മലിനജലം റോഡിലൊഴുകുന്നത്‌ 
കാണുന്നില്ലേ

കണ്ണൂർ

പദ്ധതി നടപ്പാക്കിയതിലെ അപാകം കാരണം കോർപറേഷന്റെ സംസ്‌കരണ പ്ലാന്റിലേക്കുള്ള പൈപ്പുകളിലെ മലിനജലം റോഡിലേക്കൊഴുകുന്നു. മലിനജലത്തിനൊപ്പം പൈപ്പുവഴി ഖരമാലിന്യവും എത്തുന്നതാണ്‌ നഗരത്തിൽ ദുരിതം വിതയ്‌ക്കുന്നത്‌. പലയിടത്തും പൈപ്പ്‌ ബ്ലോക്കായാണ്‌ മലിനജലവും മാലിന്യവും റോഡിൽ പരക്കുന്നത്‌. കണ്ണൂർ നഗരത്തിലെ ഏറ്റവും കൂടുതൽ വ്യാപാര കേന്ദ്രങ്ങളുള്ള ഡിവിഷനുകളാണ്‌ കാനത്തൂരും താളിക്കാവും. ഇ‍ൗ പ്രദേശങ്ങളിലെ ഹോട്ടലുകളിലെയും മറ്റ്‌ വ്യാപാര സ്ഥാപനങ്ങളിലെയും മലിനജലം ശുദ്ധീകരിക്കുന്നതിനാണ്‌ പ്ലാന്റ്‌ നിർമാണത്തിലൂടെ ലക്ഷ്യമിട്ടത്‌. ഇത്തരം സ്ഥാപനങ്ങളിൽനിന്നുള്ള മലിനജലം ഒഴുക്കിവിടുന്നതിനാലാണ്‌ പടന്നത്തോടും മലിനമായി ഒഴുകുന്നത്‌. ഇതിനും ശാശ്വത പരിഹാരമൊരുക്കുകയായിരുന്നു പ്ലാന്റിന്റെ ലക്ഷ്യം. എന്നാൽ കോർപറേഷന്റെ പിടിപ്പുകേടുമൂലം കോടികൾ ചെലവഴിച്ച്‌ നിർമിച്ച പ്ലാന്റ്‌ ലക്ഷ്യം കൈവരിച്ചില്ലെന്നുമാത്രമല്ല ജനങ്ങൾക്ക്‌ ദുരിതവും സമ്മാനിക്കുകയാണ്‌. അമൃത്‌ പദ്ധതിയിൽ ഉൾപ്പെടുത്തിയാണ്‌ പ്ലാന്റ്‌ നിർമിച്ചത്‌. നിർമാണത്തിന്‌ കരാർ നൽകിയതിലുൾപ്പെടെ കോർപറേഷനിലെ ഭരണനേതൃത്വം ക്രമക്കേട്‌ നടത്തിയതായും പരാതിയുയർന്നിട്ടുണ്ട്‌. മാർക്കറ്റിലും സ്‌റ്റേഷൻ റോഡിലുമാണ്‌ പൈപ്പ്‌ ബ്ലോക്കായി മലിനജലം റോഡിൽ ഒഴുകുന്നത്‌. മലിനജലംമാത്രം പൈപ്പിലൂടെ വിടുന്നതിനുപകരം ഹോട്ടലുകളടക്കം ഖരമാലിന്യങ്ങളും ഇതുവഴി വിടുന്നുവെന്നാണ്‌ പരാതിയുയർന്നത്‌. കക്കൂസ്‌ മാലിന്യമടക്കം വിടുന്നുവെന്നും പൈപ്പ്‌ ലീക്കാകുന്ന ദിവസങ്ങളിൽ ദുർഗന്ധം സഹിക്കാനാവുന്നില്ലെന്നുമാണ്‌ പരിസരവാസികളുടെ പരാതി. വെള്ളംമാത്രം വിടുന്നതിനാണ്‌ പൈപ്പ്‌ കണക്‌ഷൻ നൽകിയതെങ്കിലും കോർപറേഷൻ അധികൃതരുടെ ഒത്താശയോടെ മറ്റ്‌ മാലിന്യങ്ങൾ കടത്തിവിടാനുള്ള പൈപ്പും കണക്‌ട്‌ ചെയ്‌തതായി സംശയമുയർന്നിട്ടുണ്ട്‌. ഇക്കാര്യത്തിൽ വിശദ പരിശോധന നടത്തണമെന്നാണ്‌ നാട്ടുകാരുടെ ആവശ്യം. പ്ലാന്റിൽനിന്നുള്ള അവശിഷ്‌ടങ്ങൾ വളമാക്കുന്നതിന്‌ പുറത്തിട്ടാണ്‌ ഉണക്കുന്നതെന്നും പരാതിയുയർന്നിട്ടുണ്ട്‌. ഇത്‌ സമീപത്ത്‌ ദുർഗന്ധം പരക്കുന്നതിന്‌ കാരണമാകുന്നു. പടന്നത്തോട്ടിലും ചില ദിവസങ്ങളിൽ മലിനജലവും ദുർഗന്ധവും ഉണ്ടാകുന്നതും പരിശോധിക്കണമെന്നാണ്‌ പ്രദേശവാസികളുടെ ആവശ്യം. നഗരത്തിലെ മലിനജലം സംസ്കരിച്ച്‌ മികച്ച രീതിയിൽ ഉപയോഗിക്കാനാകുന്ന പദ്ധതിയാണ്‌ കോർപറേഷന്റെ പിടിപ്പുകേടുമൂലം ഫലപ്രദമാകാതെ പോകുന്നത്‌. പൈപ്പിടുന്നതിന്‌ റോഡിൽ കീറിയ സ്ഥലങ്ങളിലും കൃത്യമായി ടാറിങ്ങ്‌ നടത്താത്തതിനാൽ കുഴികൾ രൂപപ്പെടുകയാണ്‌. റോഡ്‌ പൂർവസ്ഥിതിയിലാക്കാത്തതിനാൽ സിപിഐ എം നേതൃത്വത്തിൽ നിരവധി പ്രക്ഷോഭങ്ങൾ നടന്നിരുന്നു. റോഡ്‌ ടാർ ചെയ്‌തെങ്കിലും അമർന്നുപോകുന്നത്‌ തടയുന്നതിനുള്ള മാർഗങ്ങൾ അവലംബിക്കാത്തതാണ്‌ പ്രശ്‌നത്തിന്‌ കാരണം