മുന്നേറി മൊകേരി

പാനൂർ

കലാ - സാംസ്കാരിക രംഗത്ത് കൈയൊപ്പുചാർത്തിയ കാർഷിക ഗ്രാമമാണ്‌ - മൊകേരി. ഐ വി ദാസ്‌, കെ എം കൃഷ്ണൻ മാസ്റ്റർ, കെ മൊകേരി (കുഞ്ഞബ്ദുള്ള മാസ്റ്റർ), കോമൻ അധികാരി, രാമചന്ദ്രൻ മൊകേരി തുടങ്ങി ഒട്ടേറെ മഹാരഥൻമാരിലൂടെ ചരിത്രത്തിൽ അടയാളപ്പെടുത്തിയ നാട്‌. പാനൂർ പഞ്ചായത്തിന്റെ ഭാഗമായ മൊകേരി 1963 ലാണ് പഞ്ചായത്തായത്. 1979 മുതൽ തുടർച്ചയായി എൽഡിഎഫിനൊപ്പം നിന്ന മൊകേരി പഞ്ചായത്തിൽ സർവ മേഖലകളിലും വികസന കുതിപ്പുണ്ടായി‍. ​സ്വപ്നം യാഥാർഥ്യമാകുന്നു മൊകേരിയുടെ സ്വപ്നമായ കൺവൻഷൻ സെന്റർ യാഥാർഥ്യമാവുകയാണ്. ജനകീയ കൂട്ടായ്മയിൽ ഒരു കോടി രൂപ സമാഹരിച്ചു പാത്തിപ്പാലം - പാറേമ്മൽ റോഡിൽ 80 സെന്റ്‌ ഭൂമി സർക്കാരിന് കൈമാറി. കെ പി മോഹനൻ എംഎൽഎ ഇടപെട്ട്‌ സർക്കാർ അഞ്ചുകോടിരൂപയും അനുവദിച്ചു. അത്യാധുനിക രീതിയിൽ പണിയുന്ന കൺവൻഷൻ സെന്ററിൽ കല്യാണമണ്ഡപവും മീറ്റിങ് ഹാളുമുണ്ടാകും. ​ജലസേചന പദ്ധതികൾ കൃഷിയാണ് മൊകേരിയുടെ മൂലധനം. കൃഷിക്കാവശ്യമായ വെള്ളമെത്തിക്കാൻ പാത്തിപ്പാലം, ചാടലപ്പുഴകളെ ഉപയോഗിച്ചും കിണർ കുഴിച്ചും ഈസ്റ്റ് വള്ള്യായിലും കുരാറയിലും മൊകേരിയിലും മൂന്ന് ജലസേചന പദ്ധതികളുണ്ട്‌. വേനൽക്കാലത്ത്‌ കർഷകർക്ക് ഇത് ഏറെ സഹായകമാണ്. നെല്ലും നേന്ത്രവാഴയും മറ്റു പച്ചക്കറികളും യഥേഷ്ടം വിളയുന്നതും ഇ‍ൗ പിന്തുണയിലാണ്‌. ​കുടിവെള്ളം സർവത്ര ജലക്ഷാമമുള്ള പ്രദേശങ്ങളിലെ കുടിവെള്ള ക്ഷാമം പരിഹരിക്കാൻ തനത് പദ്ധതി ആറെണ്ണം പ്രവർത്തിക്കുന്നു. മുത്താറി പീടികയിലടക്കം പഞ്ചായത്ത് പരിധിയിൽ 252 കുടുംബങ്ങളിൽ മുടക്കമില്ലാതെ വെള്ളമെത്തുന്നു. ജലജീവൻ മിഷന്റെ ഭാഗമായി വളള്യായിൽ വാട്ടർ ടാങ്ക്‌ നിർമാണമാരംഭിച്ചു.​ മികവുറ്റ ആരോഗ്യം കെ കെ ശൈലജ എംഎൽഎയായി മണ്ഡലത്തെ പ്രതിനിധീകരിച്ചപ്പോൾ അത്യാധുനിക രീതിയിൽ നിർമിച്ച ആരോഗ്യ കേന്ദ്രത്തെ 2020ൽ കുടുംബാരോഗ്യ കേന്ദ്രമാക്കി ഉയർത്തി. നവീകരണത്തിന്റെ ഭാഗമായി ഒന്നാം നില നിർമാണം പൂർത്തീകരിച്ചു. സേവന മികവിന് നാഷണൽ ക്വാളിറ്റി അഷ്യൂറൻസ് സ്റ്റാൻഡേർഡ്സ് (എൻക്യൂഎഎസ്) അംഗീകാരവും നേടി. പാത്തിപ്പാലത്ത് ആയുർവേദ ആശുപത്രിയും മൃഗാശുപത്രിയും കടേപ്രത്ത് ഹോമിയോ ഡിസ്പെൻസറിയും മികച്ച നിലയിൽ പ്രവർത്തിക്കുന്നു. 