ദമ്പതികളുടെ സ്കൂട്ടറുകള്‍ കോണ്‍ഗ്രസ് പ്രവര്‍ത്തകന്‍ തീവച്ച് നശിപ്പിച്ചു
കണ്ണൂർ
കണ്ണൂർ കോര്‍പ്പറേഷനിലെ യുഡിഎഫ് ഭരണസമിതിയുടെ അഴിമതികളെക്കുറിച്ച് നടത്തിയ പ്രസംഗം ഫെയ്സ്ബുക്കില് ലൈവിട്ടതിന്റെ വിദ്വേഷത്തില്‍ ചാലാട് തെക്കന്‍മണലിലെ ദമ്പതികളുടെ സ്കൂട്ടറുകള്‍ കോണ്‍ഗ്രസ് പ്രവര്‍ത്തകന്‍ തീവച്ച് നശിപ്പിച്ചു. തെക്കന്‍മണലിലെ കൃഷ്ണ നിവാസില്‍ വാടകയ്ക്ക് താമസിക്കുന്ന കെ സൽന, ഭർത്താവ് കെ ജിതേഷ് എന്നിവരുടെ സ്കൂട്ടറുകളാണ് അയല്‍വാസിയും കോണ്‍ഗ്രസ് പ്രവര്‍ത്തകനുമായ നിജില്‍ ( കണ്ണന്‍) തീവച്ച് നശിപ്പിച്ചത്. ഇയാള്‍ക്കെതിരെ സൽന കണ്ണൂര്‍ ടൗണ്‍ പൊലീസില്‍ പരാതി നല്‍കി. തിങ്കള്‍ അര്‍ധരാത്രി 12.15നാണ് സംഭവം. വീട്ടുമുറ്റത്ത് നിര്‍ത്തിയിട്ട ജിതേഷിന്റെയും വീട്ടിലേക്കുള്ള ഇന്റര്‍ലോക്ക് പാകിയ വഴിയില്‍ നിര്‍ത്തിയിട്ട സല്‍നയുടെയും സ്കൂട്ടറുകൾക്കാണ് തീവച്ചത്. തീ ഉയരുന്നതുകണ്ട് ദമ്പതികള്‍ പുറത്തേക്കിറങ്ങിയപ്പോൾ നിജിലിനെ സമീപത്ത്‌ കണ്ടതിന്റെ ദൃശ്യങ്ങള്‍ മൊബൈല്‍ഫോണില്‍ പകര്‍ത്തിയിരുന്നു. ഇവ സാമൂഹ്യമാധ്യമങ്ങളിലും പങ്കുവച്ചു. കണ്ണൂര്‍ കോര്‍പ്പറേഷനിലേക്ക് മത്സരിക്കാനുള്ള തയ്യാറെടുപ്പുമായി രാജീവ് ജി കള്‍ച്ചറല്‍ ഫോറം കണ്ണൂര്‍ ചേംബര്‍ ഹാളില്‍ ഞായര്‍ സംഘടിപ്പിച്ച കണ്‍വന്‍ഷനില്‍ സൽന പങ്കെടുത്തിരുന്നു. കണ്‍വന്‍ഷനില്‍ കോര്‍പ്പറേഷന്‍ വികസന സ്ഥിരംസമിതി അധ്യക്ഷന്‍ പി കെ രാഗേഷ് കണ്ണൂര്‍ കോര്‍പ്പറേഷനില്‍ നടക്കുന്ന അഴിമതിയെക്കുറിച്ച് നടത്തിയ പ്രസംഗം സല്‍ന ഫെയ്സ്ബുക്കില് ലൈവിട്ടിരുന്നു. ഇതിന്റെ വിദ്വേഷത്തിലാണ് നിജില്‍ സ്കൂട്ടര്‍ തീവച്ചതെന്നാണ് പരാതി. നിജിലും കോണ്‍ഗ്രസ് പ്രവര്‍ത്തകരും നിരന്തരം ഭീഷണിപ്പെടുത്തുന്നതായും സല്‍ന പറഞ്ഞു. വീട്ടുമുറ്റത്ത് നിര്‍ത്തിയിട്ട സ്കൂട്ടറില്‍നിന്ന്‌ തീ ഉയര്‍ന്ന് ഇവര്‍ താമസിക്കുന്ന വീടിന്റെ കഴുക്കോലിലേക്ക് പടര്‍ന്നിരുന്നു. തീ നിയന്ത്രിക്കാനായതിനാല്‍ കൂടുതല്‍ അപകടമുണ്ടായില്ല. രണ്ട് സ്കൂട്ടറുകളും പൂര്‍ണമായി കത്തിനശിച്ചു. ഫോറന്‍സിക്‌ വിഭാഗം വീട്ടില്‍ പരിശോധന നടത്തി. സംഭവത്തില്‍ കേസെടുത്ത കണ്ണൂര്‍ ടൗണ്‍ പൊലീസ് അന്വേഷണം തുടങ്ങി. പ്രദേശത്തെ സിസിടിവി കാമറ ദൃശ്യങ്ങള്‍ ഉള്‍പ്പെടെ പൊലീസ് പരിശോധിച്ചുവരികയാണ്.
Related News
Dont Miss it
0 comments