൾ, ഡിവൈഎഫ്ഐ ജില്ലാ കമ്മിറ്റി അംഗം വി പി രജീഷ്, എൽഡിഎഫ് നേതാക്കളായ കെ വി ഗോപിനാഥൻ, കെ വി വിജയൻ, എം അരുൺ, പി ബാലകൃഷ്ണൻ, കെ ആർ ചന്ദ്രകാന്ത് എന്നിവരും സ്ഥാനാർഥിയെ അനുഗമിച്ചു.