ഇരിട്ടിയിൽ ഇടതുമുന്നേറ്റം

ഇരിട്ടി

ബസ്‌സ്റ്റാൻഡ്‌ പരിസരത്തെ പ്ലാസ്റ്റിക്‌ കൂരയിലാണ്‌ തമിഴ്‌നാട്ടിൽനിന്നെത്തിയ ശുചീകരണ തൊഴിലാളി പെരുമാൾ ഭാര്യ രാധക്കൊപ്പം താമസിച്ചത്‌. അന്ന്‌ കീഴൂർ– ചാവശേരി പഞ്ചായത്ത്‌ പരിധിയിലായിരുന്നു ഇരിട്ടി പട്ടണം. 2015ൽ പഞ്ചായത്ത്‌ ഇരിട്ടി നഗരസഭയാകുന്നതിനുമുന്പേ പെരുമാളും കുടുംബവും ട‍ൗൺ വളർച്ചക്കൊപ്പം ശുചീകരണപ്രവൃത്തികളും ഇടതടവില്ലാതെ നടത്തി. വാടകമുറിയിലേക്ക്‌ മാറിയ ഇ‍ൗ കുടുംബത്തിന്‌ സ്വന്തമായി ഒരുതരി മണ്ണോ വീടോ ഉണ്ടായിരുന്നില്ല. പൊതുസമൂഹത്തിൽ ഇടതുപക്ഷം നടത്തിവന്ന പ്രവർത്തനങ്ങൾ വഴി പെരുമാളിനെപ്പോലുള്ള അതിഥിത്തൊഴിലാളി കുടുംബങ്ങളും നാടിന്റെ ശ്രദ്ധയിലുണ്ടായിരുന്നു. സംസ്ഥാന സർക്കാർ ആവിഷ്കരിച്ച അതിദാരിദ്ര്യമുക്ത പദ്ധതിയിൽ ഇ‍ൗ കുടുംബത്തിന്‌ സ്വന്തം സ്ഥലവും നഗരസഭ ഒരുക്കുകയാണ്‌. റേഷൻ കാർഡ്‌, ആധാർ കാർഡ്‌, വോട്ട്‌ എന്നിവയടക്കം നേടി പെരുമാളും കുടുംബവും നഗര വളർച്ചക്കൊപ്പം സ്വന്തം ജീവിതവും കരുപ്പിടിപ്പിച്ചു. ‘തലൈവരാണ്‌ എങ്കൾക്ക്‌ കേരള സർക്കാർ. മുഖ്യ തലൈവരാണ്‌ എങ്കടെ മുനിസിപ്പാലിറ്റി. വണക്കമുണ്ട്‌ പെരിയോൾകളെ’– എന്ന്‌ പെരുമാൾ പറയുന്നത്‌ ഇ‍ൗ നാടിന്റെ നന്മക്കുള്ള അകമഴിഞ്ഞ പിന്തുണ. പാവങ്ങളുടെ പക്ഷത്തുറച്ചുനിന്ന്‌ നഗരസഭയും സർക്കാരും നടത്തിയ ജനക്ഷേമ വികസന പ്രവർത്തനങ്ങൾക്കാണ്‌ ഇ‍ൗ പിന്തുണ. പത്തുകൊല്ലംമുന്പ്‌ നിലവിൽവന്ന ഇരിട്ടി നഗരസഭയിൽ വികസനത്തിന്റെ പൂക്കാലമാണ്‌ ഉണ്ടായത്‌. പുന്നാട്ടും പത്തൊന്പതം മൈലിലും ആരംഭിച്ച അർബൻ വെൽനസ്‌ സെന്ററുകൾ, വയോമിത്രം ക്ലിനിക്കുകൾ വഴി മുതിർന്നവർക്കുള്ള പരിചരണം, അങ്കണവാടികൾ തൊട്ട്‌ നടപ്പാക്കിയ വിദ്യാഭ്യാസ ഉന്നമന പ്രവർത്തനങ്ങൾ, ശുചിത്വ പ്രവർത്തനങ്ങൾ വഴി നേടിയ ദേശീയ അംഗീകാരം, ലൈഫ്‌ പാർപ്പിട പദ്ധതിയിൽ നിർമിച്ചുനൽകിയ മുന്നൂറ്‌ വീടുകൾ, 64 കോടി രൂപയുടെ ആർദ്രം പദ്ധതിയിൽ ഇരിട്ടി താലൂക്കാശുപത്രിയിൽ നിർമിക്കുന്ന ആറ്‌ നില ആശുപത്രി സമുച്ചയം, നിരവധിയായ പ്രവർത്തനങ്ങൾ. നാടിന്റെ മുഖച്ഛായ മാറ്റി. ഇടവഴികളും റോഡുകളുമടക്കം ഗതാഗതയോഗ്യമാക്കി, നഗരസഭയിൽ ആധുനിക കളിക്കളം ഒരുക്കാൻ സ്ഥലം വാങ്ങി തുടക്കമിട്ട പദ്ധതി അങ്ങനെ നീളുന്ന വികസന ക്ഷേമ പദ്ധതികളുടെ അഭിമാനമുയർത്തിയാണ്‌ ഇത്തവണയും എൽഡിഎഫ്‌ വർധിത ഭൂരിപക്ഷം നേടാൻ മുന്നേറുന്നത്‌. 2015ൽ 33ൽ പതിനാല്‌ സീറ്റ്‌ നേടി സിപിഐ എം വലിയ ഒറ്റക്കക്ഷിയായതോടെയാണ്‌ എൽഡിഎഫ്‌ രണ്ടാംവട്ടവും അധികാരം ഉറപ്പിച്ചത്‌. ഇത്തവണ വാർഡുകൾ 34 ആയി വർധിച്ചു. മികച്ച ഭൂരിപക്ഷത്തോടെ മുന്നാമതും അധികാരത്തിലെത്തുമെന്ന ഉറപ്പാണ്‌ നാട്‌ നൽകുന്ന ആവേശം. - നിലവിലെ കക്ഷിനില ആകെ വാർഡ്‌–33 എൽഡിഎഫ് –14 യുഡിഎഫ് – 11 ബിജെപി–5 എസ്ഡിപിഐ –3