കൃഷിനാശം കണ്ണൂർ വിമാനത്താവളത്തിലേക്ക് 
കർഷകസംഘം മാർച്ച്‌

മട്ടന്നൂർ വിമാനത്താവളത്തിൽനിന്നുള്ള മഴവെള്ളം കുത്തിയൊഴുകി കൃഷിനാശം സംഭവിക്കുന്നതിനെതിരെ നടപടിയെടുക്കുക, കൃഷിനാശം നേരിട്ട കർഷകർക്ക് മതിയായ നഷ്ടപരിഹാരം നൽകുക തുടങ്ങിയ ആവശ്യങ്ങൾ ഉന്നയിച്ച് കേരള കർഷകസംഘം മട്ടന്നൂർ ഏരിയാ കമ്മിറ്റിയുടെ നേതൃത്വത്തിൽ കണ്ണൂർ അന്താരാഷ്ട്ര വിമാനത്താവളത്തിലേക്ക് മാർച്ചും ധർണയും സംഘടിപ്പിച്ചു. കല്ലേരിക്കര സ്കുളിനു സമീപത്തുനിന്നാരംഭിച്ച മാർച്ചിലും തുടർന്ന് വിമാനത്താവളത്തിന്റെ ഒന്നാം ഗേറ്റിനുസമീപം നടന്ന ധർണയിലും നിരവധി കർഷകർ അണിനിരന്നു. ധർണ സിപിഐ എം ഏരിയാ സെക്രട്ടറി എം രതീഷ് ഉദ്ഘാടനം ചെയ്തു. കർഷകസംഘം ഏരിയാ പ്രസിഡന്റ്‌ പി സുരേഷ് ബാബു അധ്യക്ഷനായി. സംസ്ഥാന കമ്മിറ്റിയംഗം കെ സി മനോജ് സംസാരിച്ചു. ഏരിയാ സെക്രട്ടറി പി എം സുരേന്ദ്രൻ സ്വാഗതവും പി സത്യകുമാർ നന്ദിയും പറഞ്ഞു. വെള്ളം കുത്തിയൊഴുകിയെത്തി കല്ലേരിക്കരമുതൽ കാര പേരാവൂർ, പാലയോട് വരെയുള്ള പാടശേഖരങ്ങളും 15,000 ലേറെ വാഴകളുമാണ് നശിച്ചത്.