97 ലക്ഷം രൂപ ചെലവിട്ട്‌ ഹോമിയോ ഡിസ്പൻസറിയുടെ രണ്ടാം നിലയുടെ നിർമാണവും പൂർത്തീകരിച്ചു. കൂരാറയിൽ ജനകീയ അലോപ്പതി ആരോഗ്യ കേന്ദ്ര നിർമാണം അന്തിമ ഘട്ടത്തിലാണ്. ​ലൈഫ്‌ ഇ‍ൗസ്‌ ബ്യൂട്ടിഫുൾ 67 അപേക്ഷകളിൽ 53 പേർക്കും വീട്‌ കൈമാറി. 10 വീടിന്റെ പ്രവൃത്തി പുരോഗമിക്കുന്നു. ഭൂമിയില്ലാത്തതും മറ്റു സാങ്കേതിക പ്രശ്നങ്ങളാലും മുടങ്ങിയ നാലു അപേക്ഷകളിൽ അതിവേഗം തീർപ്പുണ്ടാക്കി സമ്പൂർണ ഭവനരഹിത പഞ്ചായത്താകാനുള്ള വഴിയിലാണ്‌ മൊകേരി. വിദ്യാഭ്യാസ മികവിലേക്കുള്ള ലക്ഷ്യത്തിന്റെ തുടക്കമെന്ന രീതിയിൽ 18 അങ്കണവാടികൾ മൊകേരിയിലുണ്ട്‌. ഇതിൽ 17 ഉം സ്വന്തം കെട്ടിടത്തിലാണ്. പാത്തിപ്പാലത്ത് കെ പി മോഹനൻ എംഎൽഎ അനുവദിച്ച 27 ലക്ഷം രൂപയടക്കം ചെലവഴിച്ച്‌ മാതൃക അങ്കണവാടി നിർമാണം നടക്കുന്നുണ്ട്‌. ​ പൊതു ഇടങ്ങൾ നവീകരിച്ചു മുത്താറിപ്പീടികയിലും തങ്ങൾ പീടികയിലും ഹൈമാസ്റ്റ്‌ ലൈറ്റും മാക്കൂൽ പീടികയിൽ മിനിമാസ്റ്റ്‌ ലൈറ്റും സോളാർ തെരുവുവിളക്കുകളും എംഎൽഎ ഫണ്ടിൽ പഞ്ചായത്ത്‌ ഇടപെട്ട്‌ സ്ഥാപിച്ചു. ജിംനേഷ്യത്തിന്‌ കൂരാറയിൽ സ്ഥലമെടുത്തു. എംഎൽഎ മുഖേനയുള്ള 35 ലക്ഷം രൂപയടക്കം ഉപയോഗിച്ച്‌ ഉടൻ നിർമാണത്തിലേക്ക്‌ കടക്കും. പാനൂർ ബ്ലോക്ക് പഞ്ചായത്തിന്റെ സഹകരണത്തോടെ 35 ലക്ഷംചെലവിട്ട്‌ കൂരാറ മഠത്തിൽകുളം നവീകരിച്ചു. ഗതാഗതം ദുസ്സഹമായ മൊകേരി–പന്ന്യന്നൂർ പഞ്ചായത്തുകളെ ബന്ധിപ്പിക്കുന്ന റോഡ്‌ നവീകരണവും യാഥാർഥ്യമായി. ​ എല്ലാ വാർഡിലും ലൈബ്രറി 14 വാർഡിൽ 14 ലൈബ്രറികളുണ്ട്. സമ്പൂർണ യോഗ പഞ്ചായത്താക്കുക എന്ന ലക്ഷ്യത്തിൽ യോഗാ ക്ലാസുകളും നടക്കുന്നു. ദീർഘ വീക്ഷണത്തോടെയുള്ള പ്രവർത്തനങ്ങളിലൂടെ അടിസ്ഥാന സ‍ൗകര്യമേഖലയിലുൾപ്പെടെ നൂതനമായ ആശയങ്ങളുമായി മൊകേരി ഇടവേളകളില്ലാതെ കുതിക്കുകയാണ്‌. ജില്ലാ–ബ്ലോക്ക് പഞ്ചായത്തുകളുടെ സഹകരണത്തോടെ മൊകേരി വളള്യായിൽ പ്രവർത്തിക്കുന്ന മാലിന്യ സംഭരണ- സംസ്കരണ കേന്ദ്രം നവീകരിച്ചു.