കമ്പനിക്കെതിരെ നിയമ നടപടിക്ക്
കോർപ്പറേഷൻ

കണ്ണൂര്‍

പയ്യാമ്പലത്തെ വാതക ശ്മശാനം നിർമിച്ച എസ്‌കോ -ഫര്‍ണസസ്‌ പ്രൈവറ്റ് ലിമിറ്റഡിനെതിരെ നിയമനടപടി സ്വീകരിക്കാൻ കോർപ്പറേഷൻ ക‍ൗൺസിൽ യോഗത്തിൽ തീരുമാനം. രണ്ട്‌ വർഷത്തെ ഓപ്പറേഷനും അറ്റകുറ്റപ്പണിയും നടത്താമെന്ന ഗ്യാരണ്ടിയിലാണ്‌ കരാർ ഏറ്റെടുത്തത്‌. എന്നാല്‍, ഉദ്ഘാടനം കഴിഞ്ഞ് മാസങ്ങള്‍ക്കുള്ളില്‍ ശ്മശാനം തകരാറിലായി. ശ്മശാനത്തിന്റെ അറ്റകുറ്റപ്പണി നടത്താന്‍ കമ്പനിയോട് ആവശ്യപ്പെട്ടപ്പോള്‍ വീണ്ടും 18 ലക്ഷം രൂപയുടെ പ്രൊപ്പോസല്‍ നല്‍കുകയാണുണ്ടായത്. പലതവണ കമ്പനി അധികൃതരുമായി ചര്‍ച്ച നടത്തുകയും നോട്ടീസ് നല്‍കുകയും ചെയ്‌തെങ്കിലും ഫലമുണ്ടായില്ല. ജൂലൈ നാലിന് നടത്തിയ ചര്‍ച്ചയില്‍ ഒരാഴ്ചക്കുള്ളില്‍ ശ്മശാനം പ്രവര്‍ത്തനക്ഷമമാക്കുന്നതിനുള്ള നടപടികള്‍ സ്വീകരിക്കാൻ ആവശ്യപ്പെട്ടെങ്കെിലും നടപടിയുണ്ടായില്ല. അതിനാൽ, കരാര്‍ റദ്ദ്‌ ചെയ്‌ത്‌ സ്ഥപനത്തിനെതിരെ നിയമനടപടി സ്വീകരിക്കുമെന്ന്‌ മേയർ മുസ്ലീഹ്‌ മഠത്തിൽ പറഞ്ഞു. പയ്യാന്പലം ശ്‌മശാനത്തിന്റെ അശാസ്ത്രീയ നിര്‍മാണമാണ്‌ തകരാറിലാകാൻ കാരണമെന്ന്‌ ക‍ൗൺസിലർമാർ പറഞ്ഞു. തുരുന്പെടുക്കാത്ത നിർമാണസാമഗ്രികൾ ഉപയോഗിച്ച്‌ വാതക ശ്മശാനം എങ്ങനെ പ്രവര്‍ത്തന ക്ഷമമാക്കാമെന്ന് തീരുമാനിക്കുമെന്ന് കോര്‍പ്പറേഷന്‍ സെക്രട്ടറി വിനു സി കുഞ്ഞപ്പന്‍ പറഞ്ഞു. ഒന്നില്‍ കൂടുതല്‍ വാതക ശ്മശാനം നിര്‍മിക്കാന്‍ സാധിക്കുമോ എന്ന കാര്യവും പരിശോധിക്കുമെന്ന് സെക്രട്ടറി അറിയിച്ചു. പയ്യാമ്പലം ശാന്തിതീരം ശ്‌മശാനം നടത്തിപ്പിൽ പണം തട്ടിയ ജീവനക്കാരനെതിരെ നിയമനടപടിയെടുക്കാനും യോഗം തീരുമാനിച്ചു. വരുമാനയിനത്തില്‍ ലഭിച്ച 2,19,000 രൂപ ട്രഷറിയില്‍ അടച്ചില്ല. എജി ഓഡിറ്റില്‍ 2023 ഡിസംബര്‍ മുതല്‍ 2024 ജൂലൈ വരെയുള്ള കാലയളവിലാണ് തട്ടിപ്പ് നടത്തിയതെന്ന്‌ കണ്ടെത്തിയിരുന്നു. പയ്യാന്പലം ശ്‌മശാന നടത്തിപ്പുമായി ബന്ധപ്പെട്ട്‌ നിരവധി പരാതികൾ ഉയർന്നിട്ടും കൃത്യമായ നടപടി സ്വീകരിക്കാത്തതിനാലാണ്‌ കോർപ്പറേഷന്‌ ഇത്രയധികം നഷ്‌ടമുണ്ടാക്കിയതെന്ന്‌ എൽഡിഎഫ്‌ ക‍ൗൺസിലർമാർ പറഞ്ഞു. ദേശീയപാത വികസനം നടക്കുന്ന നടാലില്‍ അടിപ്പാത സ്ഥാപിക്കണമെന്ന് കോർപ്പറേഷൻ അടിയന്തര പ്രമേയത്തിലൂടെ ആവശ്യപ്പെട്ടു. കെ പി സവിത പ്രമേയം അവതരിപ്പിച്ചു. കൗണ്‍സിലര്‍മാരായ കെ പ്രദീപന്‍, പി വി കൃഷ്ണകുമാര്‍, ടി ഒ മോഹനന്‍ എന്നിവര്‍ പിന്താങ്ങി. എൻ സുകന്യ, ടി രവീന്ദ്രൻ, പി കെ അൻവർ, കെ പ്രദീപൻ, എസ്‌ ഷഹീദ, ഡെപ്യൂട്ടി മേയര്‍ പി ഇന്ദിര, സുരേഷ് ബാബു എളയാവൂര്‍ എന്നിവർ സംസാരിച്ചു.